20
Abraham ana putar-balet metma raja Abimelek adana
1 Angmuse Abraham ana Mamre mi ava asorong ila Negep mi, sengmuse ana Kades aabang, bot Syur aabang ehahama angumi mihi. Abraham ana Gerar aabang mi mihit metma nehe hoang-manang ening.
2 Abraham ana Gerar aabang enehe ang naung iat hubait hula, Sara angu, ekaku jangu. Angmuse Abimelek, Gerar eraja angu, ana enehe ang naung ing gahing iot hoa Sara at eistana mi ila.
3 Aarunge bir kua muse, iipal omimi Lahatala Ana Ava metma Abimelek etubing, bot at mateng hula, “Abimelek! Angase aana malekang aamina! Se nehe jangu ba aana aing medit at hoa angu, ana mehal veng iila angu ebele.”
4-5 Aarunge Abimelek ana bae Sara aing dei di jedung. Angu ebele iipal omimi ana Lahatala ehur angu ebalet hula, “Nimang! Bangsa ba bae eahalang veng niang di, Aana hula iameang ka? Abraham ba ena vengbanang se hula, nehe jangu angu, ekaku! Bot nehe jangu angu di ena vengbanang hula, Abraham angu ekaku. Base na nehe gahing iot ila nehe jangu angu at hoa, aarunge nomi anga molo-molo, bot natang anga di hamulang. Na bae nehe jangu angu aing dei di jedung. Angu ebele, Nimang, Aana ekang naing ening ahala ekang!”
6 Angmuse iipal omimi angu, Lahatala Ana bot Abimelek at mateng hula, “Etabi! Na ateing se, aana na angu ening, aarunge oomi angu molo-molo. Angu ebele, Naingba oomi angu vengtahang, senge aana ekang nehe jangu angu aing dei ekang. Bot aulang senge, aana ekang ahalang ening metma Nadana ekang.
7 Base, angase nehe ejangu angu, aana melekang at bale ila emehal enang. Emehal angu Nehurvala. Eningse ana sambajang metma maeenang, senge aana ekang aamina ekang. Aarunge kalo nehe ejangu angu, aana bae at bale ila emehal enang niang se, aana vengaanit aaung-aaung! Eningse aaing, bot eenehe ang naung, iing emangpi malekang aamina.”
8 Emitobang kukuaveng muse, Abimelek ana emalea ang naung emangpi iaru, bot iipal angu ana metma veng iat sarenta. Angmuse ing emangpi iuangmarit etatabi.
9 Bot Abimelek ana Abraham earu, sengmuse ana Abraham adangtaaning hula, “Ahalang naba ba na ening metma aadana tila, angu ebele aana silaka ening metma nadana, bot metma neparenta di adanat alang anga? Anga aana jasi-ahala ening metma nadana tila.
10 Eeomi tatalang ba, aana na alang anga ening metma niadana anga?”
11 Angmuse Abraham ana mateng hula, “Nimang raja! Na vengnomit hula, nehe emangpi ba angami anga, bae Lahatala Apang-ateing niang. Base, misavaka ini nameang, senge nejangu angu ini aing medi.
12 Bot etatabi aing angu nekaku. Se aing angu noleve nimang nu. Aarunge aing iva angu aabeung. Aulang aarunge na aing medit metma nejangu ening.
13 Base, kalo Lahatala Ana niot kaluar niava asorong lamal nimang ehava omi angu ehalang se, na nejangu at mateng hula, ꞌKalo aana etatabit oomi metma nejahi se, pi ila mana-mana ang naung mi, nehe naing vengtaaning se, aana vengbanang hula, poleve iia-mutu.ꞌ ”
14-16 Angmuse Abimelek ana jumba-aib, arbo-sapi, bot malea jangu, malea mehal medi, sengmuse emangpi ana metma Abraham enang. Bot Sara, Abraham ejangu angu di, Abimelek ana bale metma Abraham enang. Angmuse Abimelek ana Abraham at mateng hula, “Neaabang anga na bukat metma aadana, angu ebele, mana taang ba aana suka se, mi mihi.”
Angmuse Abimelek ana Sara di at mateng hula, “Seeng perak ribunu na bajar metma eekaku Abraham enang iila. Angu metma ebukti ening, senge eenehe ang naung ini ateing hula, na bae jasi-ahala iiba ening metma aadana niang. Bot aulang senge, nehe emangpi ekang aaing ening ahala ekang.”
17-18 Halomang mi, LAHATALA Ana nehe jangu ba Abimelek eistana mi ang naung emangpi ivaal emana angu vengtering iila, base ini bae vaal veng niang, se Abimelek ana Abraham ejangu Sara at eistana mi ila angu ebele. Aarunge uanguveng Abimelek ana bale Sara aing metma emehal Abraham enang muse, Abraham ana sambajang Lahatala Abanang, metma nehe jangu ang naung iadana. Angu ebele, Lahatala ana bale nehe jangu ang naung ivaal emana angu buka. Base ini bot bale vaal veng.