MARG
Ro Muawie
Yaophi
Marg chaig pha jigigam hì ne Hamangkhung-aphuii pha Dufuii Isu pha Muawie ji zey ne um ro. Isu ne riichai um ne bliathek rek pha rone zey pha jigigam ro. Ai riichai jine ai miyaogamthek yua pha jithek è thieg ruii phrone zey ne um ro. Ai blu è ibuii khia pha jithek ro, chiih-è layogthek khung phi pha è thieg dun rone zey ro. Isu è yao, Ai ne Hamangkhung-aphuii ro Dufuii ro, chiih-è ai ne branthek ro layog ruang rek phi pha wuii ro. Jithek yao pha jigigam zey ne um ro.
Marg ne Isu è bliathek rek pha ji zey dang ne ruii phi. Jon khowo phi pha ji sieng ne Hamangkhung-aphuii pha Mua ji yao ne khowo phi ne rai pha jigigam chiih-è Isu shii ibuii è chuajan noh pha miyao ji ìujia zey srane sia ne blia rek pha jigigamthek zey ne um ro. Inai bajo re pha idoh è ai samoythek ne bajo wie gua dun. Jishii, aishii mak rek pho ne bajo lijieg dun pha jigigam zey ne um ro. Idoh pha jigigam ne Isu è sohnyiak shii diigchiao rek ne sieng marui pha jigigam ji zey ne um ro.
Jipha diigchiao ne Isu è bai shii zun ne iy dun pha ji zey ne um ro. Chiih-è, ai ne chai hòi din pha ji de zey ne um ro Marg
Iliing shii um pha ji
Muawie jao pha (1:1-13)
Isu ne Galili hà hong ne blia rek (1:14—9:50)
Galili re-è Jerusalem (10:1-52)
Idohhè pha habda nane Jerusalem moe shii (11:1—15:47)
Isu hòi din (16:1-8)
Khia pha nane Hamangkhung hà dun pha hòi din (16:9-20)
1
Khowo phi pha Jon è yua
(Mth 3:1-12; Lug 3:1-18; Jon 1:19-28)
1 Hì pha Mua Wie ne Hamangkhung-aphuii pha Dufuii Isu Masi chiang ro.
2 Hì ne Aijaya chaig è zey pha ji duiine jao ne re ramuii ro:
“Hamangkhung-aphuii è yao, naro lumuii hong yi pha,
‘gune guro muapho na è ibi thoh ruii phro.’
3 Bijiujia ne balimuang hà ziak ne rai ro,
Ithong wuii pha lumuii ne khriig rab ne rai iang bo,
ai lua pha lumuii ne miang rab iang bo!”
4 Chiih-è Jon ne balimuang hà khia, khowo phi ne yua. Ai è branthek shii yao, “Nawaithek layogthek re-è idoh khid srane khowo yi mage bo,” “chiih-è Hamangkhung-aphuii è nathek ro layog shii khung phi ruii phro.”
5 Judea pho thek chiih-è zab Jerusalem pha rajan pho thek de Jon shii riig pha chiih-è ai miyao yoi pha wuii thog. Hanyie è layog arek sha pha rone yao pho shii ai è Jordan kho shii khowo phi.
6 Jon ne ùd pha iman è rab pha yungthek guii, ai rinyie shii ne shukhug pha rathang ring ro. Ai ne muroma chiih-è jabiing chumud chie ne rai ro.
7 Jon è branthek shii yao, gu è de bajo boh rek pha gai jia wuiiramuii ro. Ai ne bajoboh ro, gu ne airo khiao duiine bam ne ai lakhia ithang de athan mua phi ruii phro.
8 Gu ne nathek shii kho è khowo phi bie, jishii, ai ne nathek shii Hamangkhung-aphuii ro Ragung So è khowo phi ruii phro.
Khowo nane Isu shii chuajan
(Mth 3:13—4:11; Lug 3:21-22; 4:1-13)
9 Achia dang pha idoh shii, Isu ne Nazareth beng pha ithua è Galili thiig hà wuii thog srane Jordan kho shii Jon wad re-è khowo yi.
10 Isu è khowo yi srane fuang khia mage shii, hamangkhung ne hong pha doh, chiih-è, Ragung ne fuii pharo duiine thazam aishii khey thog.
11 Chiih-è hamangkhung è goh jia yao ruii, “Na ne guro bushun pha Dufuii ro, na shii gu ne bajo miie ro.”
12 Jipha Hamangkhung-aphuii pha Ragung è Isu shii balimuang hà noh dun.
13 Thiisa hà aishii ne, Sakhathong è inai sawi chuajan ne rai dun ro. Ai ne balimuang pha miiramthek rog shii rai ne de, jishii hamangkhliie è aishii nong phi ro.
Ù uapho wi shii Isu è ho
(Mth 4:12-22; Lug 4:14-15; 5:1-11)
14 Jon zum ne phatheg chab pha iidohhè, Isu ne Galili thiig hà dun thog din ro, thiisa hà ai ne Hamangkhung-aphuii pha Mua Wie ji yao ne rai:
15 “Hamangkhung-aphuii pha Sajathua ishak ji thog sha ruii ro, ji-è, nathek ne layog arek sha pha thadoh khid ne Mua Wie hì shii migi rek mage bo.”
16 Ji è yao srane Isu è Galili beng pha khabang iring hà wuii thog mage shii, Isu è ù ua pha nyi shii doh. Simon chiih-è ikhuii Andrew ne chiug mua ne rai pha doh ro.
17 Isu è isa shii yao, “Thawuii ne gu rog shii luagieng bo, chiih-è nasa shii sudoh è thiwing branthek shii zum pha yua phi pha ro.”
