12
Ainnaaqarara qoomaqa oosana arasee naqau.
Mooseena faqa Aaroona faqa Isipa maqa maaqaki Yaaweefa kafaa qimanniminoo qinau. Innee aiqama aukuanaki maa quqoonnara maasa indaaruqaa quqoona fee qifaranoo. Anutufa Mooseena qimaminoo qinau. Aiqama Isaraee maqannaa maa ufana qimannimia. Maa quqoonnasaa qisaukuqara taikasee faasaanasaa moodaa moodaa fasiqa oonu sipsipa aanaaqi fee mimmi aanaaqi fee nári maaqaki mariasa naaqeera maraaqa. Mi maqanakinaasa oodaa maridaqa sia mi aandauna nama taikaaqaa inaqa misa naaqa marinausa naaramasee misa faqa amana rainasee naaqa. Faiqí anaasee nimana nimana kai aukusee niminaqa naifanoo taikaani. Innee sipsipa aanaaqi fee mimmi aanaaqi fee akoona kai moodaa aukuana marasainnana, sia moo nammuana faqa aurirana faqa marinnana maraaqa. Mi quqoonnanasaa qisaukuqara taikasee qikunni qaara faqa qaara faqa marasee 14 faasaana eenee marinaqa kai aiqama Isaraee maqannaasa mi aandausa aruaqa. Sipsipa arusaifaqa mina fidika sakaseeqa maaqa kooqiuqa dinni dinni afaimau faqa mirinni auni riranasaa faqa akuaqa. Innee mi aandausa neefandinna maaqana kooqi aku amaqaaqa. Mi eendanaki kai mi aandauna amaqi idasaa kasooqammasee sukaqee mari adasana namufaqa naaqa. Sia innooqee mari pauraqana aqira bereeta suqasee sipsipa amaqi namufaqa naaqa. Sia fuka naaqa. Nammariki faqa sia suqasee naaqa. Idaki kai akiiqa faqa aiku faqa arada faqa suqasee naaqa. 10 Eendaki mina aiqama taikaaqa. Mina ataraasa sia kananaana kaqi mariani, ida qarasainanoo taikaani. 11 Innee maaqimmasee mi aandauna naaqa. Amunnanda maraseeqa niku aanaamu afisuseeqa, saunu nisaukuki qumareeqa doo kaqi kaqi naaqa. Namaseeqa maaqooqari innee mi narannara Yaaweefa ainnaaqaroo narana fee qiaqa.
12 Mi eendanaki qinee Isipa maqa maaqa aiqamai oonuree aniree idaqa aiqama ooqa akoonaiqi faqa ooqasaa andau akoonauqa maqarana faqa kuqa naruanaura. Qinee Yaaweesa Isipa maqannaasa unna anutusa faqa aupurarana nimianaura. 13 Fidika kooqi afaisaa aku amaqarafa mifa kai innee maria maaqana koorooiannoo. Qinee Isipa maqannaa aiqama nariqa fidaqa inni maaqa kooqisaa fidika qafamasee ainaaqaraanaura sia inni naruanaura.
14 Innee mi faasaanna amaana qoomaqa faasaanara foora marinaqa qinee Yaaweesa auqaafanna ainainara naaqoo auqainaqa irisee asasifaranoo. Innee aiqama kari mi faasaannara asasifaranoo.
Pauraqa sia quqara bereeta neemaru firaa faasaanafa.
15 Yaaweefa kaifaa maaqi qinau. Qisauku dinni taikasee dinni ani qaara marasee 7 faasaana innooqee mari pauraqana aquqaa bereeta sia naaqa. Sia pauraqa aqira bereeta kai naaqa. Oomaqa indaaruqaa faasaana inneeqa maaqakiaqa aiqama innooqee mari pauraqana mara aqusaaqa. Oomaqaki faiqí moo fannoo innooqee mari pauraqana aqira bereeta nainna fasiqanara sia Isaraee maqannaa fee qiaqa. 16 Oomaqa indaaruqaa faasaana faqa qoomaqa taikara faasaanara faqa naaquqara faasaanee qimasee suqufi innaaru qiaqa. Sia moo ainainirafa mi faasaana qandasaa mariani. Narana deedaqirafa kai mariani.
