Mutu Yesus Esarenta aaung-hama
Markus
esurat mi hurak
1
Anga sarenta aaung-hama. Anga, Lahatala Oal* Ene Yesus Kristus. Aing angu ba turang jamang mi Lahatala matubing iila. Esarenta halomang angu alang:
Yohanis nehe Sasarani, via vengharakat metma Yesus Enang
(Matius 3:1-12; Lukas 3:1-18; Yohanes 1:19-28)
Yesus bae Ekarajang at lamal jedung se, Lahatala Ana nehe nu aing gahing, ene Yohanis. Yohanis malekang ila via vengharakat metma Yesus Ehoa angu adana. Turangmi Lahatala Ana Ehur vala nu ot vengbanang iila. Aing angu ene boma Yesaya. Ana metma esurat mi hurak vengbanang hula:
“Vengmee o! Na Nenehe aing gahing, ila via vengharakat metma ma Eenang.
Eningse nehe angu ila mana taimang ba nehe bae ue mi niang angmi, senge ana moring hula:
ꞌNehe emangpi iiava vengharaka, via ening aaung, metma Lahatala Ehoa angu adana!
Via ening ahama, senge Aing tarima.ꞌ ”
4-6 Ang muse Yohanes hoa via vengharakat metma Yesus enang. Yohanis angu nehe earu se hula, aing angu nehe Sasarani. Ana mana taimang ba mi aabeta. Ekondo angu unta eamudi ba nehe ening. Esape buar angu binanta ebuar ba nehe ening. Emod aadang angu kebet bot taung jal. [Yohanis eabetang angu, emenghula tura boma Elia eabetang angu edadenang.]
Uangu adana nehe toang rae bendar Yerusalem mi, bot propinsi Yudea enehe ang naung, emangpi hoa Yohanis emana angmi aing harak. Ini hoa Yohanis euling e, bot ehur angu vengmee. Yohanis iat mateng hula, “Iini malekang iiava vengbaroti e, Lahatala Ana iiahalang angu vengahi bot iiat aaung-hama. Malekang iing sarani, aulange hula iini Lahatala angu At aaung-hama tila.”
Yohanis emateng angu vengmee muse, iahalang ang naung emangpi ini vengbanang, seng muse Yohanis ana Yarden moar mi ing sarani.
Ana iat mateng hula, “Nehe mieele mibalolu nu bae naing edadenang niang, eningse Ana hoa. Metma Egahing vala ening di, naing anga bae gahing vala angu at hama niang. Naing mang jar ba metma iing sarani, aarunge Aing angu Ana ening miaaung-mihama, bot Lahatala ERoh hamulang angu Ana metma iiomimi.”
Yohanis ana Mutu Yesus Aing sarani
(Matius 3:13-17; Lukas 3:21-22)
Uangu adana, Yesus Ana Nasaret aabang propinsi Galilea mi angu mi hoa, Yohanis Aing harak. Ang muse Yohanis ana Yarden moar mi Aing sarani. 10 Yesus Ana jar mi bale da, mibaroti se, burang viaha baleleng. Lahatala ERoh emenghula dung molola edadenang hela Aing taang. 11 Bot Lahatala Amal vengbanang hula,
“Aaing anguba, Noal Nomi Eejahi.
Aaing anguba Nomi ening aeele.”
Setang enehe eele mana taimang mi hula Mutu Yesus abaang
(Matius 4:1-11; Lukas 4:1-13)
12 Ang muse, Lahatala ERoh Yesus at lamal ila mana taimang nu mi. 13 Mana angumi Ana binanta balevang ang naung ihahama mi aabetat mietang aributa. Angumi, setang enehe eele hoa aajajalat hula abaang, aarunge bae jadi niang. Ang muse Lahatala Egahing vala sorga mi hoa Aing vengbalenta.
Mutu Yesus Galilea mi ila Lahatala Evia matubing
(Matius 4:12-17; Lukas 4:14-15)
14 Ved evaila angu, Yohanis nehe Sasarani angu nehe at ila bui mi, aarunge Yesus Ana Galilea mi ila Lahatala Ehur aaung-hama angu metma nehe avomung-apahang. 15 Ana vengbanang hula,
“Vengmee o! Angase Lahatala Ehoa peang iila!
