10
Pandaaqauqa moomoo kambiqaqau.
1 Yaaweefa kafaa Mooseena qimaminoo qinau. Anee kafaa Faraoo finnai fua. Qinee Faraoona faqa mina ainainiranasaa rakisirausa faqa kaukaataqira irirana nimiseeqa qeeqa faiqí sia auqaaqaa ira ainaina misa qambaana auqarara miqianaura.
2 Innee inneeqa faiqi namu faqa ninaiqimara faqa, qinee Isipa maqannaasa faiqí sia auqaaqaa ira ainainannai misa mara furufarirausaika mannimaqaafannanara qimannimia. Innee aiqamausa qini Yaaweesara irifaranoo.
3 Mooseefa faqa Aaroonafa faqa Faraoo funnai oonuree maaqi qimasee qimamiqa qiqau. Yaaweefa Qeeburu maqannaasa Anutufa aniara maaqi qidanoo. Kisaaqasaa fee anee qaoo qidanee sia fee aneenna auqu mara maree muqufisee qini qimeemaanai marinnaree. Anee qini faiqí anaasee idukusainaqa oonureeqa qiniara innaaru qiaqee qidanoo.
4 Anee kaqi kai qaoo qimarinaqa qinee duna pandaaqa moomoo mara quqasaanaqa ani maqa maaqaki qumbiqaannoo fee qinoo.
5 Pandaaqa moomoo uqanna kambiqafi maqa ititafinaqa sia maqa qafeefaranoo. Pupusamu fannoo naridanoo mafisai andandausa aiqama nama taikeefaranoo. Saqari mafisainauqa faqa neefaranoo.
6 Mi pandaaqausa ani ufa irira maaqaki faqa ani ainainiranasaa rakisi mariasa maaqakiaqa faqa ani maqannaasa maaqakiaqa faqa qumbiqeefaranoo. Ani akeeku akaaku maruqooqari faqa maqee anee mariannaqooqari faqa sia qafaa ainainafa mandainaina uqanna mariannoo. Miqi qimaseenoo Mooseefa raudamaki finau.
7 Faraoona ainainirana saa rakisi marusa Faraoona qimamiqa qiqau. Maa fasiqafa Mooseefa kisaaqasaa maasa ummaara qimidanoo. Isaraee maqannaa idukusainaqa oonuree nári Anutuna Yaaweenara innaaru qiaqa. Anee sia fee qafaidanee Isipa maqa maaqa doo mandaikidanoo.
8 Miqi qufaqa Mooseesa Aaroonasa nifiqee Faraoofa maruqoo minisoofanoo Faraoofa qimanniminoo qinau. Innee oonureeqa inni Anutuna Yaaweenara innaaru qiaqa. Inneeqa firanara faqa amiqi masee qimaqimifaqa iria. Yauyausee fifaranoo fee.
9 Miqi qufanoo Mooseefa narí qimaminoo qinau. Maasa aiqamausa fuanauranoo. Maasa qeeqa faiqi asooqa faqa fuanauranoo. Maasa qeeqa sipsipauqa faqa mimmiuqa faqa burimakauqa faqa aiqama oonuree Yaaweeena oomaqa suqamianauranoo.
10 Miqi qufanoo Faraoofa qinau. Qinee Yaaweena auqu ramasee qeeqa qimana aiqamasee maaqi qidaqa. Qinee sia eedoo qianaqa innee inneeqa faiqi anaasee nifiqee fifaranoo. Innee akooqoo maasa mandaikamma qimaqarara tipundaara maqaqee miqi mariafanoo.
11 Minara qinee inniara faiqí kai oonureeqa innee iri mariandee Yaaweenara innaaru qimaseeqa amooqiaqa. Miqi qimasee narí sundiauqara qufaqa Mooseesa Aaroonasa niiqoofaqa raudee fiqau.
12 Yaaweefa mina qafamaseenoo Mooseena qimaminoo qinau. Aneenna asauku Isipa maqa maaqa amummaqa uqeerasainaqa pandaaqauqa aniaqa. Anireeqa misa Isipa maqannaasa narana amanee aiqama naaqa. Pupu samu aridanoo mafisoona namataikaaqa.
13 Mooseefa iriseenoo narí saunu uqeerasoofanoo Yaaweefa ufaira qufanoo suani oosanaindari mi faasaanna faqa mi eendanaki faqa uqinau. Kananaana ufai fannoo pandaaqauqa moomoo maree urinau.
