थिस्सलुनीकियों नगर के माणसां ताहीं प्रेरित पौलुस की दुसरी चिट्ठी
जानकारी
मसीह का दुबारा आण तै जुड़ी उळझन के कारण थिस्सलुनीकियों की कलीसिया म्ह गड़बड़ी के हालात बणे होए थे। थिस्सलुनीकियों के नाम पौलुस प्रेरित की दुसरी चिट्ठी इस बिश्वास पै के प्रभु के आण का दिन पैहल्या आ लिया सै। विचार करण खात्तर लिखी गई सै। पौलुस यो बतान्दे होए इस विचार नै सुधारै सै, के मसीह के आण तै पैहल्या दुष्टता अर बुराई अपणी हद पार कर जावैगी। यो रहस्यमय राजा के अधीन म्ह होगा जिसनै “पाप का माणस मतलब नाश का बेट्टा” कह्या ग्या सै, जो मसीह का बिरोध करैगा। प्रेरित याड़ै इस जरूरत पै जोर देवै सै, के सारे दुखां अर कष्टां का होन्दे होए भी उसके पाठकां नै अपणे बिश्वास म्ह मजबूती तै बणे रहणा चाहिए, अपणी कमाई खात्तर काम करदे रहणा चाहिए, जिस तरियां पौलुस अर उसके साथी करै थे, अर भलाई करण म्ह लाग्गे रहणा चाहिए।
रूप-रेखा
जानकारी 1:1,2
बड़ाई अर तारीफ 1:3-12
मसीह के दुबारा आण तै जुड़ी शिक्षा 2:1-17
मसीह चाल-चलण तै जुड़े उपदेश 3:1-15
समापन 3:16-18
1
नमस्कार
1 या चिट्ठी हम पौलुस, सिलवानुस अर तीमुथियुस की ओड़ तै थिस्सलुनीकियों नगर की कलीसिया के बिश्वासियाँ ताहीं लिखां सां, जो म्हारै पिता परमेसवर अर प्रभु यीशु मसीह के सै।
2 म्हारै पिता परमेसवर अर प्रभु यीशु मसीह की ओड़ तै थमनै अनुग्रह अर शान्ति मिलदी रहवै।
न्याय का दिन
3 हे बिश्वासी भाईयो, थारे बारै म्ह हमनै हरेक बखत परमेसवर का धन्यवाद करणा चाहिये, अर यो सही भी सै ज्यांतै के थारा बिश्वास यीशु मसीह म्ह घणा बढ़दा जावै सै, अर थारा एक-दुसरे कै खात्तर आप्पस म्ह प्यार घणाए बढ़ता जावै।
4 इस करकै हम परमेसवर की कलीसिया के बिश्वासियाँ के बारै म्ह गर्व करा सां, के जितने थम इम्तिहान अर मुसीबतां तै गुजरो सों, थम उननै धीरज तै सहण लागरे सों, अर थम फेर भी यीशु मसीह पै बिश्वास राक्खों सों।
5 अर परमेसवर इन दुखां का इस्तमाल अपणे न्याय ताहीं दिखाण अर थारे ताहीं अपणे राज्य के लायक बणाण खात्तर करैगा, जिस खात्तर थम दुख भी ठाओ सो।
6 क्यूँके परमेसवर हमेशा सही न्याय करै सै, ताके जो थमनै दुख देवैं सै, उननै बदले म्ह वो दुख देवै।
7 अर थमनै वो इस दुख तै राहत देवैगा, जो थम इब उठाण लागरे सों, अर म्हारे ताहीं भी राहत दे, यो उस बखत होगा जिब प्रभु यीशु अपणे सामर्थी सुर्गदूत्तां कै गैल, धधकती होई आग म्ह सुर्ग तै आवैगा।
8 अर जो परमेसवर नै न्ही पिच्छाणदे, अर जो म्हारे प्रभु यीशु कै बारें म्ह सुसमाचार ताहीं न्ही मानते उनतै वो बदला लेवैगा।
9 वे परमेसवर तै हमेशा खात्तर अलग हो जावैंगे अर उसकी महिमामय शक्ति म्ह शामिल न्ही हो पावैंगें अर वे अनन्त विनाश का दण्ड पावैंगें।
10 यो उस दिन होवैगा, जिब प्रभु यीशु मसीह बोहड़कै आवैगा, ताके वो उन माणसां तै महिमा पावै जो उसके कहलावै सै, उन माणसां तै सम्मानित करया जावैगा जो उसपै बिश्वास करै सै, अर उस दिन थम भी उनकी तारीफ करण आळा म्ह तै एक होओगे, क्यूँके थमनै उसपै बिश्वास करा, जो हमनै थारे ताहीं बताया।
11 ज्यांतै हम सारी हाण थारे बारै म्ह प्रार्थना भी करा सां, के म्हारा परमेसवर थारे ताहीं इसा करण म्ह काबिल बणावैगा, जिसकै खात्तर उसनै म्हारे ताहीं बुलाया सै, अर वो थारी हरेक भली इच्छा नै सामर्थी रूप तै पूरा करै, अर हर उस काम नै पूरा करा जो थम बिश्वास तै करो सों।
12 इस तरियां म्हारे प्रभु यीशु मसीह का नाम थारे जरिये महिमा पावैगा, यो सब कुछ म्हारे परमेसवर अर प्रभु यीशु मसीह के अनुग्रह तै होवैगा।