2
Peetooroofa unna amaana ufa qifandinausara aaquqimaqoo ufafa.
Ooqai Isaraee maqannaasaki unnaqira tamummaqara fasiqauqa aniree kaqiruna mara ubeekee mariqau. Maqee maa aukuanna misa undee kai iqa unnaqira amaana ufa qimanniminausa inniki kambiqeefaranoo. Mi fasiqausa Yisuna ufa iriusa rakeemaki kaqinni oonuraasauqa maridaqa qumee faiqí kuridinnisee maria unna amaanufana inniki uqeereefaranoo. Yisufa narí kuqu fidikanannai misa kuqiranakinaana feefauru fasiqanara sia irirai nikooqainaqa nári kuridirana nári kai mareeqee nári nifaaqai quqeefaranoo.
Miqifaqa innikiqari akaqausa misa ufa iriseeqa mi manda fasiqausa naanna ramasee faiqí anaasee qummuarira oosana mandoosana mareefaranoo. Miqifaqa faiqí anaasee akaqausa misauqa niqafamaseeqa quandaki anoona aanara manda aana fee qifaranoo. Unna qida uqannifiqeemariasa kaaqa ainainara rimariasa maridaqa misa unnufa inni qimannimi marifaqa mi unnufanannai munnimma aina maree marifaranoo. Ooqaindari naaru kisaaqasaa misa ufa nimimarifa kuqira ufa misasaa quqasaifanoo mi kuqirafa misara nifeesidanoo. Misa kuridi nimaqee marifa Anutufa sia faiqaidanoo afu maqasee deedaqinoo maridanoo.
Ooqai innaarunaindaraa qangiroouqa akaqausa mandoosana marasoofanoo Anutufa sia nifauanau mareeqee idaki aquseenoo sainandannai rumbaqoosa ufa aukuanara afeesida kaqi maridaqa.
Ooqai indaaru maru fasiqausa mandoosana marasoofanoo Anutufa sia nifauanau nammari aufiranannai naruseenoo Nooana andeeqara oosana qimannimi maruna faqa narí faiqi namu dinni qisauku taikasee dinni ani qaaraqanda maraseenoo misa namufaqa asumu akoonnai quqanau.
Soodooma maqusa faqa Koomoora maqusa faqa Anutufa idannai aiqamausa naru taikanau. Maasa aiqamausa mandoosana akiaqa qafamasee rufiaaqeera naru taikanau.
Rootafa nariara andeeqarafa marinau misa nariara nariara qummuarirana faqa ufa rukiarana faqa Rootafa qafamaseenoo akooqee marufanoo Anutufa mina kai asumu akoonnai mara quqanau. Mi andeeqara fasiqafa misa qambaanai marida faasaambaasaana misa mandufa irinoo misa mandoosana qafee marufanoo amuqusa mandaiki marinau.
Qinee Peetooroosa minara irisee maaqi qidaqa Anutuna ufa irimaria fasiqausa oosana oosana nimaniranaki aqufifanoo Karaambaiqa misa mi nimaniranaki dadaaqira oosana iridanoo dadaaqiannoo. Mandoosana maree mariasa narirana ameemaanai quqaqaifaqa maridaqa ufirira faasaanara afeesida rakisira oosanara Anutufa iridanoo maridanoo. 10 Anutuna ufara fidiaqaammasee nári manda nipata manda nidiramau fimariasa misa narira oosanara faqa Anutufa firaaqoo iridanoo. Unnaqira amaana ufa uqannifiqee mariasa misa inniki paasoosida aanooqidaqa maridaqa. Innaarunai kaaqa qee mariasara faqa sia naaquqaifaqa rufiaidaqa mandufa kai qangiroouqa faqa nimidaqa. 11 Mi qangiroosa afeeka mi manda fasiqausa afeeka urinaaqaranoo maridaqa mi fasiqausa ufa iriqa sia aanoomasee Anutuna afusaa oonuree misa nariranara qimamidaqa. Anutufa narí kai andeeqaannoo fee qimasee minnisaidaqa.