Angase nehe emangpi ateing hula Lahatala ba Eparenta pina tila.
Angu ebele iini malekang iiava vengbaroti!
Sengila ba, iiomi metma Yesus Esarenta aaung-hama anguba vengaanamang.”
Mutu Yesus nehe aab aalaping iarut iot Amulung
(Matius 4:18-22; Lukas 5:1-11)
16 Ved nu adana, Yesus Ana dano Galilea eadil angmi lamal. Nehe nu ene Simon bot ekaku ene Andrias Ana ing harak. Ole ue aab dalang sehi, se angu ikarajang ved kakanap. 17 Yesus iarut vengbanang hula, “Ee! Ma Namulung! Ooleve angu aab ba aalaping, aarunge eningse ooleve Na ening metma nehe vavalaping.” 18 Vengmeet Yesus mateng aulang muse, oleve idalang angu mea, sengila ba tahit lamal Yesus Amulung.
19 Yesus bot taang lamal se, Ana uuling Sabadeus oal ang naung iateing. Mutu angu ene Yakobus, bot ekaku kiki angu ene Yohanis. Oleve ue je mi ipoko vengpiling sehi. 20 Yesus iarut vengbanang hula, “Ee! Ma Namulung.” Ang muse, imang bot nehe ba imampi karajang ang naung oleve iadu, sengila ba ini Yesus Amulung.
Mutu Yesus setang aterit nehe nu eola bendar Kapernaum mi
(Lukas 4:31-37)
21 Ang muse, Yesus bot nehe buta ba Amulung angu, ini ila bendar Kapernaum mi. Uangu adana nehe Yahudi ang naung ived Lahatala tajaning, Yesus mida ihava hamulang mi nehe toang angu iavomung-iapahang. 22 Yesus iavomung-iapahang angu vengmee muse, ing emangpi mijonga, se naba ba Ana vengbanang elamal-etahi angu etatabit Lahatala Eomi ang ba Eamulung, bae Yahudi eguru agama ang naung edadenang niang.
23 Uangu adana, nehe setang apang taang di nu ue. Andi nehe Yahudi ehava hamulang angmi mida. Ang muse setang ba apang taang angu moring hula, 24 “He! Yesus, Nasaret Enehe! Aana naba ba ening metma ni adana! Aana hoa hula ning ening jasi ka? Ni ateing se Aaing ang ba hamulang kadulang turangmi Lahatala hula Aaing gahing hoa angu.”
25 Aarunge Yesus etatabit ateri senge vengbanang hula, “Taimang! Nehe angu eola.”
26 Ang muse setang angu ana nehe angu ajajoat etatabi, seng muse ana nehe angu eola. 27 Nehe toang rae ba hava hamulang omimi angu mijonga, e itaat mateng hula, “Ee! Anga naba e? Ana setang di iot nehe eola se, ini Eamulung. Anga na uhavede ba nu, Boma ang Emateng angu etatabi!”
28 Ang muse ini vengsarentat lamal mana kanap, ila propinsi Galilea eabang ang miipi.
Mutu Yesus Ana Petrus idat jangu, bot nehe toang rae ening mona
(Matius 8:14-17; Lukas 4:38-41)
29 Ini nehe Yahudi ehava hamulang angmi bale hela muse, Yesus Ana Simon bot Andrias ole ihava mi masot mida. Yakobus bot Yohanis ole di iamulung. 30 Simon idat jangu angu dilat tajoa tiang mana mi tia sehi. Base Yesus bot Egahing vala ang naung imampi hava mi mida muse, nehe vengbanang hula, “Memet angu ae dilat tajoa sehi.”
31 Ang muse, Yesus mida memet ang euling, atang angu vengpina aing bakung amihing muse, edilang tajoa angu mona tila. Ang muse memet angu kaluar hela ing vengbalenta.
