23
A Mugana Nita Vakakika ne Balam
1 E Balam i takia e Balak, i ta maea, “O rata koea a dede ge polorua nau, o kisi a bulmakau a toga ge polorua, a sipsip a toga ge polorua.”
2 Lakea e Balak i rata a maki e Balam i takia ge rata, lakea ru rata a nihabi na dede i polorua, ru rata a nihabi na bulmakau a toga, a sipsip a toga na maka dede takutaku.
3 Muri e Balam i takia e Balak i ta maea, “O pesi tabukoi na nihabi gutu-vuro vomu, iau ga pesi tala, ga masia e BAKOVI DAGI ge tagui iau o ge uka? Ia ge taki iau vona tara maki, ga valai ga vakalongo ioe.” Muri i sike na mapana lolo.
4 Lakea a Vure i taguia e Balam. Lakea e Balam i takia a Vure i ta maea, “Iau a rata a dede i polorua, a rata a nihabi na bulmakau a toga, a sipsip a toga, na dede kedo takutaku.”
5 Muri e BAKOVI DAGI i habi a ngava ne Balam, i ta maea, “O hamule ne Balak o takia vona a ngava iea.”
6 Na tahuna e Balam i hamule, i masia e Balak i pesi turane huriki a bakovi dagi na robo e Moab, tabukoi na nihabi gutu-vuro.
7 Lakea e Balam i vakalongo ria na nita vakakika, i ta maea, “E Balak a hariki o Moab i bole valai iau koea. I bole tala iau o Siria, na tabeke na nirikena haro, a valai koea. I taki iau i ta maea, ‘Iau a ngaru go valai koea, go ruduraha e huriki a Israel.’
8 “A Vure i uka ma i ruduraha ria, pali iau, i navai ga ruduraha na vai ria? E BAKOVI DAGI i uka ma i pelekado ria, ga pelekado navai ria?
9 A pesi na mapana lolo kedo kedo a matai ria. A matai e huriki ri made herehere. Ri lohoka vona i uka ma ri manga e huriki na robo ranga.
10 “A hamone huriki a Israel bara ri ala kupo hateka ri manga a habulo na malala. I uka tara viri ge kara ni gi palupu ria. A ngaru ga made manga ria ge harena na parava a mate vona. Muholi hateka, a ngaru ni made na nivalemu, ga mate manga a bakovi malamala.”
11 Muri e Balak i takia e Balam i ta maea, “I navai o ratea nau a rabu maea? A bole valai ioe koea, go ruduraha e huriki a pile. Pali i uka ma o rata mavonga, o gamai ria.”
12 Lakea e Balam i koli i ta maea, “Pali a ra ngava ga taki tabua? Iau bara taki kunana a ngava e BAKOVI DAGI i habi nau.”
A Ruana Nita Vakakika ne Balam
13 Muri e Balak i takia e Balam i ta maea, “O valai turagu ngane tu gu lakea na tanga tara, go matai ria. I uka ma go matai lobo ria. O pesi vona a tabeke iea, a ngaru go ruduraha puru ria.”
14 Lakea ru sike na bilane Sopim na mapana lolo e Pisga. I rata vonga a dede i polorua, i rata a nihabi na bulmakau a toga a sipsip a toga na dede takutaku.
15 Lakea e Balam i takia e Balak i ta maea, “O pesi tabukoi na nihabi gutu-vuro, ga vano taro iau, ga ta turana Vure na harehare.”
16 E Balam i vano, lakea e BAKOVI DAGI i bele vona, i takia na maka nita ge taki. Muri i ta maea, “O hamule o vakalongoa e Balak vona a nita iea.”
17 I hamule i masia e Balak turane huriki a bakovi dagi o Moab tabukoi na maka nihabi gutu-vuro. Lakea e Balak i nanea e Balam i ta maea, “E BAKOVI DAGI i ta navai?”
18 Lakea e Balam i vakalongoa vona a nita vakakika iea,
“O Balak, tune Sipor,
o longoa a ngava ga taki.
19 A Vure i uka ma i tatami kilala ge manga hita.
Ia bara i ta muholi vona tara maki ge ratea, bara i ratea.
I ta kunana na maki i ngaru ge bele, bara i bele.
20 A Vure i taki iau ga gamai ria.
Ia kunana i gamai ria. A keri ni pulo a niluhoi vona.
21 A maka maki a matai ge bele ne huriki a Israel, i uka ma ge rata hale ria.
E BAKOVI DAGI a Vure ne ria i made turane ria.
Ri vivi, ri magulu rike, a vuhuna ia a hariki ne ria.
22 A Vure i bole tala ria o Egipto.
I vaubi turane huriki a pile vona.
I gao hateka i manga a bulmakau i tegi.
23 Na tahuna e huriki a pile ri ubi e huriki a Israel na muto o ri ruduraha,
i uka ma ge rata hale ria.
Ngane e huriki bara ri taki virihi e huriki a Israel,
ri ta maea, ‘Mu matai a maka maki dagi a Vure i rata.’
24 E huriki a Israel ri pesi rike manga a laion i gao hateka.
I uka ma ri malo malaviriri.
Bara ri kani a bobona,
ri ninu a darana kania.
Muri bara ri malo.”
25 Muri e Balak i takia e Balam i ta maea, “Pali, naha ni ruduraha ria, naha ni gamai ria!”
26 Lakea e Balam i koli i ta maea, “Hosi a taki ioe bara rata kunana a maki e BAKOVI DAGI i taki iau vona ga rata.
A Toluna Nita Vakakika ne Balam
27 Lakea e Balak i takia e Balam maea, “O valai turagu ga taparaki ioe lakea na tanga tara. A Vure ma ge matai ioe o pesi na tabeke tara, bara i longo ioe go ruduraha ria.”
28 Muri i tulia e Balam ru sike na mapana lolo e Peor, ru tuva lokovonga liu ru masia a tabeke i ngeki.
29 Lakea e Balam i takia, i ta maea, “O rata a dede ge polorua koea. O kisi a bulmakau a toga ge polorua, a sipsip a toga ge polorua.”
30 E Balak i longoa a ngava iea i rata manga a hini e Balam i taki. I rata a nihabi na bulmakau a toga, a sipsip a toga, na dede takutaku.