36
Nimariu “E BAKOVI DAGI i habi a loho­kanga kamumu ne Besalel e Oholiap turana a mari ranga, ri gi haea a kape. A leho ne ria ri gi ramai kunanea a nitane BAKOVI DAGI.”
Muri e Moses i gale e Besalel e Oholiap, turana e huriki a mari e BAKOVI DAGI i habi a lohokanga ne ria, ri ngaru hateka ni ratana leho ri valai. Lakea e Moses i habi ne huriki a mari a maka nihabi na kape ri ru kadolu. Pali na hatelanga takutaku e huriki a Israel ri tababana ni habina maki ri ngaru ri gi habi. E huriki a mari, ri matai a maki i kupo hateka, lakea ri takia e Moses, “E huriki ri habi i kupo hateka a maka maki e BAKOVI DAGI i ngaru.”
Lakea e Moses i talo rike a ngava viliha na mada, i taki e huriki, “Naha ni habi tabu ranga maki ne vona a kape.” Ri longoa a nitana, i uka ma ri habi tabu ranga maki, a vuhuna a maka maki ri habi pali i kupo hateka, bara i tabuli tavula ranga.
A Mailo na Vure Ni Hae
(Nimariu 26:1-37)
E huriki a mari ri haea a mailo na Vure, ri bole a maka kala i ravulu ri vakabagetu na hotu gomagoma, na hotu kuakua, na hotu vururu ni rata na vuna sipsip, ri rahi na kala nga a hanuna agelo. A niolana a kala i taku i ravulu a polona i rua a mita, a nibolana i rua a mita. A maka kala lobo ri palupulupu. 10 Ri rahi palupu a maka kala i lima, ri hudo tala i manga a kala i taku. A kala i lima tabu ranga ni rahi palupu. 11 Ri rata a maka halui na kala gomagoma ni varomu na harena kala dagi nga i rua. 12 Na kala muga ri kolo dili na harena a halui i ravulu lima. Na harena a kala tara ri kolo dili tabu a halui i ravulu lima. 13 Ri rata na gol a kinau i ravulu lima, ri varaki palupu a tabekena kala dagi nga i rua, i bele manga a kala i taku.
14 Ri ratea a kala dagi ne vona ni kavitagu a mailo na Vure. Ra kala dagi iea ni rata na kala i ravulu a polona i taku, ni rata na vuna meme. 15 A niolana a kala i taku i ravulu a polona i tolu a mita, a nibolana i rua a mita. A maka kala nga ri palupulupu. 16 A kala i lima ni rahi palupu, a kala i polotara tabu ranga ni rata mavonga. 17 Ri kolo na harena kala tara a halui i ravulu lima, na kala tara i ravulu lima. 18 Ri rata na bras a kinau i ravulu lima ne vona ni varaki palupu a kala nga i rua, ge manga a kala i taku. 19 Muri ri ratea tara kadis na kulina sipsip a toga, ni kalu vururu, ne vona ni kavitagu tabu a mailo. Ri rata tabua a toluna kadis na kulina lui, ri ru langa tabua.
20 Ri rata na kai a akas a maka mito ne vona a mailo. 21 A niolana a mito i va a mita, a nibolana mito i ravulu polotara a polona i polotara (66) a sentimita. 22 Ri rata a maka mito ge ola popote, ne vona ni vonu dili na vuhu-butu ge vakatora a nure. A maka mito ri palupulupu. 23 Ri vakapesi na tabeke mule puru a mito i ravulu rua, 24 turana a maka vuhu-butu i ravulu va ni rata na silva, ge pesi langa vona a maka mito. A vuhu-butu i rua ru tabuli polotano na mito i taku. 25 A mito i ravulu rua tabu ranga ri vakapesi na tabeke mule sike. 26 Ri rata na silva a vuhu-butu i ravulu va ge pesi langa vona a mito. 27 Ri vakapesi na bitona mailo a mito i polotara, na tabeke na nirolona haro, 28 turana a mito i rua na nimodo na bitona mailo. 29 Ra mito na nimodo i tahoka a mito ni lapi turana. A nimodo i rua tabu ni rata mavonga. 30 Na bitona mailo i tahoka a mito i polotolu, a vuhu-butu ni rata na silva i ravulu a polona i polotara (16), ne vona ni vakatora a mito na nure. A vuhu-butu i rua, ru tabuli polotano na mito i taku.
31 Ri kau na kai a akas a karo ri ru tavalavala, ge vakatora a gagana nure. A karo i lima ni kolotata na tabeke tano, 32 i lima na tabeke meli, i lima na bitona mailo na nirolona haro. 33 Ri ratea a karo tavalavala na kurukuruna nure, i tubu na tabeke koea, i harena na tabeke tara. 34 Ri naviri na gol a maka mito, ri kolo dili na karo a maka halui ni rata na gol, ri gi tangotata a maka karo tavalavala ni lapi na gagana. Ra maka karo nga, ngi ranga ni kavitagu na gol.
35 Ri rahia a kala dagi ri vakatavorea pololilo na kape. Muri ri vakabagetua na hotu ni rata na vuna sipsip gomagoma, na vuna sipsip kuakua, na vuna sipsip vururu. Ri rahi dili na kala dagi iea a hanuna agelo. 36 Ri rata na kai a akas a butu i va, ne vona ni vakatavorea ra kala dagi iea. Ri kavitagu na gol a maka butu nga, ri kolo dili ne ria a maka kinau. Ri rata na silva a vuhu-butu i va, ge pesi vona a butu. 37 Na matana mailo na Vure ri vakatavorea a kala dagi ni vai na vuna sipsip gomagoma, na vuna sipsip kuakua, na vuna sipsip vururu, ni rahi dili vona a bagetua legelege. 38 Ri rata a butu i lima, ri kolo dili ne ria a maka kinau, ne vona ni vakatavore a kala. Muri ri kavitagu na gol a mapana butu, a karona kape. Ri rata na bras a vuhu-butu i lima i pesi langa vona a maka butu.