2
E Maria i Podea e Isu
(Mateo 1:18-25)
1-3 Na tahuna iea e Kaiser Augustus i vakuku e huriki ri gi hamule mai a vuhutanga ne ria, ri gi here puru a rane ria. I mavonga ni gi gi palupu e huriki a bakovi a ngatavine na tabeke lobo i matakari e Rom. A rabu ni gi palupu e huriki lobo i uka ma ni rata hosi. Ni rata karaba ngane na tahuna e Kuirinus i matakari o Siria.
E Iosep tara i pea e Nasaret na tabeke ne Galili, i hamule o Iudea, na tanga ni gale e Betlehem, a vuhutanga ne Davit, a vuhuna ia a hamone Davit. I hamule lokovonga turane Maria, ru gu here puru a rane rua, a vuhuna e Maria ni habikari vona. E Maria i singou, lakea na tahuna ru bele vonga, i pahea a koma, lakea i podea a koma a tabua, a bakovi. I bunua na lavalava, i vakamahita purua na murina maki ni kani na sipsip, a vuhuna a roho na mosi i vonu pali.
A Agelo i Bele na Matakari na Sipsip
Na rodo iea, e huriki a bakovi ri made polovavo na tanga, ri matakari a kabu na sipsip. I bele vakaturutu ne ria ngane a agelo ne Bakovi Dagi, lakea a nipara na Vure i parai ria. Ri mangenge, i vakulu a tagane ria. 10 Pali a agelo i taki ria, i ta maea, “Naha ni mangenge. A bele ga vakalongo mua vona a Velenga Kamumu. A Velenga Kamumu iea ge rata e huriki a bakovi a ngatavine ri gi vivi hateka, 11 a vuhuna mona na vuhutanga ne Davit, a viri ge korimule mua ni poda. Ia e Kristo e Bakovi Dagi. 12 A kilakilana i maea: Bara mu masia a koma bakovi ni bunu na kala, ni vakamahita na murina maki ni kani na sipsip.”
13 E huriki a tara bulolo na agelo ri bele vakaturutu, ri kavurikea a Vure, ri ta maea,
14  *“Si gi kavurikea a Vure Meli Liu.
Ge habi a nivalemu ne huriki a bakovi a ngatavine i vivi ne ria koea na malala.”
15 Na tahuna e huriki a agelo ri pe ria, ri hamule sike na hunu, e huriki a matakari na sipsip ri vata, ri ta maea, “Si lakea o Betlehem, si gi masia a maki i bele vonga, ra maki i vakalongo hita vona e Bakovi Dagi.”
16 Lakea ri nunu lakea o Betlehem, ri matai e Iosep, e Maria, turana koma ni vakamahita na murina maki ni kani na sipsip. 17 Na tahuna ri masia a koma ri vakalongo a ngavana agelo i taki ria vona. 18 E huriki ri longoa a ngavane huriki a matakari na sipsip ri turutu vona. 19  *Pali e Maria i luhoi kado a ngava nga, i ru na hatena. 20 E huriki a matakari na sipsip ri hamule lakea na sipsip ne ria, ri kavurikea a Vure vona a maka maki ri longo, ri matai, a vuhuna i bele manga kunana a hini a agelo i taki ria vona.
A Koma e Isu Pololilo na Roho na Vure
21  *Na tahuna a koma i tahoka a parava i polotolu, ni pala a kulina, ni vunu e Isu, i muri mai a ngavana agelo i taki e Maria vona, muga ne Maria i singou.
22  *Ru rata pali a leho ge rata rua ru gu malamala na matane Bakovi Dagi, i muri mai a vinara ne Moses. Muri ru bolea e Isu, to lakea o Ierusalem ru gu habia ne Bakovi Dagi. 23  *Ru rata mavonga, a vuhuna a vinara ne Bakovi Dagi ni here puru i maea, “E huriki a koma bakovi, a tabua, ni gi habi ne Bakovi Dagi.” 24  *E Maria e Iosep ru habi a nihabi i muri mai a vinara ne Bakovi Dagi ni here puru, i maea, “A balu ge rua, o a tuna balu ge rua.”
E Simion e Ana
25 Na tahuna iea, a bakovi tara i made o Ierusalem, a rana e Simion. Ia a bakovi malamala, a bakovi ni vasileki. E Simion i dava, i pasimata na Vure ge luke e huriki a Israel. A Hanu Kiripiripi i made turane Simion. 26 A Hanu Kiripiripi i vakalongoa pali e Simion i uka ma ge mate, ge matai taroa e Kristo a Bakovi Dagi. 27 A Hanu Kiripiripi i tulia e Simion i lakea na tabeke na roho na Vure. Na tahuna e tamana e kinana e Isu ru boko dilia, ru gu vakasiria na Vure i muri mai a vinara, 28 e Simion i masia, i bokea, i kavurikea a Vure i ta maea,
29 “Bakovi Dagi, iau a vora vomu.
