4
A Nipara na Velenga Kamumu
Lakea i uka ma ge tohai a kuligu ni tovo e huriki na nitana Vure, a vuhuna a Vure i dodo iau, i habia nau a leho iea. *Pali a marikoi hateka a naro hale kapiloho a naro ni maruhu. A marikoi ni tami e huriki. A marikoi ni palele a nita na Vure. A ta kavakava kunana na ngava muholi, e huriki ri gi matakilala na hatene ria, iau a bakovi navai na matana Vure. E huriki ranga ri taki ta a Velenga Kamumu nau i uka ma i kavakava. A hini i uka ma i kavakava ne ria, a vuhuna ri velu, bara ri puru na kanono. *A vure na malala* i vakauvo a niluhoi ne huriki i uka ma ri luhoi torea e Kristo, i uka ma ri gi matai a nipara na Velenga Kamumu na bagetuanga ne Kristo, re Kristo ia a Vure. Iau a vara e huriki, i uka ma a bibi rike mule a ragu. A tovo e huriki vona e Isu Kristo a Bakovi Dagi, pali iau a vora ne mua na ningaru ne Isu. *A Vure, ra viri i ta maea, “Ge palala,” ia kunana a Vure i vakapalala a gine hita, si gi lohoka vona a bagetuanga na Vure, ra i para na matane Isu Kristo.
A Ulo
*A mahala nga i tabuli pololilo nau, ra iau a maki tavula manga a ulo. I vakasiri manga a uka nitora. A nitora lobo na Vure. *Iau ni vakamadihi na naro i kupo, pali i uka ma a vurua. A loho lege, pali i uka ma a rihate. E huriki ri habi a nimadihi nau, pali a Vure i uka ma i lohopile iau. E huriki ri lagu iau, pali i uka ma a mate. 10  *Na parava vakaroro e huriki ri ngaru ni rabalaki iau, i manga hosi ri ratea ne Isu. Na naro iea, i bele kavakava ne huriki, ne Isu i mahuri mule pali na matenga. 11  *Na tahuna a made na malala, i tahoka e huriki ri ngaru ni rabalaki iau a vuhuna a ramaia e Isu. Na naro iea, e huriki bara ri matakilaka vona e Isu i mahuri mule pali na matenga. 12 I mavonga, na parava vakaroro a popote ga mate, lakea mua mu gu bole a nimahuri vakaroro.
13  *Iau a luhoi torea a Vure, i manga a viri i herea na hinere, i ta maea, “A luhoi tora ioe, lakea a taki tala.” Iau tara a luhoi torea a Vure, lakea a taki tala. 14  *A lohoka vona a Vure i vakamahuri mulea e Isu a Bakovi Dagi. I mavonga, bara i vakamahuri mule hita turane Isu, ge bole hita, si gi made turana. 15 A kaloho a maregoa nga ne vona ni tuhori mua, lakea a naro kamumu na Vure ge bele ne huriki ala kupo, ge vano vano, bara e huriki ala kupo ri kavurikea a Vure, ri vakabagetua.
16  *I mavonga, i uka ma ge tohai a kuligu. A maka maregoa ri rata a kakaigu i viru, i malulu. Pali a Vure i vakatora a hategu na parava vakaroro. 17  *A maka maregoa a bole na parava i popote ngane, i uka ma a maki dagi hateka, a vuhuna i rata puru nau a bagetuanga i dagi hateka, ge tabuli vakaroro. A bagetua nga ri rangi hateka a maka maregoa a bole ngane. 18  *Ngane i uka ma a roe na maki a matai. A roe na maki si keri ni matai, a vuhuna a maki si matai ngane i uka ma ge tabuli vakaroro. Pali a maki si keri ni matai ngane bara ri tabuli vakaroro.
* 4:2 2Ko 2:17; 1Tes 2:5 * 4:4 Epe 2:2; Kol 1:15; Hib 1:3 * 4:4 A vure na malala, re Satan. * 4:6 Vuh 1:3; Ais 9:2; 2Ko 3:18 * 4:7 2Ko 5:1 * 4:8 2Ko 1:8; 7:5 * 4:10 1Ko 15:31 * 4:11 Rom 8:36 * 4:13 Sng 116:10 * 4:14 1Ko 6:14 * 4:16 Epe 3:16 * 4:17 Rom 8:17-18 * 4:18 Kol 1:16