21
E Huriki a Israel Ri Ratapile e Huriki a Arad
*A hariki o Arad na robo e Kenan, i made o Negev, i longo e huriki a Israel ri ramai a dala ne Atarim. Lakea i bole e huriki a nugumaheto vona ri vaubi turane huriki a Israel. Ri lakavu ranga Israel ri vano turane ria. E huriki a Israel ri ratea tara ngava dagi ne BAKOVI DAGI, ri ta maea, “Ioe bara o habi mia na limane ria, bara mi ratapile lobo a tanga ne ria.” E BAKOVI DAGI i longoa a nitane ria i kori ria, ri rangi e huriki a Kenan. Lakea e huriki a Israel ri ratapile hateka e huriki a Kenan turana a tanga ne ria. Ri galea liu a tanga iea e Horma.*
A Mata Ni Rata na Bras
*E huriki a Israel ri pe mulea a lolo e Hor, ri ramai a dala dagi i lakea na Dari Vururu, na tabeke ne Akaba, a vuhuna ri ngaru ni polo gege vona a robo ne huriki a Idom. Ri laho laho, ri kide tala. *Ri tapuhaki na Vure ne Moses ri ta maea, “I navai muru tuli tala mia o Egipto mi gi mate tavula koea na tabeke i ngeki? I uka maki ni kani koea! I uka naru! Mi marikoi vona ra mana mi kani balea, i uka ma a maki ni kani muholi.”
E BAKOVI DAGI i longo a nitapuhaki ne ria, lakea i rudu a maka mata hale ri valai ne huriki a Israel ri kanipile ria, lakea i kupo ri mate. E huriki a bakovi a ngatavine ri valai ne Moses ri ta maea, “Mi rata a naro hale pali ne BAKOVI DAGI na tahuna mi tapuhaki ne marua e BAKOVI DAGI. Ngane o vasileki ne BAKOVI DAGI ge lili vuroki a maka mata nga.” Lakea e Moses i vasileki ne ria.
E BAKOVI DAGI i longoa a nivasileki ne Moses lakea i takia, “O ratea tara hanuna mata hale o vakatavorea na kai ge ola. E rei a viri i kani ia a mata, ge mata rike maia bara i mahuri.” *Lakea e Moses i ratea na bras tara hanuna mata i vakatavorea na kai i ola. Na tahuna a mata hale i kani ria, bara ri mata rike maia, bara ri mahuri.
E Huriki a Israel Ri Lakea o Moab
10 E Huriki a Israel ri pea a lolo e Hor ri laho lokovonga ri bele na tanga e Obot, ri rata a mada. 11 Muri ri pea e Obot ri vano ri bele na tanga e Abarim, ri rata a mada. Ra tanga e Abarim i pesi na nirikena haro na robo e Moab, na tabeke i ngeki. 12 Muri ri pea a hini nga, ri vano ri rata a mada na maloku ne Sered. 13 Muri ri pea e Sered ri tulu poloa a naru e Arnon, ri rata a mada na tabeke mule sike na naru e Arnon, na tabeke i ngeki. Ra tabeke i ngeki iea i dili na robo ne huriki a Amor. Ra naru e Arnon i nagi a robo e Moab e Amor. 14 A Puhu na Nuverei na Vabinga ne BAKOVI DAGI i taki a tanga e Vahep na tabeke ne Supa, a maka maloku na naru e Arnon, 15 turana a maka maloku i lokovonga i harena na tanga e Ar, i lokovonga i harena na robo e Moab.
16 Muri ri pea a tabeke iea ri vano ri bele o Bia, ra tanga iea i tahoka a naru ni keli. Ra tabeke e BAKOVI DAGI i takia e Moses vona a naru iea hosi, i ta maea, “O gale palupu e huriki a bakovi a ngatavine ga habi a naru ne ria.”
17 Na parava iea e huriki a Israel ri ratea tara linge, ri kaloloa:
“Naru, o bubu rike, o tua lokovonga,
mi gi masia mi gi kalolo a linge na nivivi.
18 E huriki a gare
ri bole a kodo-hariki,
ri kelia a lomu iea.”
Muri ri pea a tabeke i ngeki iea ri lakea na tanga e Matana. 19 Ri pea e Matana ri lakea na tanga e Nahaliel, muri ri pea e Nahaliel ri lakea na tanga e Bamot. 20 Ri pea e Bamot ri lakea na maloku ne Moab. Ra maloku iea i tabukoi na lolo e Pisga. Ra lolo iea e huriki bara ri pesi vona ri tuva lakea na tabeke i ngeki.