32 Vedba muse, nehe ba dila, bot setang iapang taang ang naung nehe iat Yesus ebele hoa, banang ot ing ening mona. 33 Ang muse bendar nu enehe ang naung emangpi hoa hava eela angmi taing vengkumpul. 34 Nehe na-nut edilang angu emangpi Yesus Ana ening mona. Bot nehe ba setang iapang taang ang naung Ana aterit metma iola. Ana bae setang ang naung ing vengkilang iot mateng niang, se ini Ateing iila.
Bendar aabeung ang naung di Mutu Yesus lamal miiipi Lahatala Ehur aaung-hama metma nehe avomung-apahang
(Lukas 4:42-44)
35 Emikuaveng birkete sehise, Yesus Ana hava angumi tahit lamal hela. Ana ila mana taimang nu mi Lahatala oleve itat mateng. 36 Simon iimal tahi se, Yesus bae ue niang, ang muse ini ila Aing aalaping. 37 Ini Aing harak muse, At mateng vengbanang hula, “Nimang, nehe toang ae Aaing aalaping sehi.”
38 Aarunge Ana ihur ebalet hula, “Angu di aaung. Aarunge miaaung pi bendar aabeung taing vengjehi ang naung di mi ila hengi. Se Na hula Lahatala Ehur aaung-hama angu metma ing di iavomung-iapahang. Anguba Nekarajang.”
39 Seng ang muse, Ana bot lamal propinsi Galilea angu miiipi, Lahatala Ehur aaung-hama angu metma nehe avomung-apahang, ihava hamulang ang naung omimi. Bot setang di Ana aterit nehe ang naung iola.
Nehe dilang hapeburang aing ening nu Mutu Yesus ening mona
(Matius 8:1-4; Lukas 5:12-16)
40 Uangu adana, nehe dilang hapeburang aing ening nu, Mutu Yesus Ebele hoa. Ana Yesus apang aadang mi iakuku muding senge Yesus Abanang hula, “Nimang e, Na ateing hula, Aaing ba malekang noang moling, aulange nedilang anga ana bae ue niang, senge nehe ekang nejajahi ening ekang. Ba Aana jali hengi.”
41 Ang muse Yesus Ana omi metma nehe dilang hapeburang aing ening angu ejahi, Ana Atang taning metma aing pina senge at mateng hula, “Na vengjali! Aaungba aana mona!” 42 Mibaroti se, nehe angu edilang hapeburang angu bae ue niang, muse ana mona. 43 Yesus Ana nehe angu ot ila, bot at mateng evengani ening hula, 44 “Venganit aaung-aaung! Aana mona tila, aarunge aana ekang nehe iiba at mateng ekang! Aana malekang boma Musa eparenta tura angu eamulung. Base aana ila aava metma agama ebuang vala ang naung itubing, e ini ateing hula aana etatabit mona tila, e jedung. Seng ang se aana malekang sadaka baning hoa metma Lahatala Enang, e nehe ateing hula aana etatabit mona tila.”
45 Aarunge nehe angu kaluar hela muse, ana ila vengsarentat mana ang naung migoleng. Anguba nehe toang Yesus Aing aalaping hula Aing harak. Base Ana bendar mi bae Apang matubing jadi niang. Ana mana taimang aabang eola ba mi mihi, aarunge taang-taang mi nehe harut ebele hoa hula Aing harak hengi.
* 1:1 Hur ꞌLahatala Oalꞌ bae hurak emamolo tura e angu mi hurak toang niang. 1:2 Maleakhi 3:1 1:3 Yesaya 40:3 1:4-6 2 Raja-Raja 1:8 1:7 Yunani ehur emamolo hurak hula, “Tout hela esapatu sar ang ba aahi di naing bae at hama niang.” Evengbanang hula, Yohanis angu ana ava ening alolang-alolang, mang metma Mutu Yesus Emalea ening di, aing bae malea angu at hama niang. 1:11 Kejadian 22:2; Mazmur 2:7; Yesaya 42:1; Matius 3:17; 12:18; Markus 9:7; Lukas 3:22 1:15 Matius 3:2 1:21 Nehe Yahudi eved Lahatala tajaning, ived miari, bae karajang niang, ini vengbanang hula ꞌSabatꞌ. 1:22 Matius 7:28-29 1:39 Matius 4:23; 9:35 1:44 Imamat 14:1-32