5
Nehe ba setang toang apang taang Mutu Yesus aing ening mona
(Matius 8:28-34; Lukas 8:26-39)
Yesus bot Egahing vala ang naung ila dano Galilea edenaveng angmi. Bir angu ene Gerasa. 2-6 Ang mi angu, nehe mehal nu setang apang taang ana vengbuning. Ana baring aabang ba mi aabeta. Kua-jala ana edurat basiar lamal aabu goleng moring bae alolang niang. Bot ana var metma eboa angu buet ening aibat. Aarunge ana etatabit daeri. Rante oola ba pake di nehe iiba bae aing partat jadi niang. Nehe ia atang partat bae alolang niang, aarunge ana asinga bot langi oola ia mi angu ana abora. Ana etatabit daeri angu ebele nehe nu bae aing tahang jadi niang.
Yesus bot Egahing vala ang naung imampi je taang hela aadang taata mi tahi muse, nehe buning angu ola mi uuling iateing. Ang muse ana bihit Yesus apang aadang mi iakuku muding. 7-8 Nehe angu apang ang ateing aulang muse, Yesus mateng hula, “He! Setang jasi! Aana nehe anga eola!”
Ang muse nehe angu moring etatabit hula, “He! Aana naba ba ening metma na dana? Na ateing Aaing ba Yesus, Lahatala ba mikavasa angu Oal. Na banang e, Aana ekang na jasing ekang.”
Ang muse Yesus adang taaning hula, “Eene nuba?”
Nehe angu ebalet hula, “Naing nene Legion, se ning anga toang amarat ribu iising alehil emenghula tentara ibatalyon angu edadenang.”
10 Ang muse setang ang naung nehe angu ot Yesus abanang e, iot ekang mana angu eola ekang.
11 Mana angu bae eola niang nehe ue be jaga. Be etoang angu oma ribu aaru ini ue dol ehahama mi lamal naadang sehi. 12 Ang muse setang ang naung Yesus abanang hula, “Ning gahing e, ni ila be ang naung ing maso.”
13 Vengmeet ibanang aulang muse Yesus vengjali. Ang muse setang ang naung bihit nehe angu eola e, ila be ang naung ing maso. Ang muse be ang naung bihit tibarakang-temarait ila bir haduring mi hela jar omimi aaminat miosing.
14 Ateing aulang muse nehe ba be jajaga ang naung iuangmarit etatabi. Ang muse ini bihit ila vengbanang aabang angmi angu miiipi. Ang muse nehe toang rae hoa euling. 15 Ini hoa Yesus Aing harak bot ini uuling se, nehe ba setang apang taang ang di ue mihi sehi. Ana mona tila bot ana pakiang di pake tila. Ateing aulang muse ing emangpi iuangmarit etatabi, se ini ateing hula nuba ba setang angu aterit nehe angu eola. Se aing angu etatabit nehe nu bae at hama niang. 16 Ang muse ing emangpi ila vengmaring mana kanap hula, ini uuling ieng taang ateing se, nehe buning angu mona tila bot be ang naung aaminat miosing. 17 Ang muse aabang angmi angu enehe ang naung hoa Yesus abanang e mana angu eola.
18 Yesus hula je taang mida se, nehe ba vede setang apang taang angu hoa abanang andi Amulung.
19 Aarunge Yesus eea. Ana vengbanang hula, “Miaaung aana ila naba ba Lahatala ening ma enang angu metma eenehe ang naung iat mateng. Bot hula Lahatala etatabit omi metma eejahi.”
20 Ang muse nehe angu ila mana nu ebendar arinu ini biasat vengbanang hula, ꞌDekapolisꞌ. Angu migoleng naba ba Yesus ening ma enang angu ana vengsarenta. Nehe toang rae ba esarenta ang vengmee angu ini mijongat etatabi e hula, “Etabi o!”
Yairus oal Mutu Yesus ening bale aabeta, bot nehe jangu nu dilang ve horung aing ening Mutu Yesus Ekondo dei
(Matius 9:18-26; Lukas 8:40-56)
21 Ang muse Yesus iimal aalarit ila dano edenaveng angmi. Ini je taang hela muse, nehe toang hoa Aing vengkumpul. 22 Angmi angu nehe nu ene Yairus. Aing angu aabang angmi nehe Yahudi ehava hamulang ekapala. Uuling Yesus ateing muse ana apang aadang mi iakuku muding 23 e, banang hula, “Nimang ee! Noal jangu kaneng nu etung arinu belta aalu moe dilat aamina heng. Aana ila aing ening mona hengi.”*
24 Ang muse Yesus eamulung Yairus ehava mi ila.
Aarunge ini lamal muse nehe toang amulung e, asekat tene bajaul.