17 Innee miqimmasee qoomaqa naida mariaqa. Mi faasaanna qinee inni faiqí oosana faiqí oosana Isipa maqa maaqaindaraana nifiqee aniqiafana. Innee aiqama kari mi faasaannasaa qoomaqa sakeera foora mi faasaannara asasiaqa. 18 Indaaruqaa quqoonasaa 14 faasaanasaa eenee marinaqa oosana arasee fifiinaqa mi quqoonnana 21 faasaanasaa innee sia innooqee mari pauraqana aqira bereeta naaqa. 19 Innee 7 faasaana qoomaqa nara faasaana innooqee mari pauraqafa sia inni maaqakiaqa mariani. Innikiqari faiqí moo fannoo fee moo aanaamuru ani marina fee innooqee mari pauraqana aqira bereeta nainaqa innee sia minara Isaraee maqannaa fee qiaqa. 20 Innee yai yai fee maridaqa sia innooqee mari pauraqana aqira bereeta kai naaqa.
Indaaruqaa ainnaaqarara qoomaqa.
21 Anutufa Mooseena mi ufana qimamisoofanoo Mooseefa Isaraee maqannaasa uriqararausa qimanniminoo qinau. Innee moodaa moodaa sipsipa akoona fee mimmi akoona timmusa fee inneeqa faiqi anaasee nimana kai mara minisee aruseeqa ainnaaqaroo qoomaqana suqasee naidaqa asasiaqa. 22  Aandau aruseeqa fidika difaaniki sakaaqa. Innee hisoopa saqari amanee raudasee minannoo fidika difaaniki raaraammasee kooqi afai dinni dinni faqa mirinni faqa akuaqa. Akuseeqa innee sia raudaaqa, maaqaki kai marifanoo iaqaani. 23 Fafaa eendaki Yaaweefa Isipa maqannaasa ooqa faiqi narinoo fidanoo inni kooqi mirinni faqa dinni dinni faqa fidika qafamaseenoo narinoo nimari qangiroonara qinanoo sia mi maqanaki keeqaannoo.
24 Innee faqa inneeqa faiqi namu faqa naaru naaru maaqi kai iqa fuaqa. 25 Innee Yaaweefa qima afeekaikamasee nimiraree qimaqoo maqannaasa oonureeqa maaqimmiqa fuaqa. 26 Kasooaqee inni faiqi namu mi qoomaqana qafamaseeqa mina oosanara iraifaqa innee maaqi qimasee qimannimiaqa. 27 Maa qoomaqafa Yaaweefa ainnaaqaroo qoomaqafa maridanoo fee qimasee qimannimiaqa. Ooqai mifa Isipa maqa maaqaki maasa ainnaaqareenoo Isipa maqannaasa ooqa faiqiuqa narinoo maasa sia darinau maqi qiaqa. Mooseefa miqi qimasoofaqa Isaraee maqannnaasa iriseeqa aiqama kumma ramafi Anutunara susuiqau. 28 Susummaseeqa misa daraanimafiqa Yaaweefa Mooseesa Aaroonasa nimu ufa mau fiqa aiqama ainaina andeeqasee deedaqiqau.
Isipa maqannaasa akoonaiqi ooqa faiqiuqa kuqiqau.
29 Mi eendanaki kai eenda amuqusai Yaaweefa Isipa maqannaa ooqa akoonaiqiuqa narinau. Faraoona amaaku narí akoona ainaina maraaninnana saaqari oosana arasee rumbaranaki mariasa faiqi namu faqa aiqama narinau. Aandau aanaaqiuqa akoona ooqasaa maqaranauqa faqa Yaaweefa narinau. 30 Narusoofaqa mi eendanaki Faraoofa faqa narí ainainasaa rakisi marusa faqa aiqama Isipa maqannaasa faqa aiqama tauti findifiqau. Iki faafau qirafa firaafa Isipa maqa maaqaki marinau. Sia moo maqaki kaqi mariqau, aiqama maaqaki kuqirafa marunara iki raqee mariqau.
