6
1 Hamangkhung-aphuii rog shii gethek ro ò blia, chiihphado, gu nathek shii khung phro hanyie è Hamangkhung-aphuii ro bushun mua maphi pho shiine amua yi rabo:
2 Hamangkhung-aphuii è nyie yao pha ji ne nuii bo:
“Nathek shii harohang rone doh yi pha guro ishak thog mage shii.”
Gu na shii yoi phi;
Na shii ragia rek pha guro ishak thog mage shii,
“Gu na shii nong phi ro.”
Yoi bo! Hì ne Hamangkhung-aphuii ro harohang phi pha ishak ro; sudoh ne ragia rey pha inai ro!
3 Gathek ne hanyie shii gethek blia shii ichiig doh yi pha ayang ro, jiè gethek ne hanyie lumuii shii magungde dag-riak pha abidiang ro.
4 Ji phachiang shii, zab shii gathek è rek pha ji shii diigcheothek, thuathek, diigthek jum è zud srane, gathek ro zab blia shii ne Hamangkhung-aphuii ro khiao rone doh yi.
5 Gathek shii phatheg hà zuang ne, chiih-è makhakriing rek; chiih-è gathek è amen pha chiih-è michie de achie pha huak ne blia rek ro.
6 Gathek ro gang è, khani è, jum è, bushun è—Ragung So è, gathek ro izai miie è,
7 gathek ro izai pha mua è, chiih-è Hamangkhung-aphuii pha blu è gathek ne guithek shii Hamangkhung-aphuii ro khiao rone doh yi. Jo pha nane guithek shii ragia rek pha migiang nyimanyi um pha duiine gathek shii ne giangthek um ro.
8 Gathek ne ilab phi chiih-è makhak-riing ro; gathek ne makhak-riing rek chiih-è chiong rek. Gathek shiine khlampho duiine makhak-riing phi, jimagunde gathek ne izai yao;
9 athiegpho duiine, jimagunde gathek ne zab thieg; gathek ne iy dun pha duiine ro, jishii, nathek riig gathek ne isieng ro. Gathek shii lago phi, jimagunde gathek ne a-ua ro;
10 Duhug thog yi magungde, gathek ne idang lised ro; gathek shii dusho riig magungde, jishii gathek è bajo branthek shii bohkhoh rab phi; gathek shii nyie oi pha doh magungde, thuh gathek shii ne zab nuruii um ro.
11 Khorinth pha ijakthek! Gathek nathek shii miang è yao; gathek ne gathek ro lubuthek hong ro.
12 Gathek ne hanyie è nathek shii lubuthek bin pha ji asi ro; hì ne nathek ro, hanyie è nawaithek lubuthek gathek bin pha ji ro.
13 Thuh shii nathek ne gui anithek duiine gu nathek shii yao: gathek ro nathek shii um pha ò thanthek ji gathek shii doh yi bo. Nathek ro lubuthek de boh hong bo!
Migi-arekpho ro bangchiie rekpho shii phriie
14 Migi-arekpho rog shii ò blia rek pha abidiang rabo, hì ne arek mua phro. Nyiekhi-è izai nane biidiie ne ijak rey mage phlei? Nyiekhi-èrek ne isang nane igiia ne ò rai mage phlei?
15 Nyiekhi-è Masi nane Ibuii ne nuii rai mage phlei? Migipho nane migi-arekpho ne nyie ò rek lei?
16 Nyiekhi-è Hamangkhung-aphuii ro Jewthek misiahò nane migi-arekpho ro jangbang ne nuii mage phlei? Chiih-è gethek ne isieng Hamangkhung-aphuii pha Jewthek misiahò ro! Hamangkhung-aphuii awai è yao pha duiine,
“Gu ne gui bran rog shii gui hò rab pha ro
chiih-è ithek duchoi shii rai pha ro;
Gune ithek ro Hamangkhung-aphuii rey ruii phro,
chiih-è ithek ne guro bran rey ruii phro.”
17 Chiih-è Ithong è yao,
“Nathek ne ithek shii thoh chid
chiih-è nawaithek ne ithek è yo rek bo.
Nyie zea ji rog shii arek rabo,
chiih-è gu nathek shii nuii ruii phro.
18 Gune nathek ro aphuii rey ruii phro,
chiih-è nathek ne guro dufuii nane dimi rey ruii phro,
Bohblu Ithong è yao.”