11
Anutufa Isaraee maqannaa asumu mariaqeera akaqausa kai maraannoo.
1-2 Qinee Pauroosa kafaa Isaraee maqannaara iraidaqa, kuqaa fee Anutufa Isaraee maqannaasara qaoo qimasee mininnisanau. Oo sia uqanna minnisanau. Qinee Pauroosa Isaraee maqannaa faqa maridaqa qinee Abarahaamana aiku asauku marunausa maridaqa, qinee Yakooboona amaaku Beesaminna ati maridaqa marunnanara Anutufa sia narí Isaraee maqannaara qaoo qimasee minnisanau. Ooqai oosanaraseenoo maa maqa maaqanakina rusandeesamumandee maroosa mariafanoo. Ooqeenaa tamummaqarausa akarakinaana Eeriaafa Isaraee maqannaasara nifairidanoo niqidanoo afeekaikamandee Anutunara innaaru qinoo qinau.
3 Oo karaambaiqa Isaraee maqannaasa ani ufara minniseeqa furufariqa ani tamummaqara fasiqauqa kuqa naruseeqa ani aandau tatufira ooni qaindauqa rapeepaamma aqiqa. Qinee Eeriaasa qeeqaraa kai ani ufamau fimarunaqa misa minara irisee qini faqa kuqa dariraree qimariafaqa ani qimamidaqa.
4 Eeriaafa miqi qimasoofanoo Anutufa qimaminoo qinau,
Oo sia aneennara kai qini ufamau fimarianafa mariananoo. Qinee qisauku dinni taikasee dinni oonu qaaraqanda tauseenna fasiqa anaasee moomoosa uqanna utaaqamaqaunausa maridaqa sia unna Anutuna Baaranara innaaru qimariasa qiniara kai innaaru qimariasa maridaqa.
5 Eeriaana aukuana miqinoo marinau maqee aukuana Isaraee maqannaasaki miqimminoo maridanoo, Anutufa misakinaana akaqausa utaaqamasoofanoo narí amuqusiranannai utaaqamasoosa maridaqa.
6 Minamusa Anutufa sia misa nirana marirana oosana qafamasee amiqira fee qimasee utaaqamannimaqanau, narí amuqusiranannai kai misa utaaqamannimaqanau. Anutufa faiqí utaaqamannimaqara oosana fannoo misa nimariana misa mariranasaa mundinoo marinanoofau sia anoona amuqusiranasaa mundinoo marini, minasaa kai mundinoo maridanoo.
7 Isaraee maqannaasara nanee fee qianauree, maaqi qianaura, Isaraee maqannaasakinaana akaqausa Anutufa utaaqama nimaqaqoosa kai Anutufa naaroo ufana irisee mifinnai fiqau. Aiqama tia naaqooki ooni ititarausa maridaqa sia nári randee maru aanna paquriqau.
8 Tamummaqara fasiqausa misara maaqi qiqau.
Anutuna nimuqusaki faqa nitikuraki faqa ummaarararana nimisoofaqa mi kamuqooqari aunduaridaqa kudoosaapaida maridaqa nifu qafaida sia qafaidaqa, naaqooki faqa sia iridanoo.
9 Dafidifa faqa maaqi qimasee misara akara rinau.
Misa qoomaqa sakasee ooqu marififanoo namuqaa anireeqa misa ititaannoo. Misa miqoo kuridiqa nári mandainaina akiaqara mareefara.
10 Misa sia qafaaqee qimasee Anutufa misa nifusaa ititaannoo. Nári ummaara fannoo aiqama kari nári nitaufakaaqa mariraika kai idanoo nitaufaka saaeemminoo maridanoo.
Miqimasee Dafidifa misara akararinau.
11 Qinee Pauroosa Isaraee maqannaara maaqi qimasee iraidaqa, Yuda maqannaasa Yisunasaa farindamaki saamuriqa kuridiranaki taikaranaki aqufiqee iqau. Sia uqanna miqiqau. Isaraee maqannaa aaqoonara Anutuna asumu marirafa aanaamurusaa aqufinau, Yuda maqannaasa aanaamuruara rairaiqiaqeera miqinau.
12 Yuda maqannaasa aaqaranara Anutuna firaa amiqi amiqirana aanaamuru aiqama maqa afaaqasasa mariasa niminau. Yuda maqannaasasaaqaraana aanaamuru amiqi amiqirana maraqau, kasooqaqee taikara aukuana Yuda maqannaasa Anutufa aiqama mareeqeenoo aanaamuru nimuna akiaqara firaa amiqi amiqiranaki uriqararanaki Yuda maqannaasa quqaannoo.
