35
A Vinara na Parava Nimalo
E Moses i gale palupu e huriki a Israel i taki ria, “E BAKOVI DAGI i taki mua mu gu ramai a vinara nga: *Na vik lobo mu tahoka a parava i polotara ni leho. Pali a poloruana parava ia a Parava Nimalo, a tabea, naha ni rata a leho, a vuhuna a parava ne BAKOVI DAGI. A viri i leho vona a parava iea, ni gi rabalaki. A leho kiroko ni nami a kanono tara naha ni ratea.”
Ri Pape ni Hae a Kape
(Nimariu 25:1-9; 35:10-19)
Muri e Moses i taki e huriki a Israel na ngava e BAKOVI DAGI i taki. “Iau bara vivi vona a nihabi na viri i ngaru ni habi a maki. Na tahuna mu ngaru ni habi a maki, mu habi a gol, a silva, a bras, a kala kamumu, a maka vuna sipsip i gomagoma, i kuakua, i vururu, a kala ni rata na vuna meme, a kulina sipsip a toga ni kalu vururu, a kulina lui, a kai a akas, a namona oliv ne vona a lam, a havu mangisipa ni vuli turana a namona oliv ne vona ni gamai, ne vona a havu mangisipa. A kedo oniks, a kedo parahidi ranga, mu habi ni gi topi na harena bagetua, a kala kiroko na ngalana prister.
A Maka Mahalana Kape
(Nimariu 39:32-43)
10 “E huriki a mari ni ratana maki, ri gi valai, ri gi rata a maki e BAKOVI DAGI i vakuku ria vona; 11 a kape, a maki ni kapi a kape, a maka kinau, a maka mito na nure, a maka karo ni gi kolo tavalavala na gaga, a maka butu, a maka vuhu-butu ge pesi langa vona a butu; 12 a tava turana a binolena, a murina nidodo, a kala dagi ne vona ni kapikari a tava; 13 a dede turana a mahalana, a binolena dede, a bret ni gamai; 14 a butu na lam turana a mahalana, a namona oliv ne vona a lam; 15 a dede na havu mangisipa turana a binolena, a nibiri nigamai, a havu mangisipa, a kala dagi ni gi vakatavore na matana kape; 16 a dede na nihabi gutu-vuro turana a bras ni gi kolo na vahana, a binolena, a mahalana, a tavila turana a dede vona; 17 a kala dagi, a maka butu turana a maka vuhu-butu ne vona ni tura halui a mailo na kape; 18 a maka niroka na butuna kape, a maka niroka na mitona nure turana a maka motane ria; 19 a maka bagetua kamumu ni rodo ni leho na kape. Ra bagetua ni taba ne Aron, a nirodo ne huriki e tuna bakovi, ri gi rodo na tahuna ri rata a leho na prister.”
20 Muri e huriki a Israel ri pea e Moses ri vano. 21 A nitane Moses i vakarike a hatene huriki, ri ngaru ni habi a maki. E huriki a mari ni leho ri valai ne Moses ri tuhoria. Ri bole valai a maki ne vona a leho na Kape na Vaponga, ne vona ni kavurike a Vure, ne vona ni rata a bagetua ni taba na prister. 22 Ri bole valai a maki legelege, a pato, a bio, a bagetua ranga ni rata na gol, ge a nihabi nitabari ne BAKOVI DAGI. 23 E huriki ri bole valai a kala kamumu, a maka vuna sipsip a meme i gomagoma, i kuakua, i vururu, a kulina sipsip a toga ni kalu vururu, a kulina lui. 24 E huriki ri tahoka a silva a bras, ri bole valai ri habi ne Bakovi Dagi. E huriki ri tahoka a kai a akas, ri bole valai ne vona ni hae a kape. 25 E huriki a mari ngatavine ri lohoka ni rata a hotu, ri bole a maka vuna sipsip i gomagoma, i kuakua, i vururu, ri rata a hotu. Ri rata a hotu keakea ne vona ni ratana kala kamumu. 26 E huriki a ngatavine ri lohoka kamumu ni ratana maki na vuna meme, ri rata. 27 E huriki a matakari ri bole valai a maka kedo parahidi ne vona ni rahi dili na harena kala kiroko na ngalana prister dagi. 28 Ri bole valai a maka maki mangisipa, a namona oliv, ne vona a lam, a nibiri ne vona ni gamai, a havu mangisipa. 29 E huriki a bakovi a ngatavine o Israel ri ngaru ni habi tavula a maki ne vona a leho ne BAKOVI DAGI, ri ramaia a ngava e BAKOVI DAGI i vakuku e Moses vona.
E Besalel e Oholiap
(Nimariu 31:1-11)
30 Muri e Moses i taki e huriki a Israel, “Mu masia, e BAKOVI DAGI i vulakia pali e Besalel, e tune Uri bakovi, e tubune Hur na kabu ne Iuda. 31 A Hanuna Vure i habia a lohokanga kamumu vona ni ratana a maki na limana. 32 I lohoka pali ni ratana maki na gol, a silva, a bras, 33 ni ratana maka kedo parahidi ge a bagetua, ni kau a hanuna maki, ni rata a maki ranga na lima. 34 E Bakovi Dagi i habi a lohokanga vona turane Oholiap, e tune Ahisimak bakovi na kabu ne Dan, ru gu tovo e huriki ni ratana maki na limane ria. 35 I habi a lohokanga kamumu na bakovi nga, ru gu rata a maka leho ni ubi kamumu a kedo parahidi, ni kau a hanuna maki na kai, ni rahi a maka kala kamumu. Ru lohoka ni ratana maka bagetua na hotu ni rata na maka vuna sipsip i gomagoma, i kuakua, i vururu. Ra bakovi nga, ru mari hateka ni ratana maki na limane rua.
* 35:2 Nim 20:8-11; 23:12; 31:15; 34:21; Levi 23:3; Vin 5:12-14