15
A Vinara na Maka Nihabi
E BAKOVI DAGI i takia e Moses, ge taki e huriki a Israel ge ta maea, “Na tahuna mu lakea vona a robo ta ga habia ne mua, mu habi nau a maka bulmakau, a sipsip, a meme ne mua. Mu rata a nihabi gutu-vuro o a nihabi ni ramai a nita muholi, o a nihabi na habu dagi na lotu, o a nihabi na ni ngaru ne mua kunana. A mangina nihabi nga ri mangi kamumu hateka nau. 4-5 Na tahuna a bakovi i bole vilia tara sipsip o a meme ge a nihabi, ge habi turana a kilo i taku na plaoa, ge vuli turana a lita i taku na namona oliv, ne vona ni rata a nihabi gutu-vuro. A lita i taku na vain ge guru na dede, ge a nihabi na vain. 6-7 Na tahuna o habi a sipsip a toga, o bole a kilo na plaoa ge rua, o vuli turana a namona oliv a lita ge taku a kalavana, turana a vain ge harena na lita ge taku a kalavana, ge habi nau ge a nihabi na vain. A mangina a nihabi iea a ngaru hatekea. Na tahuna o habi a bulmakau a toga ge a nihabi gutu-vuro, o ne vona ni ramai a nita muholi, o ne vona a nivalemu, o bole a kilo na plaoa ge tolu, o vuli turana a namona oliv a lita ge rua. 10 O bole valai a lita i rua na vain, o habi a maki nga turana a bulmakau a toga. Iau e BAKOVI DAGI a ngaru a mangina a nihabi nga.
11-13 “Mua o huriki a tahotanga o Israel mu ramai vakaroro a vinara nga, na tahuna mu habi a bulmakau, a sipsip, a meme ge a nihabi. Na tahuna a burongi a mangina nihabi nga bara ngaru. 14 E huriki a mosi ri made turane mua ria ranga ri ramai a vinara nga. 15 A vinara i taku kunana mu ramaia, turana e huriki a mosi ri made turane mua. Ra vinara iea ge tabuli vakaroro, ge ramaia e huriki a hamone mua ri bele muri ma. A vuhuna, a matai mua turane huriki a mosi mu palupulupu kunana. 16  *Mua o huriki a Israel a mosi mu ramai kunanea a naro ge taku ni ratana a nihabi.”
17 E BAKOVI DAGI i takia e Moses, 18 ge taki e huriki a Israel ge ta maea, “Ngane ga bole mua ga taparaki mua lakea vona a malala ta ga habia ne mua bara mu made vona. 19 Na tahuna mu kani vona a malala iea, mu bole ranga maki ni kani mu habi nau ge a nihabi, a vuhuna iau e BAKOVI DAGI ne mua. 20 Muri na vit ni mirio, na tahuna mu rata a bret na plaoa, mu habia nau a bret mu gutu mugea, ge a nihabi na vit. 21 Mua turane huriki a hamone mua, mu ramai a vinara iea mu habia nau a bret mu gutu mugea, ge a nihabi na vit.
A Nihabi na Naro Hale Ni Rata Ruru
22-23 “Mu longo ne Moses a maka vinara nga, e huriki a hamone mua ri bele muri ma ria ranga bara ri longo polo ne mua. Pali ranga bakovi i uka ma ri gi luhoi kamumu, bara ri page poloa a vinara. 24 Na tahuna mua a Israel i uka ma mu luhoi kamumu mu pagepolo ranga vinara, i kamumu bara mu habia tara bulmakau a toga, ge a nihabi gutu-vuro, turana a nihabi na vit, a nihabi na vain, a meme a toga tara, ge a nihabi na naro hale. Na tahuna a burongi a mangine ria a ngaru hateka ria. 25 A prister ge ratea a nihabi ge kavitagu e huriki a Israel. Na tahuna a masia bara puga vuroki a naro hale ne ria, a vuhuna i uka ma ri luhoi kamumu ri page poloa a vinara nau. 26 Iau bara puga vuroki a maka naro hale ne huriki a Israel ne huriki a mosi ri made turane ria, ra ri rata ruru a naro hale nga.
27  *“Bara bakovi tara i rata ruru a naro hale, ra bakovi iea ge habia a meme ge taku a kinana i tahoka a pida i taku, ge a nihabi na naro hale. 28 Na matane BAKOVI DAGI, a prister ge habia a sipsip ge kavitagua a viri i rata ruru a naro hale. Na tahuna ni kavitagu a bakovi iea, a naro hale vona bara ni puga vuroki. 29 Na tahuna a Israel tara o a mosi tara i rata ruru a naro hale, a vinara ge ramaia ge taku kunana. 30 Pali a viri i longotaro a nitagu i rata a naro hale, i manga i harogi iau. Ra bakovi iea ni gi rabalaki. Naha ni varoru vona ge ia a tahotanga o ge ia a mosi, 31 a vuhuna ra bakovi iea i longotaro a nitagu. Na ningaru vona kunana i putu purua tara vinara nau. Mu rabalakia ra bakovi iea, a vuhuna i tahoka a ngava.”
A Bakovi i Leho na Parava Nimalo
32 Na tahuna e huriki a Israel ri tabana na tabeke i ngeki, ri masia a bakovi i popo a kai na Parava Nimalo. 33 Lakea ri tuli lakea na matane Moses e Aron, ne huriki lobo a Israel. 34 Ri ru dili taroa na bavi, a vuhuna i uka ma ri lohoka vona a ra maki ri gi ratea vona. 35 Lakea e BAKOVI DAGI i takia e Moses i ta maea, “Mua e huriki a Israel mu rabalakia ra bakovi iea na kedo polovavo na mada.” 36 Lakea e huriki a bakovi a ngatavine ri longototo a nitane BAKOVI DAGI, ri tuli talea na mada ri padimatea na kedo.
A Potu Ni Luhoi Mule a Vinara
37 E BAKOVI DAGI i takia e Moses, 38  *ge taki e huriki a Israel ge ta maea, “Mu bole a hotu mu rata a maka potu, mu varomu na nimodo na varakia ne mua. Na potu takutaku mu varomua a hotu gomagoma ge taku. Mua turane huriki a hamone mua ri gi bele muri ma, mu ramaia ra vinara iea. 39 Na tahuna mu matai a maka potu nga, bara mu luhoi a maka vinara lobo a habi ne mua, mu ramai. Lakea i uka ma mu gu pe iau, mu gu ramai a ningaru ne mua kunana mu gu rata a naro hale. 40 Ra potu nga bara ri rata mua, mu gu ramai a maka vinara nau bara mu made kamumu ge mua e huriki a tara nau. 41 Iau e BAKOVI DAGI, a Vure ne mua, a bole tala mua o Egipto, ge iau a Vure ne mua. Iau e BAKOVI DAGI a Vure ne mua, a ta pali.”
* 15:16 Levi 24:22 * 15:27 Levi 4:27-31 * 15:38 Vin 22:12