10
A Tavure a Kilakila
E BAKOVI DAGI i takia e Moses, “Ngane mu bole ranga silva mu ubi na ama, mu rata a tavure ge rua. Mu vaki a tavure na tahuna mu ngaru ni gale palupu e huriki, ri gi kisi puru a maki ri gi laho. Na tahuna mu vaki varago a tavure i rua, e huriki lobo ri gi valai na matana Kape na Vaponga. Pali na tahuna mu vaki a tavure i taku kunana, e huriki a nupesi kunana na kabu ri gi valai ri gi vapopo turamu. Na tahuna mu vakikapo a tavure, e huriki ri made na tabeke na nirikena haro na kape nau, ri gi malaga ri gi vano. Na tahuna mu vakikapo tabu a tavure, e huriki a tara ri made na tabeke mule puru na kape, ri gi malaga ri gi vano. Mu vakikapo kunana a tavure na tahuna mu rata kilakila ni pe a mada, mu gu vano. Pali na tahuna mu ngaru ni gale palupu e huriki ri gi valai ri gi vapopo, mu vakilalu a tavure. E huriki e tune Aron kunana, re huriki a prister, ri gi vaki a tavure.
Mua turane huriki a hamone mua mu ramaia ra vinara iea vakaroro. Na tahuna e huriki a pile ri gi bele ri gi vaubi ne mua na malala ne mua, mu vaki a tavure ge malaga e huriki ri gi vaubi ne ria. Mua bara mu rata mavonga, ngane iau e BAKOVI DAGI a Vure ne mua, bara luhoi mua, a korimule mua ne huriki a pile. 10 Na maka parava dagi ni vasileki, i manga na keva karaba o na maka parava dagi ranga, mu vaki a tavure na tahuna mu rata a nihabi gutu-vuro, a nihabi na nivalemu. Bara luhoi mua, a tuhori mua. Iau e BAKOVI DAGI a Vure ne mua, a ta pali.
E Huriki a Israel Ri Pea e Sinai
11 Ne ravulu ruana parava (20th) na ruana keva na ruana pida, muri ne huriki a Israel ri pe e Egipto, a bubu i pe a kape na Ngava Dagi, i vano. 12 Lakea e huriki a Israel, ri malaga ri pe mulea a malala golea ne Sinai, ri laho lokovonga. A bubu i vano i pesi na malala golea ne Paran. 13 E BAKOVI DAGI i habi taro a nita ne Moses, muri e Moses i taki e huriki a Israel ri malaga ri laho lokovonga.
14 A mada tara ne Iuda, ne Isikar, ne Sebulun ri muga. Ri vapida na tara ne ria, ri nugu a kilakila ne ria, ri laho lokovonga. E Nason e tune Aminadab i matakaria a kabu nga. 15 E Nataniel e tune Suar i matakari e huriki a Isikar. 16 E Eliab e tune Helon i matakari e huriki a Sebulun. 17 E huriki e tune Gerson, e huriki e tune Merari na kabu ne Levi, ri muri mai ra tara nga. Ri pukea a kape na Mailo na Vure, ri bole a mahalana kape ri kaloho lokovonga.
18 Muri e huriki na mada tara ne Reuben, ne Simion, ne Gad ri vapida na maka tara kiroko, ri bole a kilakila ne ria, ri malaga ri vano. E Elisur e tune Sedeur bakovi i matakari lobo ra tara nga i tolu. 19 E Selumiel e tune Surisadai i matakari e huriki a tara ne Simion. 20 E Eliasap e tune Deuel i matakari e huriki a tara ne Gad. 21 Muri e huriki a Kohat na kabu ne Levi ri kaloho a maka mahalana Mailo na Vure ni gamai, ri malaga ri vano. Na tahuna e huriki a Kohat ri bele na murina mada karaba, a kabu ne Levi ranga ri muga ri vakapesia pali a kape na Mailo na Vure. Na tahuna a tara ne Kohat ri bele, ri habi ne huriki a prister a maka maki ri kaloho, ri ru dili na kape.
22 Muri a mada tara ne Epraim, ne Manase, ne Bensamin ri vapida na maka tara kiroko ri nugu a kilakila ne ria, ri malaga ri vano. E Elisama e tune Amihud i matakari ra tara nga i tolu. 23 E Gamaliel e tune Pedasur i matakaria a kabu ne Manase. 24 E Abidana e tune Gideoni i matakaria a kabu ne Bensamin.
25 A iku na mada tara ne Dan, ne Aser, ne Naptali ri tagari a tabeke muri. Ri vapida na maka tara kiroko, ri nugu a kilakila ne ria, ri malaga ri vano. E Ahieser e tune Amisadai i matakari ra tara nga i tolu. 26 E Pagiel e tune Okran i matakaria a kabu ne Aser. 27 E Ahira e tune Enan i matakaria a kabu ne Naptali. 28 Na tahuna e huriki a Israel bara ri malaga ri pea a mada, bara ri laho palupu maea kunana ri vano.
29 Lakea e Moses i takia e lavona, e Hobab, e tune Ietro a bakovi na robo e Midian, i ta maea, “Ngane mi gi malaga mi gi laho maia a robo tara e BAKOVI DAGI i taki ge habia ne mia. I ta muholi pali ta mi gi made kamumu hateka vona a robo iea. Ioe o ngaru o valai turane mia, ga veru ga habi vomu a maka maki kamumu ge kupo.”
30 Pali e Hobab i koli i ta maea, “I uka, ga hamule na tanga nau, na kabu nau.”
31 Pali e Moses i ta maea, “Lavogu, o longo valai. Naha ni pe mia. Ioe o lohoka vona i vai a hini ni gi ru a mada vona na tabeke i ngeki iea, bara o vakasiri a dala ne mia. 32 Ioe bara o valai turane mia, bara mi veru kamumu a maka maki e BAKOVI DAGI i habi ne mia, bara mi habi vomu ranga.”
E Huriki a Israel Ri Malaga Ri Vano
33 E huriki a Israel ri pe mulea a lolo ne BAKOVI DAGI e Sinai, ri laho na parava i tolu. Ri kalohoa a Tava na Ngava Dagi ne BAKOVI DAGI, ri laho muga ri gi bele na tabeke tara ri gi malo vona. 34 Na tahuna ri laho, a bubu ne BAKOVI DAGI i tabuli polomeli ne ria. Na maka parava lobo na haro a bubu i tabuli maea kunana.
35  *Na tahuna ri ngaru ni kaloho loko­vongea a Tava na Ngava Dagi, e Moses bara i taki ria, i ta maea, “BAKOVI DAGI, o pesi rike, o vaubi ne huriki a pile vomu, o lili viliha ria, o rata e huriki i uka ma ri ngaru ioe ri gi ha viliha.”
36 Na tahuna ri malo, ri rua na malala a Tava na Ngava Dagi, e Moses bara i ta maea, “BAKOVI DAGI, o hamule valai ne mia a Israel mi ala ravulu i rangale (10,000,000).”
* 10:35 Sng 68:1