23
A Vinara na Naro Kamumu
*“Na tahuna mu longoa tara ngava taminga, naha ni vakalongo lae. Naha ni tuhoria a bakovi, ge tami a mari ni pelekado a maregoa na tahuna i pelekadoa a ngava vona. Naha ni ramai e huriki ri rata a naro hale. Naha ni tuhori e huriki ri gi tami a mari ni pelekado a maregoa. *I mavonga tabu, naha ni tuhoria a matasia ge tatami na tahuna i pesi na matana mari ni pelekado a maregoa.
*“Na tahuna mu matai a bulmakau, a donki na gimane mua i puka a nure i laho viliha, mu bae mulea na tahona. Na tahuna mu matai a donki na gimane mua i kaloho a maki i boru, mu tuhoria a donki vona ge kaloho rikea a maki i boru turana.
*“Na tahuna a matasia ge lakea na mari ni pelekado a maregoa ge longoa a ngava vona, naha ni tami virihia na ngava. Naha ni rata a ngava taminga ni kau virihia na ngava hale a bakovi i malamala, ma ni gi rabalaki tavula. Ra bakovi i kau virihi tavula a viri na ngava, a uka ma ga pugea a naro hale vona. Na tahuna a bakovi i luke mua na moni mu gu tuhoria na ngava, mu gu tami a mari ni pelekado a maregoa, naha ni bole a moni. Ra naro maea i vakaviliha a niluhoi na ngava na bakovi kamumu.
*“Naha ni rata hale e huriki a mosi ri made na tanga ne mua, a vuhuna hosi mua ranga mu made manga a mosi o Egipto.
A Vinara na Parava Nimalo
10  *“Na pida i polotara mu leho na hania mu ru kadolu a maki ni kani. 11 Na poloruana pida, naha ni leho na hania, a malala ge malo. Naha ni bole a maki ni kani i rike na muriki na tahuna a malala i malo. A vinara i taku kunana mu ratea na hania na viri i varo a oliv. E huriki a matasia kunana ri gi bole a maki ni kani na muriki, muri a maka livoa ri gi kani paru a maki na muriki i bole kaleva e huriki a matasia.
12  *“Na vik lobo mu leho na parava ge polotara, na parava polorua naha ni leho, a vuhuna a maka donki, a bulmakau, e huriki a vorakato, a mosi ri laho ri made turane mua ri gi malo, ri gi bole a nitora.
13 “Mu longo kamumu mu ramai a maka ngava a habi ne mua. Naha ni vasileki na maka vure ranga, naha ni gale a rane ria.
A Parava Dagi na Habu
(Nimariu 34:18-26; Vinara 16:1-17)
14 “A habu ge tolu ne vona ni kavurike iau, ge balaka tolu na pida lobo.
15  *“Mu ratea a Habu na Bret i Uka Is, mu kavurike iau. Mu kani a bret i uka is na parava ge polorua i manga a ngava a taki mua vona. A habu iea mu ratea na keva e Abib, a vuhuna na keva iea kunana mu mariu tala o Egipto. Na tahuna mu valai ni kavurike iau, mua takutaku mu bole a nihabi mu habi nau.
16  *“Mu rata a Habu na Nimirio na tahuna mu vakatubu ni vila kadolu a vit i moro. Na nilobona pida na keva i rara vona a maka kanena kai, mu pasi a maka kanena kai, mu malo na maka kape ne mua, mu ratea a Habu na Nivapopo.
17 “Na pida lobo mu rata a habu nga i tolu, mu kavurike iau e Bakovi Dagi a Vure.
18 “Na tahuna mu habi a nihabi nau, naha ni habi a sipsip a bulmakau turana a bret i tahoka a is. Mu gutu lobo a vina, ra mu habi nau. Naha ge tabuli ranga ge palala taho a hini na parava muri.
19  *“Mu bole a maki ni kani ri moro muga, mu bole lakea na roho e BAKOVI DAGI a Vure ne mua. Naha ni nono a tuna meme na namona ruru ne kinana.
A Agelo na Vure i Vakasiri a Dala
20 “Mu longo kamumu, ga rudua a agelo nau ge muga mua, ge matakari mua na dala. Ge vano ge taparaki mua na robo a kisi purua ne mua. 21 Mu longototoa, mu ramaia a ngavana, a vuhuna iau a made turana. A agelo nau i uka ma ge puga a naro hale ne huriki ri longotaro a ngavana.
22 “Mua bara mu longototo a ngavana, iau bara a taga ne mua ga ratapile e huriki a pile ne mua.
23 “A agelo nau bara i muga mua, mu bele na malala ne huriki a Amor, a Hiti, a Peres, a Kenan, a Hivi, a Iebus. Muri bara vakalobo liu ria. 24 Naha ni lolu puru ni kavurike a maka vure ne ria. Naha ni ramai a naro na nivasileki ne ria. Mu ratapile, mu ubikeve a maka vure ne ria ni rata na kedo. 25 Mu kavurike iau kunana, e BAKOVI DAGI a Vure ne mua. Mu rata mavonga bara rata kamumu mua, a vakani, a vakaninu, a vakatavaga mua na gilanga. 26 Ga matakari e huriki a ngatavine ri singou ri gi poda kamumu. Ria lobo bara ri tahoka a koma. Ga matakari mua bara mu made tabaka na malala.
27 “Ga muga mua, ga vakamangenge, ga vakavaroru e huriki a pile ne mua, bara ri ngalakapulo ri ha. 28 Ga rudu muga a maka vuvu ri gi tura e huriki a Hivi, a Kenan, a Hiti, ri gi lili tala ria. 29 Pali iau, i uka ma ga lili tala ria na pida ge taku, a vuhuna maka livoa hateka bara ri bele kupo, ri tahona vona a robo, ri ratapile mua. 30 Ga lili tala gosi ria, ge harena na tahuna mu bele kupo mu bolea a malala ne ria.
31 “A harena malala ne mua ge vakatubu na Dari Vururu na tabeke ne Akaba ge vano ge harena na Dari na Kurukuruna Malala.* Na tabeke mule sike ge vakatubu na naru dagi e Iupretis ge harena na tabeke i ngeki tano. Ga habi a nitora ne mua, bara mu dili vona a malala iea mu ratapile e huriki ri made vona, mu lili tala ria. 32 Naha ni valongo mai a ngava turane ria, naha ni ramai a vure ne ria. 33 Naha ni longo ne ria ri gi made na robo ne mua, ma ri gi piu rike mua, mu gu rata a naro hale nau. Mua bara mu kavurike a maka vure ne ria, bara mu matasia, mu bala maki!”
* 23:1 Nim 20:16; Levi 19:11-12; Vin 5:20 * 23:3 Levi 19:15 * 23:4 Vin 22:1-4 * 23:6 Levi 19:15; Vin 16:19 * 23:9 Nim 22:21; Levi 19:33-34; Vin 24:17-18; 27:19 * 23:10 Levi 25:1-7 * 23:12 Nim 20:9-11; 31:15; 34:21; 35:2; Levi 23:3; Vin 5:13-14 * 23:15 Nim 12:14-20; Levi 23:6-8; Gi 28:17-25 * 23:16 Levi 23:15-21,39-43; Gi 28:26-31 * 23:19 Nim 34:26; Vin 14:21; 26:2 * 23:31 A rana tara a dari ne Palestina.