12 Unna qira amaana ufa uqannifiqee mariasa nariqa kuara fuseena iriranamau fidaqa innaarunai mari ainainnara sia irimaria ainainnara mandufa qimasaida kaasau aandaura foora ufaanaki narifandinausa kambiqaida miqidaqa. Miqi mariasa Anutufa kaasau aandaura foora kaqi naruannoo. 13 Misa kuridirana moomoosa nimifanoo Anutufa mina ati quandeeqee nariqa nimiannoo. Nári manda ainainara nidimarina faasaanasaa kaimma asasamandee maraidaqa. Innee Yisuna ufa irimariasa qoomaqa inni faqa moodaanaki qoomaqanduqidaqa nári nikaruqira oosana maraidaqa inni andeeqee mariasa nisaurirana manduqarana nimidaqa kudimakidaqa miqidaqa. 14 Unna qira amaana ufa uqannifiqee mariasa ummuari mari anaaseena mararee qimasaidaqa randaidaqa. Misa manda oosanara naararee marisa sia nimuaqu idanoo. Unna qira aana uqannifiqee mariasa misa furufari mariasa oonu rarisameeqee ufaana fainnai ubeekamasaifaqa ufaana aridaqa. Mi unnaqirana uqannifiqee mariasa naranara faqa ainainara faqa fanandirana akoofasa maridaqa. Misa Anutuna niqurarara ufa ameemaanai mariasa maridaqa. 15 Unna qida amaana ufa uqannifiqee mariasa misa andeeqara aana minniseeqa fifau dapi fukasaa fidaqa. Ooqai Baraamafa Boosoorana amaaku mandoosanna maree maria munnimmanara rumammaraidanoo kaaqa ridanoo namuqaa ufa irisee Isaraee maqannaasa nupuka naruaneera doonkisaa fimarinau. 16 Mina doonki fannoo faiqiara maqi ufa qidanoo akoona furufarira oosana rafaaqafimarinau. Minannai Anutufa Baraamana mandoosana qaoo qinau. Inniki unna qira amaanufa uqannifiqee mariasa Baraamana aatata fidaqa miqidaqa.
17 Unna qira amaanufa uqannifiqee mariasa aadaturu nammari miqirausa maridaqa asuru miqirana ufai fannoo kaqinni sufafaa quqaidanoo. Anutufa firaa asukuna misa afeedama nimaqaidanoo. 18 Mi manda fasiqausa nári nifaaqa amooqimariana faqa furufari marianara faqa ufa qidaqa. Faiqí anaasee akaqausa nári mandoosanakiqari findifi aaqee kai aanai ubeekarariafaqa mi mandoosanna maree mariasa misa mareeqee nári ufaanaki mara naridaqa. Mi fasiqausa nári mandainainara nidiranannai ufaana fufuseeqa minaki mara naridaqa. 19 Unna qira amaanufa uqannifiqee mariasa aaqee kai andeeqara aanai ubeekee mariasara unna qida uneemaana qimasee maasa manda oosanakinaana idukira oosana uqannifiqaanauree qimasaida nári kai faiqí kuridi maria oosana fannoo nári rumbannimaqaidanoo. Nana ainaina moo mandainaina fannoo faiqí afaaqa rumbasainafa doo mi ainainafa kai mina rafaaqafimari ainainafa maridanoo.
20 Miqi mariasa akaqausa asauku mundirana, Yisufa asumu maree marifa maasa karaambaiqa, misa akaqausa minara irimarianannai minannai maa maqanasaa kuridira mandainaina rafaaqafiranakinaana idukunnisaidanoo andeeqara aanai ubeekeeqa kafaa quandaki kafaa manda ainainaki aqufinausa mi fasiqa anaaseesa indaaru mandainainaki ida afaisaa mariaasa maqee doo firaaqoo uqanna ida qambaanaki mandainainaki aqufuafanoo. 21 Miqimari fasiqa anaaseesa andeeqara aana sia qafaifanoofau amana marini. Misa kaqikaaqoo qafamaseeqa innaarunaindaraa ufa rukiaidaqa kafaa quandaki fimariafanoo firaaqoo mandaikidanoo. 22 Misa ooqeenaasa ufamau fidaqa faini narí fidirana kafaa narí naidanoo, kuarara foora afaaqa nammari uqusainanoo kafaa oonu dikoomaki doona reeree mareenoo anidanoo misa miqimmidaqa.