14
A Naro ni Vakamatapado a Patala
1 E BAKOVI DAGI i takia e Moses i ta maea,
2 “Ra ngava iea a vinara na viri i tahoka a patala. Na tahuna a gilanga vona i lobo, i ngaru ni matapado, ni gi tuli lakea na prister.
3 A prister ge tuli talea na mada, ge lei kamumua a gilanga vona. A gilanga na patala vona i lobo muholi,
4 a prister bara i vakuku ria, ri bole polo vona a kadirovo mahuri kabakaba ge rua, a mavilana a kai a sida, a mota vururu, a rahana kai a hisop.
5 A prister ge vakuku ria ri gi bolea tara ulo, ri gi kiru a naru, ri gi bole vilia. Muri ri gi bole langea na ulo tara kadirovo mahuri, ri gi rabalakia, ge sisi puru na ulo a darana.
6 A prister ge bole tabua tara kadirovo mahuri, a mavilana kai a sida, a mota vururu, a rahana kai a hisop, ge lutu na naru i tahoka a dara.
7 Muri ge voro tamali balaka polorua langa na bakovi i vona a patala a dara. A prister ge vakalongoa i matapado pali, muri ge bole talea a kadirovo mahuri ge vakabebea.
8 “A bakovi i ngaru ni matapado, ge vahilolo a varakia vona, ge ali vuroki a vuna na kakaina, ge hilolo ge matapado. Muri bara i dili valai na mada, pali bara i made polovavo taro na kape vona na parava ge polorua.
9 Na poloruana parava ge ali vuroki lobo a maka vuna na kakaina, a vungana na matana, a karirana. Ge hilolo, ge loi a maka kala vona, muri bara i matapado.
10 “Na polotoluna parava ge bole a tuna sipsip a toga ge rua ge gavutuvutu, a sipsip a kinana ge gavutuvutu a pida vona ge taku, a kilo na plaoa kamumu ge tolu ni vuli turana namona oliv ge a nihabi na vit. Ge bole turana a kikei na namona oliv.
11 A prister ge tulia a bakovi iea turana a maka nihabi vona, ge lakea na matana Kape na Vaponga na matane BAKOVI DAGI.
12 “A prister ge bolea tara sipsip turana a kikei na namona oliv, ge a nihabi na rarenga. Muri ge tabari e BAKOVI DAGI vona, ge manga a nihabi.
13 Muri a prister ge rabalakia a tuna sipsip na tabeke ni rabalaki a sipsip, a bulmakau na nihabi na naro hale, na nihabi gutu-vuro. A prister ge rata mavonga, a vuhuna ra nihabi iea a nihabi na rarenga, i manga kunana a nihabi na naro hale. Ra nihabi nga ni gamai hateka ne vona e huriki a prister kunana.
14 A prister ge bole ranga darana sipsip ge ravu polotano na talingana kanena bakovi. Ge bole tabu ranga ge ravu na kukukoru na limana a vahana a kanena.
15 Muri a prister ge bole a namona oliv ge guru langa na bolana limana a maurina.
16 Muri ge lutua na namona oliv iea a kukulimana a kanena, ge voro tamali balaka polorua na matane BAKOVI DAGI.
17 I ranga namona oliv i tababana ni gi ravu na talingana kanena bakovi ra ni vakamatapado, na kukukoru na limana kanena, na kukukoru na vahana kanena, polomeli na dara na nihabi na rarenga.
18 A namona oliv i tababana na limana, a prister ge ravu na gina bakovi ta ni gi vakamatapado, ge kavitagua na matane BAKOVI DAGI.
19 Muri a prister ge habi a nihabi na naro hale, ge kavitagua a bakovi ge matapado. Muri ge rabalakia a tuna sipsip ne vona a nihabi gutu-vuro.
20 Muri ge habia a sipsip, a bulmakau iea na dede, turana a nihabi na vit, ge kavitagua a bakovi iea, ge matapado.
21 “Pali a bakovi i uka moni ni kona a maki ge a nihabi ni vakamatapado mule ia, ge bolea tara tuna sipsip a toga, ge a nihabi na rarenga. Muri a prister ge bolea, ge tabari rike e BAKOVI DAGI vona, ne vona ni kavitagua a bakovi iea. A bakovi ge bolea a kilo na plaoa kamumu ge taku, ge vuli turana a namona oliv, ge rata a nihabi na vit. Ge bole turana a kikei na namona oliv ge rua.
22 Ge bole valai a balu ge rua, a vuhuna i uka moni ni kona a sipsip. A balu muga, ge a nihabi na naro hale, a balu muri ge a nihabi ni gutu-vuro.
23 “Na polotoluna parava, ge bole lakea na prister na matana Kape na Vaponga a balu nga, na matane BAKOVI DAGI, ne vona ni vakamatapado ia.
24 A prister ge bolea a tuna sipsip ne vona a nihabi na rarenga, turana a namona oliv, ge tabari e BAKOVI DAGI vona.
25 A prister ge rabalakia a tuna sipsip iea, ge ratea a nihabi na rarenga. Ge bole a dara popote na sipsip, ge ravu na talingana bakovi, ra talingana a kanena. Ge bole ranga, ge ru tabu na kukukoru na limana a kanena, na vahana a kanena.
