15
Sia aneenna aidiramau fua.
1 Maasa Yisuna saqarikiranaki afeekaiki mariasa quandaki ureeqarausa qumaara dinni ati dadaaqi akumaraa, sia maasa qeeqa didiranamau kai fua.
2 Maasa naadu naadu qeeqa qikaqaafasaa narí Yisuna saqarikirana dadaaqiananoo afeekaikiani. Sia aneennara iria, aneenna akaqaafasaa amiqi amiqianifeera minara irisee dadaaqia.
3 Asauku mundirafa ririmma, sia narí aidiramau finoo, narí akoona Anutuna aidiramau finoo tamummaqara fasiqa minara maaqi qimasee akara rinau.
Faiqí anaasee Anutuna aqira ufa mandufa qimarifa qinisaa aqufinoo.
Tamummaqara fasiqa mi ufana qimasee akara rinau.
4 Aiqama tamummaqara fasiqauqa akarakinaa ufa sia fifau akara riqau maasa naamuaqidee qimasee akara riqau, maasa mi akaranakinaa ufa dadaaqidaqa fuki faaki qirana faqa ubiqafi marirana faqa marasee miqandannai Yisunara asasammasee afeesirana maraaqeera akara riqau.
5-6 Anutufa ubiqafi marirana akoofa faqa dadaaqira fuki faaki qirana akoofa faqa maridanoo. Miqi mari Anutufa inni dadaaqinaqa innee asauku mundirana Yisuna aanna ramaseeqa innikina sia aanoo irafa mariannoo moodaa irirafa mariannoo. Moodaa irirafa innikina marinaqa aiqamausa moodaa ufa kai qimasee asauku mundirana maasa karaambaiqa Yisuna akoona Anutuna amooqiaqa.
Anaamuru misa Isaraee maqannaa faqa Anutunara dufi dufi qifaranoo.
7-9 Asauku mundirafa inni qumaroonara irisee innee nariara nariara aqoondikifaqa faiqí anaasee inni nindafamasee amiqira oosana maraidammiafoo qimaseeqa inni Anutuna amooqiaqeera. Anutufa narí qimaqoo ufamau fuanifee qimasee asauku mundirafa Yuda maqannaa mara firira faiqiara foora ainainammannimaqara faiqi kamambinoo marinau. Anutufa Abarahaamana aiku asauku faqa qima afeekaikammasoonara kambiqaanifeera qimasoofanoo asauku mundirafa Yuda maqannaasa ainainammannimaqara faiqi kamambinau. Anaamuru mariasa anireeqa Anutufa misara amuqusufanoo nifauaranara faqa Anutuna auqu uqeerasee amooqiaqeera asauku mundirafa minara faqa Yuda maqannaasa ainainammannimaqara faiqi kinau. Tamummaqarausa akarakinaana minara maaqi qinau.
Qinee aanaamuru namufaqa maridaqa misa saimbaqa aniara dufi dufi qianaura.
Miqooqari anauqu uqeeraseeqa idi raida ani amooqianaura.
10 Tamummaqarausa akarakinaafa moo maaqi qidanoo.
Innee aanaamuru mariasa Anutufa utaaqama nimaqee marisa Yuda maqannaasa saimbaqa dufi dufi qimasee asasiaqa.
11 Moo tamummaqarafa maaqi qinau.
Aiqama aanaamuru mariasa karaambaiqa amooqiaqa.
Aiqama maqannaasa firaaqoo mina amooqiaqa.
12 Kafaa moo tamummaqarafa maaqi qinau.
Yeeseena atiki moo kambiqaannoo, mifa findifinoo aanaamuru rakisiannoo, misa quandaki nári irirana minaki rusifaranoo.
Tamummaqarausa ufa Yisunara miqimmiqau.
13 Anutufa maasa innaarunaira afeesirana oosanafaqaafa maridanoo, mifa kai innee mina saqarikiranannai aiqama asasirana faqa asooarana faqa innikina qumbiqannimaqaannoo, Anutuna naaquqara andeeqara maraquna afeeka fannoo inni dadaaqinanoo innaarunaira asasammasee afeesirafa mi asasirafa qumbiqeenoo teeqiannoo.
Pauroofa afeeka ufa Roomma maqannaasa akara rumannimaqoonara qinau.
14 Oo qini qikaqaafasaauqa qinee Pauroosa inni Roomma maqusai mariasara qidaqa. Qinee inniara amiqirafa faqa irirana faqa qumbiqarausee qidaqa innee Roomma maqusanaasa amiqira irirana narí uqafiqee narí uqafiqee qimariasa amana mariafanoo.
15 Innee miqi marifaqa qinee maa pasanakina sia reendeenamandee inni naaqoo auqeeqa oosana oosana ainainara inni naaqoo firaaqoo auqeeqa.
16 Anutufa amiqira ainainirana qini qiminau. Qinee asauku mundirana Yisuna saikaki quqaqisaifaqa maridaqa aanaamuru qimannimiranaki maridaqa.
(Mooseena uqiqaana maaqakina Anutuna aanaiqikira fasiqauqa sipsipa aanaaqi amiqirana kai faiqí aanaaseendi mara maree mini ooninnai auqira qaindasaa quqasee arusee aandau tatufirana Anutuna suqa amimariqau.)
Qinee aanaamuru faqa Anutuna faqa aanaiqikirausara foora marunnanara maa akaranaki afeeka ufa inni nimiqa, kaqiqeesa marifaqau sia afeeka ufa qimannimini ireeda kai qimannimini inni aanaiqikirausa maridaqara afeeka ufa qimannimidaqa. Anutuna naaquqara andeeqara maraquna fannoo aanaamuru mariasara Anutunaindi fee qimasee misauqa marirana nirana Anutuna aidirana amana kai mariaqeera minara kai Anutunai aanaiqi kirausaikidaqa maridaqa.
