22
E Iudas a Bakovi Hale
(Mateo 26:1-5,14-16; Markus 14:1-2,10-11; Ioanes 11:45-53)
1 I valai tabukoi ngane a Habu na Bret i Ua Is. A rana tara a Habu na Nipagepolo.
2 E huriki a prister dagi a mari na vinara ri matakana a dala ri gi rabalaki kapilohoa e Isu, a vuhuna ri mangenge ne huriki a bakovi a ngatavine.
3 Lakea e Satan i dili ne Iudas Iskariot, a turane huriki a murimuri ala ravulu a polona i rua.
4 E Iudas i vano, i ta turana e huriki a prister dagi, a nugumaheto ri tagari a roho na Vure. I ta turane ria na dala ge habia na limane ria e Isu.
5 E huriki nga ri vivi, lakea ri takia e Iudas ri gi habi a moni vona.
6 E Iudas i longo vona a ngava ne ria, lakea i matakanea tara dala kamumu ge maragisia. I davea a parava nahea e huriki ala kupo ri gi made turane Isu.
A Murimuri Ru Kisi Puru a Kinani
(Mateo 26:17-25; Markus 14:12-21; Ioanes 13:21-30)
7 A Habu na Bret i Uka Is i bele ngane. Na parava iea a tuna sipsip bara ni rabalaki ne vona a nihabi na Habu na Nipagepolo.
8 Lakea e Isu i taki e Petrus e Ioanes i ta maea, “Muru muga, muru rata puru a kinani ne hita na Habu na Nipagepolo.”
9 Lakea ru nana, “I vai a hini o ngaru miri gi rata puru a maki vona?”
10 E Isu i koli, i ta maea, “Na tahuna muru dili na tanga, a bakovi i kaloho a ulo na naru bara i pugai marua. Muru ramaia, muru dili na ruma i dili vona.
11 Muru takia a tahona ruma, muru ta maea, ‘A mari ni tovo i nana vona a tabeke na mosi ge kani turana e huriki a murimuri vona na habu.’
12 Muri bara i vakasiri marua vona a tabekena ruma i ngavaka polomeli, i tahoka pali a gula ni made ni kado puru. Muru gutu puru vonga a maki ni kani ne hita.”
13 Muri ru vano, ru matai a maki lobo i manga a hini i taki muga e Isu. Lakea ru rata puru vonga a kinani na Habu na Nipagepolo.
E Isu i Kani Turane Huriki a Apostolo Vona
(Mateo 26:26-30; Markus 14:22-26; 1 Korin 11:23-25)
14 Ngane ta ri gi kani, lakea e Isu turane huriki a apostolo vona ri vano, ri made haluia a dede.
15 Lakea i taki ria i ta maea, “A pasimata ni kani turane mua vona a kinani na Habu na Nipagepolo, muga ne iau ga bole a nimadihi.
16 A taki mua, i uka ma ga kani tabu vona a habu iea. Muri ma, na tahuna a pelegona habu iea ge bele muholi na harikianga na Vure, bara kani tabu vona.”
17 Muri e Isu i bole a kikei na vain, i kavurikea a Vure, i ta maea, “Mu bolea a kikei na vain iea mu vaveru,
18 a vuhuna a taki mua, i uka ma ga ninu tabu vona a kanena vain iea ge harena na tahuna a harikianga na Vure ge valai.”
19 Muri e Isu i bole rikea a bret, i kavurikea a Vure, i kevea, i veru ne huriki a apostolo vona, ri gi kani, i ta maea, “Ra bret iea a bobogu, a habia ge korimule mua. Mu rata mavonga vakaroro, mu luhoi mule iau.”
20 Na tahuna ri kani lobo, e Isu i bole rikea a kikei na vain, i ta maea, “A vain iea a kilakila na ngava dagi karaba a Vure ge rata turana e huriki. A ngava dagi karaba iea ga vakatorea na daragu, ra daragu ge pori, ge korimule mua.
21 “Pali tara ne mua i made turagu koea na dede bara i habi iau na limane huriki a pile,
22 a vuhuna bara i bele nau, iau a Tuna Bakovi, ge manga a hini ni here puru hosi. Pali a Vure bara i ratapilea ra viri ge habi iau na limane huriki a pile.”
23 Lakea ri vanana vona e rei ne ria ge ratea ra rabu iea.
E Rei a Viri Ge Muga?
