12
Anutuna naaquqara andeeqara maraquna oosana oosana dadaaqiranara qimannimidanoo.
1 Doo maqee qinee Anutuna naaquqara andeeqara maraquna nimimari ainainnara qimannimianaura. Qini qikaqaafasaauqa qinee minara anoona ufa iriaqee qidaqa qimannimidaqa.
2 Ooqai innee aamina maru kamuqoo manda fasiqa fannoo inni rarisameeqee sia ufa qimaru tumunannai auqira afaannunnai ubeekee marufaqa mina ufa ameemaanai fimariqau.
3 Doo maqee innee maanara irimariafanoo Anutuna maraquna fannoo rakisimari fasiqafa sia amana Yisuna aqurarara ufa amiannoo kafaa mina dinni kai Yisufa karaambaiqa maridanoo fee qimariasa Anutuna naaquqara andeeqara maraquna fannoo misa dadaaqinara miqi qidaqa.
4 Oosana oosana innaarunaindaraa ainaina faiqí anaasee dadaaqianifeera nimirafa marifanoo moodaa maraquna fannoo kai aiqama mi aiqama ainainna maqasaa fasiqa anaasee nimidanoo.
5 Maasa Anutuna ainainirafa oosana oosana ainainirafa maridanoo moodaa karaambaiqa ainainammidaqa.
6 Anutuna ufara suqimariasa dadaaqirafa oosana oosana maridanoo moodaa Anutufa kai aiqama aadu aadu akoofasaikirana faiqí anaasee nimifaqa minannai quandaki narí dadaaqi narí dadaaqiaqeera.
7 Anutufa Yisuna ufa irimariasaki aiqama fasiqa anaasee naadu naadu narí maraquna koorooianifee afeekana nimufaqa quandaki minannai narí dadaaqi narí dadaaqiaqeera nimidanoo.
8 Anutuna maraquna fannoo moo fasiqa irirana faqaana ufa qimannimimarina amidanoo kafaa mi maraqunafa moo fasiqa aiqama ainainara irirana amidanoo.
9 Mi moodaa maraqunafa kai Yisuna mandaaqarana moo fasiqa amidanoo, moo fasiqa mi maraqunafa faiqí anaasee aurirana taikannisara afeeka amidanoo.
10 Anutuna maraquna fannoo faiqí sia amana auquaqaa ira ainaina afeeka moo fasiqa amifanoo mi fasiqafa afeeka ainaina auqaidanoo, moo fasiqa Anutuna afeeka amifanoo Anutuna ufa afeekaikamandee qimannimidanoo. Mi maraqunafa moo fasiqa afeeka amifanoo maraquna nimimariasa faqa moo unna qira maraquna nimimarina faqa mi fasiqafa kai rainasee nindafaidanoo. Mi maraqunafa moo fasiqa afeeka amifanoo aanaamura ufakiqari sia narí iri maru ufanakiqari amaana maqaki ufa qimannimidanoo. Mi maraqunafa kai faiqí moo afeekaikamma amifanoo aanaamura ufakiqari narí sia iri mari ufanakiqari faiqí anaasee qimannimisaifanoo moo fasiqa fannoo sia mi ufana oosana irirainni maraquna fannoo kai mina qimamifanoo mifa indee kai idanoo mina oosana qimannimidanoo.
11 Mi oosana oosana ainainna nimimarifa moodaa maraquna kai maridanoo. Mifa narí kai narí aidiramau raina raina mandaida aadu aadu dadaaqira akoofasaikirana nimidanoo.
Maasa Yisuna atiki marunausara qidanoo.
12 Asauku mundirana afaaqa moodaara foora maridanoo mina atiuqa moomoo maridaqa afaaqa sia rainanoo maridanoo moodaa maridanoo.
13 Miqikai masee maasa aiqama Yuda maqannaasa faqa aanaamuru moomoo maqannaa mariasa faqa karabusaki ainainimariasa faqa iduki mariasa faqa maasa aiqama moodaa maraqunannai nammari marasee moomoo atiuqa moodaana apataika kai iqa mariasa Yisuna apata mariafanoo Anutufa moodaa maraquna nammariara foora nimifaqa naunnanara miqidaqa.
14 Faiqí moo adaka sia muduka maridanoo moomoo afaaqa ootupanoo maridanoo.
15 Mi fasiqana aiku fannoo qinoo sia qinee asauku mariaqaana minara qinee sia maa fasiqana afaaqau maridau. Qinee Pauroosa minara maaqi qiqa kuqaa aiku fannoo sia asauku kinoo sia mi ufana qinnanannai moona afaaqaikianau kaqi mi fasiqana afaaqa mariannoo.
16 Mi fasiqana aaqoo fannoo qinoo qinee sia maa fasiqana afu marunnanara sia mina afaaqau maridau. Qinee Pauroosa minara maaqi qidaqa kaqi mi aaqoofa sia afukinoo sia mi ufana qinnanannai moona afaaqai kiannoo kaqi mi fasiqana afaaqa mariannoo, sia sia miqiannoo.