25 Nehe toang angu ehahama mi, nehe jangu nu euuru hoa eseng vengniang, tung arinu belta aalu tila. 26 Epasaka emangpi ana metma ilavali ang naung ing sevat miosing. Aarunge iiba bae aing ening mona niang e, edilang angu mang taang maveng. 27-29 Nehe jangu angu Yesus Esarenta vengmee toang iila angu ebele ana nehe toang angu iasekat ila Yesus Amota oa angmi. Ana omimi vengpikir hula, “Ekondo ang ba dei di se, na malekang mona.”
Ana Yesus Ekondo angu dei muse, mibaroti se edilang ve horung angu bae ue niang iila. Rasa se ana etatabit mona tila. 30 Uangu veng Yesus Ava rasa se, Edaeri omimi angu ue kaluar hela. Ana bale tahit nehe toang angu iuling, senge Ana iadang taaning hula, “Nuba ba Nekondo dei angu?”
31 Egahing vala ang naung Ebalet hula, “Nimang! Eena ateing hengi. Nehe toang alang anga, senge Aana taaning hula, ꞌNuba ba Nekondo ang dei angu?ꞌ ”
32 Aarunge Yesus iuling bae alolang niang e ateing hula nuba ba vede Aing dei angu. 33 Vengmeet Yesus taaning aulang muse nehe jangu angu uangmarit etatabi. Ang muse ana Yesus apang aadang mi iakuku muding bot mangakut vengbanang hula, “Nimang! Naing ba Eekondo ang dei angu.”
34 Ang muse Yesus ebalet vengbanang hula, “Aana etatabit oomi metma Naing vengaanamang ebele, aana mona tila, base aaungba tahit aanamang ila.”
35 Yesus mateng sehise nehe nu Yairus ehava mi hoa vengbanang hula, “Ajee! Oal jangu kaneng benang aamina tila. Base ekang Nimang Guru Aing ening susa ekang. Aaungba ekang Ot ila ekang.”
36 Aarunge Yesus bae nehe angu emateng ang venghele niang. Ana Yairus at mateng hula, “Aaing ekang uuangmari ekang. Oomi metma Lahatala ang ba vengaanamang.” 37 Ang muse Yesus Ana lamal, Egahing vala aabeung ang naung Ana iot ekang amulung ekang. Aarunge Petrus, Yakobus bot ekaku Yohanis Ana iot amulung, ang muse ini lamal. 38 Ila Yairus ehava mi, ini uuling se nehe toang rae angu iiba ue balenta sehi, bot vengmee se iiba baut nataanang. 39 Yesus mida hava omimi, senge Ana taaning hula, “Etatalang ba iini etatabit oorang bot baut nataanang alang anga? Val anga bae aamina niang. Ana mang tiat udu.”
40 Ini vengmeet Yesus Emateng aulang ebele, ing emangpi Aing vengpalelat ejajahi ening.
Ang muse Ana iot kaluar hela. Val ang imang, iva bot Egahing vala inang tue angu Ana iaru, e ini val angu ekamar mi maso. 41 Ang muse Yesus Ana val angu atang vengpina senge Ana Aram ehur mi at mateng hula, “Talita kum!” Evengbanang hula, “Noal! Aaungba tahi!”
42-43 Mibaroti se val angu tahit lamal. Ang muse Yesus Ana iva aing gahing hula, “Aaungba val anga mod ma enang ana adang.”
Naba ba jadi angu ateing muse, nehe emangpi mijongat etatabi. Aarunge Yesus etatabit ihapat vengbanang hula, “Iini ekang nehe iiba at mateng hula, Na aing ening bale aabeta tila ekang.”
* 5:23 Surat hamulang Yunani ehur mi vengbanang se hula, “Nimang hoa e Aatang metma aing taang mea, e ana mona bot aabeta.” Angmo mi, “Banang atang metma aing taang mea” evengbanang hula, “Aing ening mona”. Val jangu etung angu, Yunani ehur metma hur kokal 42 mi hurak.