24 Muri ri vahehe lae ne e rei ne ria ge muga ne ria lobo.
25 Lakea e Isu i taki ria i ta maea, “E huriki a bakovi i uka ma ria a Iuda, a hariki ne ria a bakovi hateka, ri taki ta ri kori e huriki.
26 Pali mua, naha ni rata mavonga. E rei a viri i ngaru ni muga ne mua ge manga a viri kiroko ne mua. A viri i ngaru ni matakari ge manga a vora ne mua.
27 E rei a viri i dagi? A viri i mamade na dede o a vora i habi a maki ni kani vona? A viri i mamade na dede i dagi. Pali iau a valai, a made turane mua ge iau a vora ne mua.
28 “Mua kunana e huriki mu made turagu, i uka ma mu ha taro iau na tahuna a tahoka a nitoni.
29 Lakea a habia ne mua a harikianga, i manga e Tata i habia nau a harikianga.
30 Muri bara mu kani mu ninu turagu na harikianga nau, bara mu made na gula-hariki mu pelekado e huriki a kabu ne Israel ala ravulu a polona i rua.”
E Petrus Bara i Nana Rovi ne Isu
(Mateo 26:31-35; Markus 14:27-31; Ioanes 13:36-38)
31 Lakea e Isu i ta maea, “Simon, Simon, o longo! E Satan i nana tora a Vure pali ge toni tora mua.
32 Pali iau a vasileki pali vomu nahea go lohopile iau. Muri, na tahuna o hamule valai tabu nau, o tuhori e huriki a turamu ri gi pesi tora tabu.”
33 Lakea e Petrus i takia, “Bakovi Dagi, iau bara dili turamu na bavi, bara mate turamu!”
34 Lakea e Isu i takia, “Petrus, muga na kureko ge tangi barama, bara o nana rovi iau balaka tolu.”
35 Muri e Isu i nana e huriki a apostolo i ta maea, “Na tahuna a rudu tala mua, i uka ma mu laho turana holekopa, a kulopi, a vahapolo, pali mu bala ranga maki, o i uka?”
Ri koli ria ri ta maea, “I uka.”
36 Lakea e Isu i taki ria i ta maea, “Pali ngane, e rei a viri i tahoka a holekopa, a kulopi, ge bole. E rei a viri i uka bainat, ge habi a varakia vona, ni gi kona, ge vano ge kona a bainat,
37 a vuhuna a ngava ni here puru na Hinere i ta maea, ‘Ri taki ia, ta ia a turana e huriki a bakovi hale.’ A maki lobo ni here virihi mai iau vona bara i bele muholi.”
38 Lakea e huriki a murimuri vona ri ta maea, “Bakovi Dagi, mi tahoka a bainat i rua.”
Lakea i taki ria, “Pali kamumu.”
E Isu i Vasileki na Lolo e Oliva
(Mateo 26:31-35; Markus 14:27-31; Ioanes 13:36-38)
39 E Isu i pe a tanga, i sike na lolo e Oliva, i manga a hini i rata vakaroro. E huriki a murimuri vona ri vano turana.
40 Na tahuna ri bele vona a hini nga, i taki ria, i ta maea, “Mu vasileki nahea mu gu dili na nitoni.”
41 Muri i pe ria, i laho tala popote, i turume puru, i vasileki maea,
42 “Tata, ioe bara o ngaru, o korimule iau vona a nimadihi dagi ta ga bolea. Pali naha ni muri mai a ningaru nau. O muri mai a ningaru vomu.”
43 Muri a agelo tara i bele valai na hunu, i tuhoria.
44 E Isu i hataki a nimadihi dagi, lakea i vasileki tora. A mavidia i pori na kulina i manga a dara, i sisi puru na malala.
45 Na tahuna i vasileki lobo, i hamule mai a murimuri vona, i matai ria ri mahita, a vuhuna i malulu a tuhane ria ni dodo hateka.
46 Lakea e Isu i taki ria, i ta maea, “I navai mu mahita? Mu hadongo, mu vasileki nahea mu gu boru na nitoni.”
E Iudas i Habi e Isu ne Huriki a Pile
(Mateo 26:47-56; Markus 14:43-50; Ioanes 18:3-11)
47 Na tahuna e Isu i tabana ni ta, e huriki a tara bulolo ri laho valai. E Iudas, ra turana e huriki a apostolo ala ravulu a polona i rua, i muga ne ria, i vakasiri a dala ne ria. I valai tabukoi ne Isu ta ge ngurua.
