38
A Dede na Nihabi Gutu-Vuro
(Nimariu 27:1-8)
1 E Besalel turane huriki a mari ri ratea a dede na kai a akas, ne vona a nihabi gutu-vuro. A tabekena dede i va i palupulupu i 2 mita 2 sentimita, a nipesina i 1 mita 30 sentimita.
2 Ri kau a tupi na nimodo i va na dede, ri vakamadoko turana a dede i manga a maki i taku. Muri ri naviri loboa na bras a dede.
3 Ri bole a bras ri rata a maka pelete ne vona ni bole a kanono, a maka nikuri, a maka tavila, a maka kaira, a maka tavila ne vona ni bole a habulona kanono.
4 Ri bole a bras, ri rata a maki i va i tahoka a dupi, ri kolo na vahana dede, polotano na maki ni raro halui na kurukuruna dede.
5 Ri rata na bras a halui i va, ri kolo tata na nimodona na dede i va. Ra halui nga, ne vona ni rodo dili a binole.
6 Ri kau a tabekena a kai a akas i rua ga binole, ri naviri na bras.
7 Ri rodo dili na halui a binole na tabekena dede i rua. Ra dede iea i manga a tava ni rata na kai, pali a hini polotano i uka kai.
A Tavila na Hilova
(Nimariu 3:18-21)
8 Ri bole a bras ne huriki a ngatavine ri leho na matana Kape na Vaponga, ri rata a tavila na hilova turana a dedena.
A Mailo na Vure Ni Tura Halui
(Nimariu 27:9-19)
9 Ri rahia a kala dagi ne vona ni tura halui a kape. Na tabeke mule puru a niolana kala i 44 mita.
10 Ri bole a maka bras ri rata a mito i ravulu rua, a vuhu-butu ni vakapesi langa na mito vona i ravulu rua. Pali a maka karona a maka kinau ni rata na silva.
11 Na tabeke mule sike i mavonga kunana.
12 A nure na tabeke na nirolona haro i tahoka tara kala i tavore vonga, a niolana i 22 mita, i tahoka a mito i ravulu ni rata na bras turana a vuhu-butu i ravulu. A maka kinau na butu, a maka karona ni rata na silva.
13 A nure na tabeke na nirikena haro ia tara i 22 mita, a logo i vonga.
14 Na tabeke tara na dilidala i tahoka a kala, a niolana i 6 mita 60 sentimita, i tahoka a butu i tolu, a vuhu-butu i tolu.
15 A tabekena logo tara i rata mavongea.
16 A maka kala kamumu kunana ni rata ni kavitagu a nure.
17 A maka vuhu-butu ni vakapesi a maka mito vona ni rata na bras. A maka kinau a maka karo ne vona ni vakatora a maka mito, ni rata na silva. Ri naviri a maka mapana mito na silva kunana. Muri ri varaki palupu a maka mito na nure na karona ni rata na silva.
18 Ri ratea a kala kamumu na dilidala. Ri rahi dili a maka bagetua vona na maka hotu ni rata na vuna sipsip gomagoma, na vuna sipsip kuakua, na vuna sipsip vururu. A niolana kala i 9 mita, a nipesina i 2 mita 20 sentimita, i manga a kala na nure.
19 Ri vakatavorea a kala iea na butu i va, i pesi langa na vuhu-butu i va ni rata na bras. A maka kinau, a tavana mapana mito, a maka karo ni rata na silva.
20 A maka niroka ni rata na bras, ne vona ni tua, ni vakatora a mota na nure a kape.
A Maka Mahalana Mailo na Vure
21 Ni gi palupu a maka gol, a silva, a bras ni hae a kape na Ngava Dagi vona. E Moses kunana i taki e huriki a Levi ri ratea a leho iea. E Itamar e tune Aron a prister, i matakaria ra leho iea.
22 E Besalel, e tune Uri bakovi e tubune Hur na kabu ne Iuda, i rata lobo a maki e BAKOVI DAGI i vakuku e Moses vona ge rata.
23 A bakovi i leho turana, e Oholiap, e tune Ahisimak na kabu ne Dan. A leho vona ni kau a maki legelege na kedo. I lohoka tabu ni rahi a bagetua na maka hotu legelege, na hotu gomagoma, na hotu kuakua, na hotu vururu ni rata na vuna sipsip.
24 A maka gol i habi e huriki ne vona ni hae a mailo vona, ni gi palupu a nimavane ria i 998 kilo.
25 A maka silva, a nimavane ria i 3,430 kilo. A rane huriki ri habi a maka silva ni here puru na puhu.
26 E huriki ri tahoka a pida i ravulu rua i rike, ri habi a silva i 6 gram. E huriki ri habi a silva ri ala 603,550.
27 Ni bole palupu a kilo na silva i 3,400 ni rata a vuhu-butu i 100 ne vona ni vakapesi a maka mito na nure, a vuhu-butu na butu ne vona ni vakatavore a kala dagi i naviri mulea a Tabeke Nitaba Hateka. A vuhu-butu i taku a nimavana i 34 kilo.
28 A silva i tababana i 30 kilo. Lakea ni bole ni rata a maka kinau, a maka karo, a naviri ni kavitagu a mapana mito.
29 A nimavana a maka bras ni habi i 2,425 kilo.
30 Ni bole a bras nga ni rata a vuhu-butu na matana Kape na Vaponga, a dede turana a maki ri tahoka a dupi, a maka mahalana dede,
31 a maka vuhu-butu na nure ni tura halui a kape, turana a vuhu-butu na dilidala na nure, a maka niroka na nure na mailo na Vure.