26 A prister ge bole a namona oliv ge guru langa na bolana limana a maurina,
27 ge lutua a kukulimana a kanena na naruna oliv iea, ge voro tamali balaka polorua na matane BAKOVI DAGI.
28 Muri a prister ge ravu a namona oliv na talingana a kanena bakovi, na kukukoru na limana a kanena, na kukukoru na vahana a kanena. A naro iea ge ratea na tabeke ni ru a darana sipsip na nihabi na rarenga.
29 A namona oliv ranga i tababana, ge ravu na gina bakovi i ngaru ia ge matapado. Na naro iea, a prister i rata a nihabi ne vona ni kavitagu a bakovi iea na matane BAKOVI DAGI.
30 A prister ge bole a balu nga i rua i bole valai a bakovi ge a nihabi,
31 ge habia tara ge a nihabi na naro hale. A viri tara ge a nihabi gutu-vuro, turana a nihabi na vit. Na naro iea, a prister i kavitagua a bakovi iea na matane BAKOVI DAGI, ra i ngaru ni matapado.
32 Ra vinara iea a vinara na viri i tahoka a patala, pali i uka moni ni kona a nihabi na nivakamatapado.”
A Naro ni Vakamatapado a Ruma
33 E BAKOVI DAGI i taki e Moses e Aron,
34 “Muri bara mu vano mu made na malala e Kenan, ra malala a habia ne mua, ge ne mua liu. Na tahuna mu made pali o Kenan, ga ratea a limuta ge tuvu na ruma tara,
35 lakea a tahona ruma i masia a maki iea i bele na ruma vona, ge lakea na prister, ge vakalongoa vona a limuta i bele na ruma vona.
36 Muri a prister ge vakukua a tahona ruma ge bole tala na ruma a maki lobo vona, ma ge muto. Muri a prister ge dili ge lei a ruma.
37 Ge lei kamumua a maki i vakahale a gagana ruma. Na tahuna i matai a maki gomagoma i vururu ri rata a maka dupi kiroko pololilo na gagana ruma,
38 a prister ge pagitala ge tukaria a hinebi, ge vakalongoa vona a ruma ge mata kopu na parava ge polorua.
39 Na poloruana parava a prister ge hamule ge lei kamumu tabua a ruma. A maki iea ge rako lae na gagana ruma,
40 a prister ge vakuku ria ri gi puka vuroki a maka kedo i rako ne ria a limuta, ri gi vuroki na lovo na lulu polovavo na tanga dagi.
41 Ri gi haruri vuroki a maka simen ni kavitagu a gaga vona pololilo na ruma, ri gi bole tala tabu ri gi vuroki na murina lulu polovavo na tanga.
42 Muri ri gi bole a maka kedo karaba ri gi kuloi a maka kedo ri vuroki, ri gi kapi tabua a gagana ruma. Ri gi bole a simen karaba, ri gi pipikari tabu a murina a hini ni haruri vuroki a simen hale vona.
43 “Na tahuna a limuta ge bele tabu na gagana ruma, muri ne ria ri rata a maka leho nga,
44 a prister ge hamule tabu na ruma ge lei tabua. A maki iea i rako lae, i vakahale a ruma. A ruma iea i muto.
45 Lakea ri gi pukea a ruma, ri gi vuroki a maka kedo, a simen, a kai. Ri gi kaloho tala na tanga dagi, ri gi vuroki na murina lulu.
46 A bakovi tara i dili vona a ruma ni tukari, a bakovi iea i muto, bara i muto mavonga i harena na malunga liu.
47 E rei a viri i kani o i mahita vona a ruma iea, ge vahilolo a maka varakia vona.
48 “Na tahuna a prister i valai ge matai a ruma, i matai a gagana ruma i kamumu, i uka ma i tuvu vona a limuta, ge taki ria vona a ruma i matapado, a vuhuna a limuta ta ge ratapile a ruma i uka ma i bele tabu.
49 A naro ni rata kamumu a ruma ge matapado na matana Vure i maea: A prister ge bole a kadirovo ge rua, a mavilana kai a sida, a mota vururu, a rahana kai a hisop.
50 I ranga e huriki ri gi bolea a ulo ri gi kiru a naru, ri gi bole vilia. A prister ge bole langea na ulo a kadirovo tara, ge rabalakia, ge sisi puru na ulo a darana.
51 Muri ge bole a mavilana a kai a sida, a rahana kai a hisop, a mota vururu turana a kadirovo mahuri tara. Ge lutu a maki nga na ulo i vona a dara a naru, ge voro tamali langa na ruma balaka polorua.
52 A prister ge rata maea a ruma, lakea bara i matapado.
53 Muri bara i pugea a kadirovo mahuri i bebe lakea na robo. Ra naro iea ne vona ni vakalobo a maki i muto na ruma, lakea a ruma bara i matapado.”
54 Ra vinara nga ne vona a gilanga na kuli ra patala, a hini i makali,
55 ne vona a limuta i tuvu na varakia na ruma,
56 ne vona a loto, a pero, a vuruputuka.
57 Ra vinara nga ne vona a gilanga na kuli, a limuta, ri vakasiri mua na maki i matapado, na maki i muto.