3
E Huriki a Israel Ri Tulu Poloa a Naru e Iordan
E Iosua i hadongo na hatelanga pokopoko turane huriki a Israel, ri pea a mada na tanga e Sitim, ri vano ri bele na naru e Iordan. Ri rata a mada na gagana, i uka ma ri tulu poloa. Muri na parava i tolu e huriki a matakari ri laho pololilo na mada, ri taki e huriki ri ta maea, “Na tahuna mu matai e huriki a prister na kabu ne Levi ri gi malaga, ri gi kalohoa a Tava na Ngava Dagi ne BAKOVI DAGI a Vure ne hita, mu malaga, mu ramai ria. I mavonga bara mu lohoka vona a dala mu gu ramaia, a vuhuna i uka ma mu lakea ma vona a hini nga. Pali naha ni laho tabukoi na Tava na Ngava Dagi. Mu marava basi vona ge harena na kilomita ge taku.”
E Iosua i taki e huriki i ta maea, “Mu ramaia a naro ni matapado na matane BAKOVI DAGI, a vuhuna kuduvi e BAKOVI DAGI ge rata a maka nivakasiri na kurukurune mua.”
Muri i taki e huriki a prister, “Mu bolea a Tava na Ngava Dagi, mu laho muga ne huriki.” E huriki a prister ri ramai a ngava i taki e Iosua.
E BAKOVI DAGI i takia e Iosua i ta maea, “Ngane ga tubu ni rata e huriki a Israel ri gi kavurike a ramu, ri gi lohoka vona iau a made turamu, i manga a hini a laho turane Moses. O taki e huriki a prister ri gi kaloho maea a Tava na Ngava Dagi, ‘Na tahuna mu bele na naru e Iordan, mu puru na naru, mu pesi pololilo vonga mu dava.’ ”
E BAKOVI DAGI i ta lobo, lakea e Iosua i taki e huriki a Israel i ta maea, “Mu valai tabukoi, mu longoa a nitane BAKOVI DAGI a Vure ne mua. 10 Ngane bara mu lohoka vona e BAKOVI DAGI a Vure ne hita i tahoka a nimahuri, i made turane hita, ge lili tala e huriki a Kenan, a Hiti, a Hivi, a Peres, a Girgas, a Amor, a Iebus. Bara mu matakilaka hateka vona a nitora vona 11 na tahuna a Tava na Ngava Dagi ne BAKOVI DAGI na malala lobo ge muga mua, mu tulu poloa a naru e Iordan. 12 Mu vulaki takutaku na maka kabu ne Israel a bakovi ge ravulu a polona i rua. 13 E huriki a prister ri gi kalohoa a Tava na Ngava Dagi ne BAKOVI DAGI na tabeke lobo na malala. Na tahuna ri tovo puru a vahane ria na naru, a naru bara i kere a hini ri laho polo vona, a vuhuna ra naru i tua valai na matana, bara i roga mule, i lolo.”
14 Muri e huriki a Israel ri pe a mada, ri vano ri tulu poloa a naru e Iordan. E huriki a prister ri kalohoa a Tava na Ngava Dagi ri muga. 15 Ra tahuna iea a tahuna ni mirio na hania, a naru e Iordan i tua hateka. Na tahuna e huriki a prister ra ri kaloho a tava ri bele vonga, ri tovo puru a vahane ria na gagana naru, 16 lakea a naru i roga, i uka ma i tua tabu. Ra naru i tua valai meli i tabuli manga a lolo i vano i harena na tanga e Adam, ra tanga i pesi tabukoi na tanga e Saretan. A naru i tua lakea na Dari Mate i kere liu. E huriki ri laho polo ri bele na tabeke tara tabukoi o Ieriko. 17 E huriki a Israel ri laho polo na hini kere. E huriki a prister ri kalohoa a Tava na Ngava Dagi ne BAKOVI DAGI, ri pesi mavonga na hini kere na kurukuruna a naru e Iordan, i harena ne huriki ri laho polo lobo.