17 Qinee asauku mundirana Yisunasaa moodaanaki kamambi maridaqa maqasaa mi saikanaki marunanoo didimarifaqa asasidaqa.
18-19 Asauku mundirafa naaquqara maraquna qimifanoo dadaaqifaqa qeeqa ufannai faqa qeeqa kadaapiriranannai faqa sia faiqí maraaqaa ira ainainannai faqa minauqannai qinee aanaamuru Anutuna ufa qimannimimariafanaqa iriqa mi mau fidaqa, asauku mundirafa dadaaqinara firaaqoo qifaaqa quqasee afeekaikamandee qimannimianaura. Qinee miqidaqa amiqira fasaasa ufa asauku mundiranara aiqama ufatia qimannimiqa Yeerusaree maqusa dinni Iririkumma maqusa dinni mi qambaana saqanna mariasa aiqamausa qimannimimaree fifainidaqa.
20 Asauku mundirana aufakiana sia irimariasa kai qimannimiqa, qeeqa ufa moona ufa amuaaqa rusianoora saina sia irimariasa kai qimannimia, ooqai indaaru doo qinee mi iriramau fidaqa. Mi mau fidaqa tamummaqara fasiqa ufamau fidee qidaqa.
21 Ooqai mi tamummaqara fasiqana ufa minara maaqi qinoo maridanoo.
Sia minara qimannimusa mina qafeefaranoo.
Sia irusa minara naaqoo irifaranoo.
Pauroofa Roomma maqusai firaree qimasee qimaqoo ufafa.
22-24 Qinee Pauroosa moomoo kari inni Roomma maqusai fuaneerunanoo oosana oosana ainainirafa rafaaqafufaqa doo maqee maa saqa saika taikasee moomoo aukuana innee iannai fuanee qimarunausa doo maqee qusasaa firaridaqa. Qinee Sipeena maqusai fidaqa inni Roomma maqusanaasa faqa namummaqeeqa inni faqa asasammasee marikammasaanaqa innee Sipeena maqusai fuannana qiku auqirana dadaaqiaqee qidaqa.
25 Inni maqusai fuani qunausa doo maqee Yeerusaree maqusai fuanaura oonureeqa oonurandee aiqareeqa inni maqusai fuanauranoo. Yeerusaree maqusai ooru fidaqa miqoo Anutuna ufa irimariasa dadaaqianaura.
26 Maseedoonia maqa maaqakinaasa faqa Kirisa maqa maaqakinaasa faqa Yisuna ufa irimariasa nariqa munnimma aiqamausa ruaummasaafaqa Yeerusareenni Anutuna ufa irimarusa ainaina naranara sarauirausa mi munnimmana nimiraree qimasee qinisaa saafaqa maree ooru firarammidaqa.
27 Maseedoonia maqa maaqaki mariasa faqa Kirisa maqa maaqaki mariasa faqa nariqa kai ruaummasee Yeerusaree maqusanaasa nimiraree qidaqa, sia qineefau qiqau. Indaaru Yuda maqannaasa nári innaarunai fira amiqira ufa Yisuna ufara aanaamuru naida nimisoonara mi aikana narinoo marina mi aikana tatiqa maqasaa amiqi amiqira ainainara munnimma nimifaranoo. Anaamuru mariasa miqiaqaana andeeqara oosana maridanoo.
28 Qinee maaqooqaraasa suquseeqa nimira munnimma mareeqa Yeerusaree maqannaasa aiqama uqanna munnimma nimiseeqa oorurandeeqa inni Roomma maqannaa faqa qumu maridaqa asasidaqa amiqidaqa marianaura, doo marikiqa Sipeena maqa maaqaki oonuree misa faqa Yisunara qimannimianauranoo.
29 Qinee inni Roomma maqannaa iannai oonuree maa ainainnara iridaqa. Qinee asauku mundirana afaaqooqa qiranasaa fidaqa mina amiqi amiqirana inni nimianaura.
30 Oo qini qikaqaafasaa qinee Pauroosa afeekaikamasee inni qimannimidaqa. Innee qiniara Anutufinnai innaaru qiranannai qini dadaaqiaqa, Inneeqa nimuqusa ookiqari afeekaikamandee qiniara innaaruqiaqa. Innee faqa qinee faqa asauku mundirafa Yisufa maasa karaambaiqa minasaa atooqafi marunausa maridaqa minara irisee qiniara innaaru qiaqa. Anutuna naaquqara andeeqara maraquna fannoo nariara náriara nimuqusirana maasa firaaqoo qimuna innee minara faqa iriseeqa qiniara innaaru qiaqa.
31 Qinee maindari Yeerusareenni ooruree misa nimiraree qia munnimmana nimianaqa Anutuna ufa irimariasa minara asasiaqeera innaaru qiaqa. Miqoo Yeerusareenni qinee marianaqa innee Anutunara innaaru qimaqimaqaaqa Yeerusareenni mariasa Anutuna ufa sia irimariasa qini darirarammidammia. Innee misara innaaru qiqa qini sia daruaqee innaaru qiaqa.
32 Qinee Yeerusaree maqusaindari amiqimandee oorurandee qumuraananoo Anutufa qinnanara inni Roomma maqannaasa faqa kaqikaaqoo idooamaseeqa asasammaseeqa aiqaree fuanaura.
33 Anutufa maasa asooara oosana fannoo inni aiqama Roomma maqannaa faqa mariani. Kuqaa.