Anutufa Isaraee maqannaasa minniseenoo aanaamuru anireeqa Anutuna aqoondikiqau.
13 Qinee Pauroosa Yuda maqannaara inni qimannimiseeqa kafaa maqee inniara aanaamuru qimannimidaqa, Anutufa aanaamuru qimannimiranara diqiqoosa maridaqa inniki ainainimarunnanara asasidaqa.
14 Anaamuru qimannimi marunaqa Yuda maqannaa inniara Anutuna ufara iridammiafoo qimasee rairai qimasee misa faqa irisee irirana mi ufanasaa rusiaqeera asasidaqa.
15 Yuda maqannaasa Anutufa mininnisoofaqa aanaamuru aniree Anutuna aqoondikiqau. Kasooqaqee Anutufa quandaki Yuda maqannaa kafaa marainaqa kuqiranakiqari findifiara foora ifaranoo.
16 Maasa Yuda maqannaasa Anutuna amira ainainara maaqi qidaqa. Innee feemu adiana kai raqeeqee Anutuna amifanoo mi feemufa aiqama minaindikakaimminoo mariannoo, kafaa innee saqari oosana amifanoo mi saqarifa minaindikai mariannoo.
17-18 Doo qinee mi iriranamau fidaqa minara maaqi qidaqa. Oorifa saqari asumu saunara foora maridanoo. Asumu saqari ammuqu akaqafa raqanoo marifanoo kaasau oorifa saqari asaana raqeeqee minakina mini ookaamandee ummaqusainanoo minakiqari kambiqaannoo. Innee aanaamuruara kaasau oorifara foora mariafanoo. Yuda maqannaasa oorifa saqari asumu oosana maridaqa. Anutufa inni aanaamuru mariasa kaasau oorifa asaanara foora asumu oorifa minaki ookaamasaifanoo kambiqafifaqa innee maqee Yuda maqannaa akaqausa faqa misaindi oosana amiqi amiqiranasaaqaraana animaree mariafanoo. Innee aanaamuru mariasa asumu oorifa ammuqu raqaranaki innee ookaairausa mariafanoo, sia misara raqara asaanara fidiaqaa iaqa. Innee naqimaseeqee noori uqeeraseeqa inneeqara amiqirausee qidee innee ammuqu mariafanoo, sia ammuqu fannoo saqari oosana pooduqaidanoo, oosana fannoo ammuqu poonduqaidanoo, minara sia innee oosana mariasara Yuda maqannaasara fidiaqaa iaqa.
19 Innee minara irisee maaqi qifaranoo Anutufa maasa aanaamuara iriseenoo asumu saqari ammuqu raqafufanoo maasara kai iridanoo fee qifaranoo.
20 Qinee Pauroosa minara maaqi qidaqa Innee doo kuqaa qiafanoo, Anutufa Isaraee maqannaa sia irirana mina ufasaa rusimarufanoo aadana asaanara foora raqanau, innee irirana mina ufasaa rusimarunara inni mareeqee minaki ookaa inau. Innee minara irisee sia noori uqeeraaqa, rufiaaqa.
21 Anutufa mi saqarina naríndi Yuda maqannaasara sia amuqusinau sia Yisunara irisoonara kaqi ateekanau innee faqa rufiaaqa kaqinni faqa ateekaannoo, kaasaummia.
22 Maanara amiqimasee iria sia aunuaqa Anutufa narí qaara oosana maaqimminoo maridanoo mina dinni kaaqa faiqí anaaseera amuqusirafa maridanoo kafaa mina dinni manda ainainara aanoo irafa maridanoo. Mifa mandainainaki saamurimariasara aanoo irafa kai maridanoo, innee kaqi mina afaariranaki maqee maqee fimarifanoo mifa inni nifauamaseenoo amiqi amiqiannoo, minnisaifanoo inni faqa Yuda maqannaara foora aadana asaanara foora inni rauda aqusaannoo.
23 Yuda maqannaasa nariqa dapi nirana minnisee quandaki kafaa aniraifanoo Anutufa misa qumaree nári nimaaqaki kafaa ookaa iannoo, Anutufa mina faqa amanaikamiannoo.
24 Asumu saqari asaana ateekasee narí amaaqakina ookaamandainanoo dauni ururaannoo, mi oosanafa sia kadaapirirafa maridanoo. Kaasau saqari asaana ateekasee asumu maraqa nua oosanaki ookaa inanoo sia dauni dauni kambiqaannoo kadaapiruannoo. Minara irisee Anutufa Yuda maqannaasa oorifa saqari asaanara foora raqaqa mariasa amana mareeqee narí amaaqakina kaifaa ookaa inoo sia kadaapiruannoo. Innee aanaamuru mariasa kaasau oorifa saqariara foora mariafanoo asumu saqarikina innee ookaamaqaifaqa mariafanoo. Innee sia Anutufa kafaa Yuda maqannaa ookaa ianinnanara sia amanee qiaqa, doo Anutufa amana sia kadaapi maridanoo, kaqimma ookaa iannoo.