14 Pandaaqa moomoo nukudara foora urureeqa aiqama Isipa maqa maaqaki amanaikiqa mariqau. Moomoo indaaru ooqbiqasee urufaqa kafaa inaaqiana akaqausa ooqbiqasee urufaqa, miqi kai masaida moomoosa uru maqa maaqa qumbiaqau. Ooqai sia miqirana qafaqau, naaru faqa sia qafeefaranoo.
15 Mi pandaaqausa aiqama maqa rafaaqafusoofanoo sia maqa ati faqa kooroo inau. Maqa faqa kai kudima arinoo marinau. Pupu samu fannoo aridanoo mafisoo andandausa faqa aiqama saqari qaqama faqa namasaqau. Sia saqari amanee arira ainaina, saqarisaa faqa ummaqira ainainasaa faqa Isipa maqa maaqaki marinau.
16 Faraoofa Mooseesa Aaroonasara aniaqee qufaqa aniroofanoo qimanniminau. Qinee Yaaweena inni Anutuna faqa inni faqa mandaikamma nimaqeeqa.
17 Inneeqara qini aaqarana akiiqara kafaa maqee kai minni qisaaqa. Minni qiseeqa Yaaweena inneeqa Anutufinnai innaaru qifanoo maa kuquaqaa ira aupurarana mara aqu qisaani.
18 Mooseefa iriseenoo raudamaku fanoo oonureenoo Yaawee funnai innaaru qinau.
19 Yaaweefa qufanoo ufai fannoo suani afu oosana qaannaindari uriufa mara quandasee suani afu keeqee marunnaindari afeeka ufai uqanna uqinoo aiqama pandaaqauqa fuaqa Taatuqee ooruku nammarinni aqinau. Sia uqanna moodaa pandaaqa Isipa maqa maaqaki kaqi marinau.
20 Yaaweefa qufanoo Faraoofa kaukaata qimasee sia Isaraee maqannaasa idukusoofaqa fiqau.
Asukuna firaafa narinau.
21 Yaaweefa kafaa Mooseena qimaminoo qinau. Anee aneenna asauku innaarunai uqeerasainanoo asukuna fannoo aiqama Isipa maqa maaqa rafaaqafuani. Asukuna firaafa misa nifaaqai atooqanoo maridanoora foora inoo mariannoo.
22 Mooseefa narí asauku innaarunai uqeerasoofanoo Isipa maqa maaqa asukuna firaafa qaaramoo faasaana ititannimaqanau.
23 Isipa maqannaasa mikari sia narí qafee narí qafee imariqau. Sia aana nimariqau, maaqaki kai mariqau. Isaraee maqannaasa maruqoo kai kaaqa qee marufaqa marinau.
24 Faraoofa Mooseena aaramaseenoo qimaminau. Aneenna maqannaasa faqa doo oonureeqa Yaaweenara innaaru qimaseeqa amooqiaqa. Innee inneeqa faiqi anaasee faqa aiqama nifiqee fuaqa. Inneeqa aandauqa maaqoo quqasee inneeqa kai fuaqa.
25 Miqi qimasoofanoo Mooseefa qinau. Maasa nariqa aandauqa faqa maree oonureeqa Yaaweena maasa Anutuna tatufirana suqa amianaura.
26 Maasa qeeqa aandauqa maree fuanaura. Sia moodaa maaqoo kaqi mafi quqaanaura. Maasa qeeqa kai nana aandau fee aruseeqa Yaaweena maasa Anutuna tatufirana suqa amianauree. Maasa maqee sia iridaqa. Miqoo oonuree irianaura. Nana aandaunnoo fee tatufirana suqaanauree.
27 Yaaweefa qufanoo Faraoofa kaukaata qira irirana maraseenoo ititammaseenoo Isaraee maqannaa sia idukinau.
28 Miqi qimaseenoo Faraoofa Mooseena qimaminau. Doo qinee qafee mariana qini qifusaaqari fifua. Qinee sia kaifaa ani qafaanaura. Ani qafaanana kuqinnaranoo.
29 Mooseefa mina ufa iriseenoo Faraoona qimaminau. Anee kuqaa qiananoo. Anee sia kafaa qini qiqafeennaranoo.