31 Mi eendanaki kai Faraoofa Mooseena faqa Aaroona faqa naaramaseenoo qimanniminau. Inneeqara faqa inneeqa maqannaasa Isaraee maqannaasa faqa qini maqa maaqakiqari quqaseeqa inneeqa qiannai oonureeqa Yaaweena amooqiaqa. 32 Inneeqa sipsipauqa faqa mimmiuqa faqa burimakauqa faqa doo fuaqa nani. Oonuree qini faqa amiqi amiqimma qimaqaanifeera innaaru qiaqa. 33 Isipa maqannaa faiqí anaasee misa faqa Isaraee maqannaasa niqiqeeqa qiqau. Innee kai kaqi fuaqa. Innee kaqi marifaqa maasa aiqama kuqu taikaanoora. Innee doo fuaqa. 34 Miqi qimasoofaqa Isaraee maqanaasa innooqee maru pauraqana sia aqira bereeta sia suqarana difaaniki qamunnasaa kukuqamma quqasee nikumaaqa akumaree fiqau 35 Isaraee maqannaasa Mooseefa qundee kai iqa Isipa maqannaa nifaaqa auqimaru ainainara siruaara faqa koorara faqa qamunnaara faqa iraqau. 36 Yaaweefa qufaqa Isipa maqannaasa Isaraee maqannaasara uriqararausee qimasee misa iroo ainainna kaqi nimiqau. Miqunannai Isaraee maqannaasa Isipa maqannaa aiqama ainaina maree fiqau.
Isaraee maqannaasa Isipa maqa maaqa minnisee fiqau.
37 Isaraee maqannaasa sandeeqa Ramaseesa maqusa quqasee Sakoota maqusai fiqau. Misa nambaqa maaqimminoo marinau, 600,000 faiqí kai mariqau, sia faiqi anaasee nisaana riqau. 38 Moomoo maqusanaasa Isipa maqa maqaki ani marusa misa faqa nári burimakauqa faqa sipsipauqa faqa mimmiuqa faqa maree fiqau. 39 Misa aanai fidaqa fuka bereeta innooqee mari pauraqana sia aqirana maree funa suqa naqau. Isipa maqannaasa Isaraee maqannaasa nifaqasoonara aaqmuriqa bereeta innooqee maru pauraqana sia aqirana maree fiqau.
40 Isaraee maqannaasa 430 aukuana Isipa maqa maaqaki mariqau. 41 430 aukuana taikarana namu faqa faiqí aiqama oosana Yaaweena aiku asauku Isaraee maqannaasa Isipa maqa maaqa quqasee fiqau. 42 Eendaki Yaaweefa Isaraee maqannaasa qumee rakisidanoo nifiqee finau. Aiqama aukuanaki mi eendiranara kai Yaaweenaindi fee qimasee innaaru qidaqa rakisi mariqau.
Ainnaaqaroo oomaqana suqara naakaparufa.
43 Yaaweefa Mooseena faqa Aaroona faqa qima niminau. Ainnaaqaraafanna oomaqana suqara naakapara ufa maaqimminoo mariannoo. Moo maqanaindari ani marinafa sia amana mi oomaqana naannoo. 44 Inneeqa munnimmannai feefaurummaqoo ainainira fasiqausa fainanduqu saifaqa misa amana neefaranoo. 45 Ufaasu ani mariasa faqa feefauruara ainaini mariasa faqa sia neefaranoo. 46 Aiqama mi aandau naranna deedaqia maqanaki kai nama taikaaqa. Sia uqanna madaanai maree fuaqa. Sia aandau amudaani itairiaqa. 47 Aiqama Isaraee maqaannaasa mi oomaqanara asasiaqa. 48 Sia fainanduqira fasiqa fannoo sia amana naannoo. Anaamuru fasiqa inni qambaana marinafa ainnaaqaroo oomaqanara asasidanoo Yaaweena auqu uqeerararee qinaqa innee mina maaqaki mariasa akoonaiqiuqa fainanduqu saifaqa misa faqa mi oomaqanara asasiaqa. Miqi masaifanoo mifa Isaraee maqannaasaki kambiqara fara foora maridanoo mifa faqa oomaqa naranaki mariani. 49 Innee faqa moo maqannaa inniki ani marinafa faqa moodaa sanda mau kai fuaqa. 50 Yaaweefa Mooseesa Aaroonasa qima nimundee Isaraee maqannaasa iqau. 51 Mi faasaanna Yaaweefa Isaraeerana aiku asauku Isipa maqasaa qaraana nifiqee finau.