5
Yisuna ufara suqimarunakina mandoosana kambiqanau.
1 Oo Koorinti maqannaa Yisuna ufara suqimariasa inni ufa moo iriqa firaa manda oosana inniki marifa aamina maqannaasa firaaqoo mandoosana maree mariasa faqa sia maree maria oosana mareenoo inniki Yisuna ufa irimariasaki moo fannoo narí anoona aqoonnana narí akoona anaaqa mareenoo.
2 Mi ainainafa inniki marifaqa naqi fee mandee noori uqeerasee inneeqa nifaaqa amooqidee minara innee nisauruaqa, inni naunduraki soofaaraikinoo mariani, mi fasiqana inneeqakinaana naqiraree kaqi maridanoo, innee suqimarianakiqari mi fasiqana aqiqaaqa.
3 Qinee qeeqara qianaura kuqaa qinee moosaa nianai marida qini maraquna inni faqa maridanoo miqoo marifaqa karaambaiqa Yisuna auqusaa doo mandoosana marai fasiqana aqiqara ufa qiqa qinee inni faqa maridaqara foora doo aqiqara ufa qiqa.
4-5 Innee moodaanaki suqimarifanoo qini maraquna faqa inni saimbaqa suquannoo, Karaambaiqa Yisuna afeeka miqoo maasa faqa marinaqa innee mi manda fasiqana mareeqee inni suqiranakiqari aqiqaifanoo mi aiqaranannai Sadannana amifanoo mina apata kuridinanoo karaambaiqa quminna faasaana mina aundurakinaana kai asumu maraannoo.
6 Oo Koorinti maqusanaasa innee inneeqara kaaqa andeeqarausee qimasaida inni noori uqeerara oosana sia andeeqanoo maridanoo. Innee maa ooqeenaa ufana iridaqa maaqimminoo maridanoo. Narana moodaa qoo suqu quqasainanoo kaqikaafa moodaa putaa inanoo aiqamafa minasaaqaraana putaa iannoo.
7 Inneeqakinaana mi manda fasiqana maraqusaifanoo aiqama andeeqanoo mariani. Miqoo innee amiqira naranara foora mariaqa. Mi manda fasiqana aqiqaranara qidaqa ooqai Mooseena aukuana ainnaaqarara qoomaqa maruna kikiqususee sipsipa aanaaqi Anutuna suqa amisee nariqa ooruku fooqaa ira ainaina nariqa maaqakinaana aiqama doo maraquseeqa ainnaaqarara qoomaqa sakasee neemariqau. Doo maqee maria aukuana asauku mundirana aunirira saqarisaa sipsipa aanaaqiara foora doo kuqa arusee Anutuna amisaafanoo doo maasa mandoosana taikaqiseenoo maasa marirana faqa andeeqa qiseenoo maasa putaaira oosana taikaqisaifanoo aidaaqareenoo minara maasa aidaaqarara qoomaqa deedaqinoo marifoo qidaqa.
(Isaraee maqannaasa ooqai ainnaaqarara qoomaki ooruku siai feemu kai neemariqau. Maasa ooruku moo maqee maridanoo misaindi moo marinau.)
8 Doo maqee maasa ainnaaqarara qoomaqara foora suqufi naannana suqufi ooruku siai feemuara foora naanaura. Naranaki mari oorukufa manda oosanara faqa faiqí anaasee narí ummuari narí ummuari imariana faqa kikiqusidanoo. Ooruku siai feemu kikiqusimariafa Yisuna ufamau fidaqa nisakadiki ikairi sia marirana faqa anoona ufa qimariana faqa minara qidanoo. Maasa putaaira oosana taikaqisoofaqa maqee amiqira naranara foora putaaira oosana faqa aaqara oosana faqa taikasee nisakadiki ikairi siaisa anoona ufa qimariasa naanna ramafi marianaura.
9 Qinee Pauroosa ooqai inni Koorinti maqannaasa Yisuna ufara suqimarusa pasa akara rumannimaqaafannana. Mi pasanaki inniara faiqí anaasee narí ummuari narí ummuari mariasa faqa sia aqoondikamma nimaqararee qimasee misara eerairiaqee qimasee akara rumannimaqaqiafana.
10 Innee akaqausa qini mi ufana irisee aaqaafanoo maqee qinee qiafannufana kafaa kooroo ianaura. Innee Koorinti maqusanaasaki sia Yisuna ufa irimariasa kai maridaqa aaminauqaindi faqa moomoosa maridaqa. Qinee sia inniara aamina fasiqa anaasee narí ummuari narí ummuariqa nimaria fasiqa anaaseeuqa faqa kaaqa ainainara rimaria fasiqa anaaseesa faqa unna ufa qimasaida ummuari maria fasiqa anaaseeuqa faqa tumunnai auqi maria afaannara innaaru qimaria fasiqanaaseeuqa faqa sia mi aiqama ainainna maree mariasara eerairiaqee qiqa, innee eerairiani qinnana moomoosa maa maqa maaqanasaa marianara fasauki fee quqoonasaa fee ooru atooqafi foora.
11 Sia qinee miqi qiqiafana maaqi qiqiafana. Inniki moo fannoo nariara Yisuna ufa irimarinafa inni nikaqaafasaa maridee qinafa faiqí anaasee ummuari mari fee kaaqa ainainara rimari fee tumunnai auqira afaannara innaaru qimari fee mandufa qidanoo faiqí anaasee niqi mari fee nammari namasee furufari mari fee unna qimasaida ummuari mari fee miqira fasiqa aanaaseera Yisuna ufa iri marianaki maria fasiqa anaaseesara eerairidaqa misa faqa sia ooqu marifi narana naaqa, misasaaqaraafa innisaa aqufuandoora.
12-13 Yisuna ufa sia irimariasa aqoosai mariasa sia narira ufa qinee nimmianaura mi saikafa sia qini saika maridanoo. Anutufa kai misa narira ufa nimiannoo. Inneeqa kai inneeqa nikaqaafasaa kimariana Yisuna ufara suqimariasa aaqaifaqa ufa nimirafa innindi mariannoo. Ooqai tamummaqara fasiqa moo fannoo minara maaqi qimasee akara rinau.
Inniqa suqiranakiqari mandoosana maree marina aaduma mara quqaaqee qidanoo.
Qinee Pauroosa minara inniki mandoosana maree mari fasiqana aqiqaaqee qidaqa.