A Hariki e Sihon, e Og Ni Rabalaki
(Vinara 2:26–3:11)
21 Muri e huriki a Israel ri rudu a vinuru ne Sihon a hariki o Amor, ri ta maea, 22 “Mi gi laho polo vona a robo vomu. I uka ma mi gi page dili mai a maka hania na vit o a hania na vain ne mua. A naru ne mua na lomu ranga i uka ma mi gi ninu. Mi gi ramai kunana a dala dagi na hariki, bara mi pe mule a robo ne mua.”
23 Pali a hariki e Sihon i marikoi. I gale palupu e huriki a nugumaheto vona, ri lakea na tanga e Iahas na tabeke i ngeki, ri vaubi turane huriki a Israel. 24 Pali e huriki a Israel ri rabalaki na bainat e huriki a Amor ri ala kupo, ri bolea a malala ne ria, i vakatubu na naru e Arnon, i vano i harena na naru e Iabok na tabeke mule sike. Ra hini nga a harena a robo e Amon. E huriki a Amon ri tahoka e huriki a tara na maheto ri tora hateka, ri tagaria a harena malala ne ria. 25 Lakea e huriki a Israel ri bolea a tanga e Hesbon, turana a maka tanga tabukoi vona. Ri bole lobo tabu a maka tanga ne huriki a Amor, ri made vona, 26 a vuhuna e Hesbon a tanga ne Sihon, a hariki ne huriki a Amor. Hosi e Sihon i vaubi turana a tara na hariki ne huriki a Moab, i bole lobo a maka tabekena malala vona, i harena na naru e Arnon.
27 I mavonga e huriki ri bole visia a linge iea:
“Mu valai o Hesbon ra tanga na hariki e Sihon.
Ni gi rata tabu e Hesbon ge pesi tora.
28  *Ni Gi Hosi e huriki a tara na nugumaheto ne Hesbon, e Sihon
ri pea a tanga,
ri vano ri vaubi hateka,
na tanga e Ar na robo e Moab,
i manga a kanono i gutu a rehi.
E huriki a nugumaheto ri ratapilea a tanga iea,
ri vakalobo liu e huriki a bakovi dagi
ri made na lolo,
na naru e Arnon.
29 Ai-o Moab!
Bara mu tahoka a maregoa dagi hateka.
Mua o huriki a ngate ne Kemos, bara mu vurua.
Ra vure ne mua,
i rata e huriki ri ramaia,
ri pemo pali,
ri made manga a bakovi i laho viliha.
I ratea e Sihon,
a hariki ne huriki a Amor
i nugu tata e huriki e tuna mua ngatavine.
Ri vora tavula vona.
30 Pali ngane mi rabalaki ria pali,
re huriki a tara na tanga dagi e Hesbon,
i vano i harena na tanga e Dibon.
Mi ratapile hateka ria,
i vano i harena na tanga e Nopa,
tabukoi na tanga e Medeba.”
31 Lakea e huriki a Israel ri bole a maka tanga ne huriki a Amor.
32 Muri e Moses i rudu e huriki ri kasisia a tanga e Iaser. Lakea e huriki a Israel ri vaubi o Iaser, ri bolea a tanga iea turana a maka tanga tabukoi. Ri lili tala e huriki a Amor ra ri made vona a tanga iea.
33 Muri e huriki a Israel ri ngalakapulo, ri ramaia a dala i lakea na robo e Basan. Lakea e Og, a hariki o Bosan, turane huriki a nugumaheto vona, ri valai ri vaubi turane huriki a Israel na tanga e Edrei. 34 E BAKOVI DAGI i takia e Moses i ta maea, “Naha ni mangenge ne ria, bara tuhori mua mu ratapile ria, mu bolea a malala ne ria. Bara mu ratapilea i manga a hini mu ratapilea e Sihon, a hariki o Amor, ra i matakari o Hesbon.”
35 Lakea e huriki a Israel ri ramaia ra ngava iea ri rabalakia a hariki e Og, turana e huriki e tuna bakovi, e huriki a tara na nugumaheto vona, e huriki a bakovi a ngatavine na tanga vona, i uka liu tara viri ge mahuri. Muri e huriki a Israel ri bolea a malala ne ria.
* 21:1 Gi 33:40 * 21:3 A pelegona e ‘Horma’ na nita Hibru i manga ‘ratapile.’ * 21:4 Vin 2:1 * 21:5 1Ko 10:9 * 21:9 2Ki 18:4; Ion 3:14 21:14 A ‘Puhu na Nuverei na Vabinga ne BAKOVI DAGI’ ni here vona a maka linge na vabinga. 21:16 E ‘Bia’ na nita Hibru i manga a ‘naru ni keli.’ * 21:28 Jer 48:45-46