Ngane o taparaki iau ga mate na nivalemu,
a vuhuna a maki o ta muholi nau vona ge bele, i bele pali.
30  *Ngane a masia pali na matagu a viri o rudu vilia ge korimule mia.
31 O vakabelea na matane huriki a bakovi a ngatavine na malala.
32  *Ia i manga a nipara, ge vaka­palala a gine huriki i uka ma ria a Iuda.
Ge rata e huriki a ngate vomu, re Israel, ri gi tahoka a rane ria.”
33 E tamana e kinana ru turutu vona a ngava e Simion i taki virihi e Isu vona. 34  *Muri e Simion i taki tou a Vure ge rata kamumu tou, lakea i takia e Maria, i ta maea, “O longo valai. A Vure i vulakia a koma iea ge rata e huriki a Israel ala kupo ri gi boru, pali ge korimule e huriki ala kupo. Bara ia a kilakila na Vure, lakea i kupo e huriki bara ri biu ia. 35 Ra i mavonga a niluhoi kapiloho ne huriki bara i bele kavakava. Pali ioe bara o dodo hateka, bara o hatakia a hatemu, i manga ni padi na bainat.”
36 A propet ngatavine tara i made vonga, a rana e Ana, e Tune Panuel, a kabu ne Aser. I gare hateka. Hosi i parangi i made turana e girihina na pida i polorua. 37 Muri e girihina i mate, lakea i uka ma i parangi tabu. Ngane i tahoka a pida i ravulu polotolu a polona i va. I made kunana na roho na Vure, i peremu, i vasileki, i kavurikea a Vure na haro, a rodo. 38 Na tahuna e Simion i tabana ni ta turane tou, e Ana i valai mai ria, i kavurikea a Vure. Muri i vakalongo e huriki na koma iea, re huriki a bakovi a ngatavine ri pasimata na Vure ge korimule e Ierusalem.
E Iosep i Hamule Lakea o Nasaret
39  *Na tahuna e Iosep e Maria ru rata lobo a naro na vinara ne Bakovi Dagi i taki, to hamule lakea o Galili, na tanga ne tou, e Nasaret. 40 A koma i koru rike vonga, i paki. I bole a lohokanga kamumu, a Vure i rata kamumua.
E Isu i Lakea na Roho na Vure
41  *Na pida vakaroro, e tamana e kinana e Isu ru sike o Ierusalem na Habu na Nipagepolo. 42 Lakea na tahuna e Isu i tahoka a pida i ravulu a polona i rua, ru muri mai a vilone rua, ru lakea na habu, ru tulia e Isu ge tou. 43 Na tahuna a habu i lobo, e tamana e kinana ru vano, ru hamule na tanga, pali e Isu i made mule vonga o Ierusalem. E tamana e kinana i uka ma ru lohoka vona i made mule vonga. 44 Ru pahaluhoi ta i laho turane huriki ranga, lakea ru laho kikeri na parava i taku. Muri ru nana kanea ne huriki a kabukabu ne rua, e huriki a turane rua, ra ri hamule palupu. 45 I uka ma ru matavisia, lakea ru hamule sike tabu o Ierusalem ru gu matakanea vonga. 46 I lobo a parava i tolu, ru matavisia na tabeke na roho na Vure. I made turana e huriki a mari ni tovo, i longo a nitane ria, i nana ria na ngava. 47 E huriki lobo ri longoa a ngavana ri turutu vona a lohokanga vona, a maka ngava i koli ne ria. 48 Na tahuna e tamana e kinana ru masia, ru turutu. Lakea e kinana i nanea, “O tugu. I navai o rata mavonga maria? Miri loho lege lae vomu na ni matakana ioe.”
49 Lakea e Isu i koli i ta maea, “I navai muru matakana iau? I uka ma muru lohoka vona iau ga made na roho ne tata?” 50 Pali i uka ma ru longokilalea a ngava i taki virihi rua vona.
51  *Pali e kinana i ru na hatena a ngava lobo i taki. Muri i vano turane rua to puru o Nasaret. I longototo kunana a ngavane rua. 52  *E Isu i koru rike. A lohokanga vona i bele dagi. A Vure i vivi vona. E huriki a bakovi a ngatavine, ria ranga ri ngarua.
* 2:14 Luk 19:38 * 2:19 Luk 2:51 * 2:21 Luk 1:31 * 2:22 Levi 12:1-8 * 2:23 Nim 13:2,12 * 2:24 Levi 12:8 * 2:30 Ais 52:10; Luk 3:6; Tit 2:11 * 2:32 Ais 42:6; 49:6; 52:10 * 2:34 Ais 8:14; Mat 21:42; 1Pe 2:8 * 2:39 Mat 2:23 * 2:41 Nim 12:24-27; 23:14-17; Vin 16:1-8 * 2:51 Luk 2:19 * 2:52 1Sam 2:26; Snd 3:4