17 Mi fasiqana aiqama afaaqa afu kai marinanoofau naqi fee mandee ufa iriannoo fee. Mina afaaqa aaqoo kai marinanoofau naqi fee mandee udiraannoo fee.
18 Anutufa kai narí iriseenoo narí aidiranannai faiqí afaaqa aiqama ainaina afaaqa quqaqoofa maridanoo.
19 Aiqama ainaina moodaa ainaina kai marinanoofau sia faiqí afaaqa marini.
20 Doo miqinoo moomoo afaaqa atiuqa moodaa afaaqara foora ootupanoo maridanoo.
21 Faiqí afaaqaindaraa afu fannoo sia amana asaukuara anee fua sia qini dadaaqi marianna ainainafa mariananoo, sia qiannoo. Kafaa akiqa fannoo sia aikuara anee fua sia qini dadaaqi marianna ainainafa mariananoo. Sia miqi qiannoo.
22 Maasa qeeqa qifaaqa ati dauni nidafidanoo ummooquki mari atiuqara fifau ainainee qiananoo sia marinaqa naqi fee ianauree.
23 Maasa qeeqa qifaaqa atiuqa ureeqara atiuqee qimariana maasa misasaa firaaqoo amiqimmandee misasaa rakisidaqa. Nifu qafaafaqa nisaurimaria atiuqa maasa amiqimmandee rakisidaqa qamunnannai ititaidaqa.
24 Nifu qafaafanoo nidi mari atisa sia amiqimmandee ititaidaqa kai akooqoo maridanoo. Anutufa kai narí iriranannai maasa qifaaqasaa atiuqa maaqimasee ootupanau, Ureeqara atiuqa uriqarara rakisirana maraanee qimasee ootupanau.
25 Miqi marianara sia maasa qifaaqa rainarafa maridanoo aiqama aadu aadu qifaaqa ati fannoo nariara nariara amanamana kai amuqusidanoo narinni narinni rakisidanoo.
26 Moodaa qifaaqa ati didafifanoo aiqama qifaaqa didafidanoo, kafaa mina dinni moodaa qifaaqa amooqifanoo aiqama qifaaqa asasidanoo.
27 Qinee Pauroosa inni Koorinti maqannaara qidaqa innee Yisuna ufara suqimariasa aiqama asauku mundirana afaaqara foora mariafaqa aiqama mina afaaqasaa afaaqa fannoo narí amaaqa narí amaaqaki kai mariafanoo.
28 Innee Yisuna ufa iridaqa nuasa suqiranaki Anutufa miqikai inoo inni faiqí anaasee mareeqeenoo maaqimmasee quqannisoofaqa mariafanoo. Anutufa Yisufa niqiqoo fasiqausa inniki uriqararausaikinau, miqooqari misa ureeqarausa Anutuna ufa faiqí anaasee maqusa maqusa qimannimimarusa faqa inniki quqanau. Doo misa ureeqarausa ufasaa rakisirausa maqusaki qimannimimarusa Anutufa inniki quqanau. Kafaa miqooqari faiqí anaasee oosana oosana ainainirausa quqanau.
Akaqausa faiqí sia amana auquaqaa ira ainaina auqimariasa quqanau.
Akaqausa aurirausa andeeqee marusa quqanau.
Akaqausa faiqí anaasee narí dadaaqi narí dadaaqi marusa quqanau.
Akaqausa ufa suqirausasaa amiqimmandee rakisirausa quqanau.
Akaqausa aanaamuru ufakiqari narí sia irimaru ufanakiqari Yisuna ufa suqiranaki qimannimimarusa Anutufa quqanau.
29 Innikiqari sia aiqamausa Yisufa niqiqoo fasiqausa mariafanoo, sia aiqamausa maqusa maqusa qimannimiqanusa maridaqa. Sia aiqamausa maqusai naamuaqira ufa qimannimimariasa maridaqa. Sia aiqamausa faiqí sia amana auqaaqaa ira ainaina auqimariasa maridaqa.
30 Sia aiqamausa aurirana taikanniseemaria fasiqausa maridaqa. Sia aiqamausa aanaamuru ufakiqari nári sia irimaria ufanakiqari qimannimimariasa maridaqa. Mi anaamuru ufanakiqari nári sia irimariafanoo maraquna afeeka fannoo dadaaqifaqa mi ufana oosana sia aiqamausa irimariana kooroo ifaranoo.
31 Innee inneeqa irirana Anutuna afeekannai narí nimira afeeka oosana oosana faqa akoofasaikirana oosana oosana faqa misauqakinaana uriqararana kai ummarararee qimasee afeekaikiaqa. Doo qinee mi firaa uriqarara oosana uqanna maaqoo kooroo ianaura.