18 Khthiie ithek ne awaithek ro chiug thoh srane ai rog shii luagieng.
19 Ìujia thithe hà lua mage shii Isu è Zebedi pha dufuii Jems chiih-è Jon ne awai sa run shii chiug mua pha saro ne rai iang pha doh ruii phro.
20 Isu è isa shii doh ne ho mage shii, isa de awai sa aphuii Zebedi shii run lakhung pha branthek rog shii thoh marui ne Isu rog shii luagieng dun.
Bran jia rog shii ne ibuii ragung um
(Lug 4:31-37)
21 Isu nane samoythek ne Khaphernaum beng pha thawun hà wuii dun. Chiihphado thimiang Jewthek Thung pha Inai shii, Isu ne Misiahò hà wuii srane ithek shii yua.
22 Ithek ne Isu muyua ji nuii ne zab wiengphleg dun, nyieliieshii, Isu ne Iphey yua pha masdo duiine asi pha riichai um ne yua dun ro.
23 Hamblo shii awie pha ragung è jiang pha jia è Hamangkhung-aphuii ro Misiahò shii wuii thog srane ziak ne yao,
24 “Na ne gu rog shii nyie blia um lei? Nazareth pha Isu, na ne gu shii diig phi pha wuii ne bey? Na ne hanyie lei? Ji gune thieg muii ro, nane Hamangkhung-aphuii pha So muapho ro.”
25 Ji-è rek mage shii, Isu è giung ne yao, “Airo pha bucho è fuang khia mage bo!”
26 Ji è yao mage shii, ibuii ragung ne sham ne khrif srane ziak ne ji pha bucho è fuang khia dun ro.
27 Wiengphleg pha blia rek mage ne ithek ne awaithek chung yao rai, Hì pha muyua ne nyie lei? Hì ne miyao iwo yua ne bey? Aishii ne riichai um ara ro, ibuii ragungthek de ai miyao nuii dun ro.
28 Isu è rek pha blia miyao jine ne rib jia shii Galili thiig hà yoi thog dun ro.
Isu è bajothek shii gang phi
(Mth 8:14-17; Lug 4:38-41)
29 Isu ne Jems chiih-è Jon, chiih-è gai samoythek rog shii Jewthek ro Jewthek misiahò thoh srane Simon chiih-è Andrew hò hà wuii thog dun.
30 Thiisa hà Simon ro khiing ne hakhang zia ne rad muii. Isu è thiichiih shii thog dang mage shii ithek è aishii yao.
31 Isu ne ai moe shii wuii srane aishii wad è sasey è chaing srane riu yi. Ji è rek mage shii hakhang zia pha ji ne gang re dun ro. Chiihphado ai ne ithek shii chie niing pha rab ne phi.
32 Jipha habjuang hasiang yem ched pha idoh shii ithek è radpho shii chiih-è ibuiithek ragung è jiang pho thek shii Isu moe hà noh ne wuii thog ruii.
33 Chiih-è, thiigpho de zab habin moe shii wuii thog ne riig.
34 Thiichiih shii Isu è ithek shii yoyo pha miiriie è rad pho thek shii gang rek phi, chiih-è, ibuiithek ragung shii de zab khia phi. Isu è ibuiithek ragung thek shii aro yi ro, nyieliieshii ibuii ragungthek ne Isu ne hanyieliie shii thiegjong ro.
Isu è Galili thiig hà miyao yua
(Lug 4:42-44)
35 Jipha thimiang pha hamiang riang shii Isu ne sieng srane liijiing ithua hà sia pha wuii dun ro.
36 Ji è wuii pha idoh shii, Simon chiih-è gaithek de aishii so pha wuii dun. Ithek è ai thog mage shii,
37 ithek è aishii yao, ithek ne na shii sow ramuii ro.
38 Ji è yao magunde, Isu è ithek shii yao din, “Gethek ne zab pha gai thiigthek hà de wuii chid phro. Chiih-è gune è rek ne yua chid phro, nyieliie shii, gune ichiih shii hì è rek pha ji wuii ro.”
39 Ji-è, Isu ne Galili pha ithua hà lua srane Jewthek ro Jewthek misiahò shii yua ne zab pha ibuiithek shii de khia phi.
Bran jia shii gang phi
(Mth 8:1-4; Lug 5:12-16)
40 Awiedang pha hìa è rad pha jia yi Isu moe shii wuii thog ne yao, na è wie rek pha now arone, hì pha hìa riie pha ji ne wie nyarek mua phi.
41 Isu è bushun now ne awai wad è aishii khoh srane yao, “Gune wie rek phi pha yang muii ro.” Ji-è, Isu è yao, wie re mage bo,
42 Ji è yao mage shii ji pha hìa ne wie redun.
43 Ji è rek pha idoh shii Isu è aishii gang è yao srane thoh ge:
44 Chiih-è hì pha blia rek phi pha ji ne hanyie shii de ayao rabo. Ji è rek pha chiang ne chiih-è Moses è phi pha jigigam duiine khlem yi srane miiriie ji wie re pha chiang è phabi moe shii wuii ne khlem jithek zid mage bo. Ji è rek arone, ithek è na miiriie ne wie redun rone nyathieg ruii phro.
45 Isu è ji è yao magunde, ithek ji yao rone yao muii. Ji è rek mage shii ithek ne Isu moe shii bajo wuii thog, ji-è, ai ne ithek ro thiig jishii awuii mua din pha re dun. Ji è re mage ne Isu ne liijiing um pha ithua hà ug ne rai dun ro. Ji hà ug ne rai magunde, ithek ne athodang pha ai moe shii wuii thog.