9
Pauroofa narí kadaapisaaqaraa narana kai neemarinau.
1 Qinee Pauroosa kuqaa Yisufa diqiqoo fasiqausa maridaqa kuqaa qinee Yisuna maasa karaambaiqa qafaafanausa maridaqa qinee sia moona karabusaki maridaqa qinee qeeqa iriranannoo maa saikana maraidaqa. Qinee Karaambaiqa saika inniki maraafannana mina anoona innee Yisuna ufa uqeeraafanoo.
2 Akaqausa qini Pauroosara sia Yisufa aqiqoo fasiqafee qimariafaqa innee Koorinti maqusanaasa sia qiniara miqi qimariafanoo. Innee Karaambaiqa ufa irisee mi mau fimariafanoo mifa kai Yisufa qini diqiqoonara koorooidanoo.
3 Faiqí anaasee akaqausa qini saikoosanara diqiafaqa maaqi qimasee qeeqasaa ititaidaqa misa qimannimidaqa.
4 Qinee Yisuna ufa maqusa maqusa oonuree aniree idaqa Yisunara qimannimimarunnana akiaqara mi maqannaasa narana nammari kaqi qimifanoofau andeeqarafa mariqini.
5-6 Yisuna niqiqoo fasiqausa Yisuna akaqaafasaauqa faqa Peetooroona faqa nári ninaaqmaaka Yisuna ufa irimaria anaaseeuqa nindiamaree misa faqa maqusa maqusa nidaqa. Yisuna ufa qimannimiafaqa neeqa kaqi narana nimiafaqa naidaqa. Qini Pauroosa miqifau andeeqaraqoo marini, sia miqidaqa Baranabasisandiri maaqanda kai fee ainainammasaida naidee. Maaqanda qeeqa ainainammasaida feefauru marasaidaqa naidaqa Yisuna ufa qimannimiqanidaqa.
7 Sundia moo fannoo fee ammi fee rakiranaki fidaqa ainainamandaida naidee sia fee. Sia uqanna miqidaqa. Uainna qaqamma ummaqimari fasiqafa narí naaree diqisee namaseenoo inaaqianna moosa nimidanoo. Sipsipasaa rakisimarifa narí kadaapiriranasaa mina naamma anoona naidanoo. Doo qinee faqa maqusa maqusa nidaqa Yisunara qimannimimarunnana narana nammari kaqi qimifanoofau qeeqa kadaapi akiaqara nani, sia miqidaqa.
8 Sia qinee faiqí faiqi ufamau kai fidaqa Yisuna ufa qimannimimarunnana akiaqara narana narara qimannimidaqa.
9 Mooseena sandufa miqinoo marifaqa qidaqa. Mifa maaqi qimasee akara rinoo maridanoo.
Inneeqa sakuma maqusasaa teeqimasee burimakau mareeqee miqoo quqasaifanoo burimakau fannoo oonuree aniree idanoo aikunnai rafarimarinaqa sia mina oori arooriaqa, sia mina oori rumbaaqa, saifanoo akaqana naidanoo rafariani.
Qinee Pauroosa minara maaqi qidaqa. Anutufa burimakaura kai fee iridanoo fee miqi qinau, maasara faqee miqi qinau.
10 Oo sia misarau miqi qinau, maasara irinoo miqi qinau. Ummaqimarifa faqa aiqi marifa faqa minakinaana nararee qidanoo ainainidanoo.
11 Baranabasisandiri inni Koorinti maqusanaasa naunduraki innaarunaindaraa asumu ummaqusaafananoo kambiqaidanoo. Sia fee maqee mi kadaapirirana akiaqara maqasaa narana kaqi qimifaqee naanauree.
12 Akaqausa inniki kaqikaaqoo kadaapiri maruna akiaqara kaqi narana nimiafaqa naidaqa, maasa fiqaramasee inniki kadaapiri marunnana akiaqara inni narana marasee naunaiqini sia kaqi marasee naidaqa. Anutufa amanammifoo qifaqa maasa sia miqidaqa. Asauku mundirana Yisuna amiqira fasaasa ufa inni naundurai sia keeqaandoo qimasee daara rarana faqa kadaapirirana faqa oosana oosana saika auqee marunnanara faqa qimannimiqiafana.
13 Anutuna firaa amaana maqa Yeerusaree maqusa marinaki ainaini mariasa misa minakinaana nariqa narana maraidaqa. Faiqí anaasee sipsipa arusee aandau tatufu Anutuna amaana maqaki amimariana minaki ainainimariasa aanaiqiki mariasa náriara akaqana marasee naidaqa innee minara amiqimasee irimariafanoo.
14 Karaambaiqa Yisufa miqi kai masee narí ufa qimannimi mariasara qimannimiqa fidaqa misakinaana narana marasee naaqee qinau.