48 Pali e Isu i takia, i ta maea, “Iudas, i navai o ngurua a Tuna Bakovi go habia na limane huriki a pile?”
49 Na tahuna e huriki ri pesi haluia ri masia a maki ta ge bele, ri ta maea, “Bakovi Dagi, o ngaru mete ge rabalaki ria na bainat?”
50 Muri a viri tara ne ria i palakudua a talingana vora na prister dagi, ra talingana na kanena.
51 Pali e Isu i ta maea, “Naha ni ratea a naro iea!” Muri i padoi a talingana bakovi, i kamumu mule tabu.
52 Muri e Isu i taki e huriki a prister dagi, a nugumaheto ri tagari na roho na Vure, a gare ra ri valai ri gi lakavua, i ta maea, “Mua mu rata manga iau a bakovi hale mu valai turana bainat, a lebo.
53 A made turane mua na parava lobo na roho na Vure, pali i uka ma mu lakavu iau. Pali ngane a parava ne mua, a parava na nitora na uvo.
E Petrus i Nana Rovi ne Isu
(Mateo 26:57-58,69-75; Markus 14:53-54,66-72; Ioanes 18:12-18,25-27)
54 Ri lakavu loboa e Isu, muri ri turari lakea na ruma na prister dagi. Pali e Petrus i muri gosi basi popote vona.
55 Ri tunu lobo a kanono na matana ruma, lakea ri made puru. E Petrus tara i made turane ria.
56 A vora ngatavine tara i valai i masia e Petrus i hua a kanono. I matanonoa, i ta maea, “Ra bakovi iea, ia tara i turane Isu.”
57 Pali e Petrus i lavuni i ta maea, “Ngatavine, iau i uka ma lohoka vona a bakovi iea.”
58 I uka ma i tabaka, a bakovi tara i masia e Petrus, lakea i ta maea, “Ioe tara o turane ria.”
Pali e Petrus i lavuni tabu, i ta maea, “Bakovi, iau i uka ma a turane ria!”
59 Muri i polo a kilala i taku, i valai tabu tara viri, i ta kinigao ma ia i ta maea, “Muholi hateka ra bakovi iea i turana, a vuhuna ia a bakovi o Galili.”
60 Pali e Petrus i lavuni tabu, i ta maea, “Bakovi, iau i uka ma lohoka vona a maki o takikia!”
E Petrus i uka ma i vakalobo ni ta ma, a kureko i tangi.
61 E Bakovi Dagi i matagege, i mata nonoa e Petrus. Lakea e Petrus i longovisia a ngava i takia e Bakovi Dagi baroko, i ta maea, “Muga na kureko ge tangi barama, bara o nana rovi iau balaka tolu.”
62 Muri e Petrus i ha tala, i tangi hateka.
E Isu Ni Padikede
(Mateo 26:67-68; Markus 14:65)
63 E huriki a bakovi ri tagaria e Isu ri vakatubu ni padikedea, ri ubia.
64 Ri kavitagu a matana, lakea ri takia, “O vakasiri ioe ngane ge ioe a propet, o taki mia vona e rei a viri i ubi ioe.”
65 Muri ri harogia na maka ngava hale.
E Isu i Pesi na Matane Huriki a Matakari
(Mateo 26:59-66; Markus 14:55-64; Ioanes 18:19-24)
66 I palala ngane a hini, lakea e huriki a gare, re huriki a prister dagi, a mari na vinara, ri valai, ri vapopo. Ri turaria e Isu lakea na murine ria ri vapopo vona. Na tahuna ri bele vonga, ri takia,
67 “Ge ioe a viri ni gale e Kristo, ra viri ge korimule e huriki, o vakalongo mia ngane.”
E Isu i koli ria, i ta maea, “Bara vakalongo mua, i uka ma mu gu longo mai iau.
68 Pali mua ranga, bara nana mua, i uka ma mu gu taratoto.
69 Pali popote ngane a Tuna Bakovi ge made na limana kanena Vure Tuhaka.”
70 Ria lobo ri nanea, “Ra i mavonga, ioe a Tuna Vure?”
Lakea e Isu i taki ria, “A ngava mu takia pali. Iau kunana.”
71 Muri ri ta maea, “E rei si gi dava tabua si gi bole a ngava vona? A ngava si longoa pali vona.”