Anutufa aanaamuru naaree marasee miqoo Yuda maqannaa naundura quandaannoo.
25 Oo qini qikaqaafasaauqa moo kukeeqara ufa inniara iriaqeera qimannimianaura, innee maa ufana iriseeqa inneeqa noori uqeerarana mara maqaruseeqa miqooqari reendeenamandee marifaranoo. Mi anoona ufafa maaqimminoo maridanoo. Isaraee maqannaasa naaqooki ooni ititarafa sia naaruara miqinoo mariannoo. Anutufa qinoo aanaamuru marinausakiqari qinee qeeqa qiafanausa misa kai Yisufinnai irirana ubeekaifaqa Yuda maqannaa naaqooki ooni ititarana tatusaanaqa misa faqa anifaranoo.
26 Maaqimmasee aiqama Isaraee maqannaasa Anutuna asumu marirana mareefaranoo. Tamummaqara fasiqauqa maa ufamau mareefaranoo.
Asumu maree marifa Sioona maqusai moo auqu Yeerusaree mi maqusanaindari aniree asumu marirana
nimiannoo. Mifa Yakooboona aiku asauku mina atiuqa mariasa mandainaina aiqama rukannisaannoo.
27 Mikari qinee Anutusa Yuda maqannaasa aaqarana akiaqara mara aqunniseeqa qinee Anutusa qeeqa moodaanakikirafa ufa Abarahaamana faqa Isakeena faqa Yakooboona faqa ufa qiafannana mikari mi ufana anoona doo anoonaikiannoo.
Tamummaqarausa ufa miqinoo marinara qinee Pauroosa maaqi qidaqa.
28 Yuda maqannaasa Yisuna amiqira fasaasa ufa minnisoonara Anutuna ufaasu namuqaa kammiqa maridaqa. Sia fifau, inni aanaamuru mariasara iriseenoo Anutufa miqimma nimaqasoofaqa miqidaqa. Anutufa Abarahaamana Isakeena Yakooboonara iriseenoo, aiqama aanaamurukinaana rusandeesamumandee maroonara iriseenoo misasaa aruakinausa misa amiqi amiqimma nimaqoonara iriseenoo Isaraee maqannaasara qini qiqoondi fee qidanoo.
29 Anutufa narí rusandeesamumasee maree mariasara faqa narí amiqi amiqimma nimaqee mariasara faqa sia qaara iriranaikidanoo andeeqaidanoo sia kaaqa Isaraee maqannaa namuqaakinoo, ufaasu kai.
30 Innee aanaamuru marusa ooqai ufa rukiee marusa mariafanoo doo maqee Yuda maqannaasa ufa rukioonara faqa innee mina ufa irunara Anutuna nifauarana maree mariasa mariafanoo.
31 Miqi kaimmasee innee aanaamuru Anutuna nifauarana maree mariafanoo Yuda maqannaasa faqa Anutuna nifauarana maraaqeera ufa rukiaranaki quqasoofaqa mariafanoo.
32 Anutufa aiqama maqannaasa narí nifauara oosana uqannifiqaanifeera aiqama maqannaasa ufa rukiarana ameemaanai mara quqasoofaqa Anutuna nifauarana oosana qafaaqeera.
Pauroofa Anutuna amooqu ufafa.
33 Oo Anutuna irirafa ainaina faifa firaaqoo maridanoo. Mina irirafa faqa auqarafa faqa firaaqoo farummara foora meemai unaurinoo maridanoo. Mina naamuaqira ufa oosana yafee mina iriannoo fee, sia amanaikidaqa. Mina nirana yafee iriannoo fee.
34 Tamummaqara fasiqauqa minara maaqi qiqau.
Yafee karaambaiqa irirana faasai iriannoo fee yafee fuki faaki iannoo fee.
35 Yafee moo ainainara qufiqeenoo qimianifee qimasee amiannoo fee. Sia moo fannoo amanaikiannoo.
Doo tamummaqara fasiqa ufa miqimminoo maridanoo qinee Pauroosa minara maaqi qidaqa.
36 Naqimasee moo fannoo Anutuna moo ainaina amiannoo fee narí kai aiqama ainaina auqufa minaindi kai maridanoo. Aiqama ainaina minasaa qaraafa kai afeekaikinoo maridanoo. Aiqama areenarafa naaru naaru Anutunaindi kai mariannoo. Kuqaa.