15 Mi andeeqara oosanafa marifaqa qinee sia miqiqa maa pasana akara runnana innee narana sia kaqi qimiaqee qidaqa akara rumannimaqaidaqa. Akaqausa qini maa ufanara fifau dapi ufammifoo qifoora sia inni narana marasee kaqi naanaura kuqiranaki fuanaura, qeeqa kadaapinnoo feefaurirafa amana. Miqi marifaqa Anutuna ufamau fiqaramasee funnanara qeeqa qimooqidaqa. Sia moo fannoo mi ainainniannanara qimooqirana aruannoo. Ainainamaseeqa feefaurumasee naanaura.
16 Kuqaa qinee Pauroosa Yisuna amiqira fasaasa ufa oonuree aniree idaqa qimannimi marunausa maridaqa, sia miqiannanara qeeqa qimooqidaqa qeeqa duqu uqeeraanaura. Yisufa qimaqimunara miqidaqa. Sia miqianaqau mandainaina qambaanai mariaqini.
17 Qinee qeeqa kai qimannimira saika mareefau feefauruara qunaiqini. Anutufa daakapainara ainainidaqa mina akiaqara sia feefauruara innaaru qidaqa qimira saika marifaqa kaqi maraidaqa.
18 Qeeqa saika akiaqara nana feefauru fee maraidee, Anutufa amana kadaapi akiaqara narana marasee naannee qifaqa qinee sia miqidaqa amiqira fasaasa ufa sia feefauruara irisee kaqi didifaqa qimannimunafa mifa qini feefaurirafa maridanoo. Kaqi qimamidaqa qeeqa andeeqara kadaapirirana akiaqara sia maraida kaqi qimannimira asasirafa mifa qini amiqira feefauru maridanoo.
19 Qinee sia moo fasiqa ainaini marunausara foora maridaqa kaqi fasiqara foora maridaqa Yisufinnai moomoosa aniaqeera aiqamausa ainainira faiqi kammambi maridaqa.
20 Qinee Yuda maqannaasaki Mooseena sandufa ameemaanai mariasaki ainainidaqa misa naanna ramafi misa marirana maraidaqa. Qinee sia Mooseena sandufa ameemaanai maridaqa, misa sandufa ameemaanai mariasa moomoosa Yisuna ufara aniaqeera qinee faqa mina ameemaanai maridara foora naaraidaqa.
21 Miqi kai iqa aanaamuruki ainainidaqa aanaamuru moomoosa Yisuna ufara aniaqeera aanaamuara foora Yuda maqannaasa sandufara nianasaa tatiaqa maridaqa qimannimidaqa. Miqunnanannai sia Anutuna sandufa rukiaida miqidaqa. Qinee asauku mundirana sandufa ameemaanai qinee kuqaa maridaqa.
22 Qinee Yisuna ufara sia andeeqasee saqariki mariasaki ainainidaqa misa faqa moomoosa aniaqee qimasee misa naanna ramafi maridaqa. Qinee oosana oosana qaini qaini qiranannai faiqí anaasee maraanee qimasee aiqama fasiqa anaasee naanna ramafiqa misa naaraidaqa.
23 Qinee maa ainainniranaki maridaqa moomoo oosana oosana ummaara kaqi maraidaqa qinee faqa innee faqa mi amiqira fasaasa ufanasaaqaraa naundurakina adiafaairana maraannanara miqidaqa.
24 Inni maqusai Koorinti maqusai faiqí moomoosa suqufiqa narí amani narí amani sandeemariana maqee maqee kambiqee marifaqa qafeemariafanoo. Sandee mariasaki moomoo sandaidaqa moodaa fannoo kai urinaaqareenoo qafee maraidanoo. Innee faqa misa naanna ramasee Yisuna aatata sandee fidaqa uriqarara qafee marararee qimasee sandaaqa.
25 Aiqama sandee maria fasiqausa ooqaindari amanidaqa kaqiqoo afeekaikamandee mariiqa sandara aukuana anirainaqa kaqi sandeefaranoo. Misa sia mi kadaapiriranara iridaqa, uriqarara qafeeroo kai qimasaida kaqiqoo afeekaikamasee nimanida sandaidaqa. Misa dauni afauqaqee mari qafeenara kisaaqasaa kadaapiridaqa. Maasa misa naanna ramasee kisaaqasaa kadaapiridaqa, sia afauqaqee mari qafeenaranoofau idau miqidau, naaru naaru marira qafeeroo qidaqa kadaapiridaqa andeeqaidaqa.
26 Minara iriseeqa sandeeqa taikee aniaqoo andeeqasee fidaqa. Qinee bookseena akoofasa fasiqara foora sia fifau faafau qisauku aqidaqa andeeqasee kai qisauku aqiara foora idaqa.
27 Qeeqa qifaaqa qini ufa amiqimmandee iriaqeera firaaqoo qeeqa qifaaqa dariara foora idaqa, qeeqa qimudaani faasasaa afeekaikidaqa. Qinee aiqamausa naaramasee aniree bookseenara foora amaniaqee qimaseeqa qeeqa faqa amanianee qimasee oorudupiananoo Anutufa manda saikammiaanoo qimasee diqiqaandoo qimasaidaqa faasasaa afeekaikidaqa.