5
Meartorure Jesus Jiwuge Eromodukare Ro Pegareuge Emeardae Jiboeji
1 Umode boe ekinorudowu nure Jesusče rugadu. Meartorure nou inodu jiwuge Pao Kurireu ore nure emage jamedu. Boe emeardu kurire boei dukeje emeardu kurimode nou boe etorei jamedu.
2 Pameardu kurimode Pao Kurireuji dukeje pameartorumode Pao Kurireu bataruji. Paromode aino dukeje parduware pameardu kurire Pao Kurireu orei jamedu.
3-4 Pameardu kurire Pao Kurireuji dukeje pameartorumode Pao Kurireu bataruji jamedu. Pao Kurireu ore ewiapagamodukare ro pegareuge emeardae pegareuji. Ča Pao Kurireu ore nure pagi dukodire boe rakakare pai pameartoruwo Pao Kurireu bataruji. Paromodukare ro pegareuge emeardae pegareuji pameartorure Pao Kurireuji dukodi.
5 Pao Kurireu onaregedu nure Jesusče. Tu nou meartorure nou inodu jiwu biapagamodukare ro pegareuge emeardae pegareuji tu rugadu.
Ainore Boe Erduware Jesusji
6 Jesus aregodure moto ka dukeje ao pegododure pobo tabo. Aregodure moto ka dukeje bire. Ure tugu maku boe etai kodire bire. Pao Kurireu Uwari akoino jamedu. Emare batrarodumodukare
7-8 Jesus ao pegododure pobo tabo boe erduwawo Jesus ure pudumi duji. Ure tugu redo boe erduwawo Jesus ure pudumi duji. Pao Kurireu Uwari ure boe ewie Jesus ure ema duji.
9 Pameartorumode boe ewadaruji. Mare Pao Kurireu bataru jetorore boe ewadaru kori. Emare makore tonaregedu jiboeji.
10 Nou Pao Kurireu bataru meture meartorure onaregedu jiwuge ebo. Mare meartorukare Pao Kurireu jiwuge egore batrarodunuie. Emeartorukare Pao Kurireu makore tonaregedu jiboe jituji.
11 Pao Kurireu onaregedu bire paro pegareu moriče dukodire Pao Kurireu umode pamugudo pudabo. Du akedumodukare.
12 Meartorure Pao Kurireu Onaregedu jiwu mugumode Pao Kurireu apo rugadu. Du akedumodukare rugadu. Mare nou meartorukare Pao Kurireu Onaregedu jiwu mugumodukare Pao Kurireu apo rugadu.
Mugure Pao Kurireu Apowu Akedumodukare
13 Inure awu atugoreboe maku tagai tarduwawo tamugumode Pao Kurireu apo rugadu. Nou tamugure Pao Kurireu apo du akedumodukare rugadu. Tameartorure Pao Kurireu Onaregeduji dukeje tamugumode apo rugadu jii toro rugadu. Aino čare tarduware awu ire tawie jiboeji rugadu.
14 Pamagomode Pao Kurireu bagai pagaidure jiboe bagai Pao kurireu meardae pemegareu tabo dukeje meardumode rugadu. Dukodire pabogurumodukare pamagowo Pao Kurireuji rugadu.
15 Pamagomode Pao Kurireuji dukeje meardumode pai rugadu. Parduware nou inoduji dukodire parduware umode pamagore bagaiboe maku pagai rugadu duji.
16 Ia meartorure Jesus jiwu ro pegamode dukeje tamagodo baruto nou meartorure Jesus jiwu paru tabo. Pao Kurireu biagodumode boe ero pegare jiboe piji rugadu. Biagodure piji dukeje nou boe butugugodure Pao Kurireu apo rugadu. Mare ia boe ero pegare jiboe ure tuginai. Du pijire Pao Kurireu biagodumodukare rugadu. Tamagokaba baruto awu rore aino jiwu paru tabo.
17 Boe ero pegamode pui. Mare paga karega Pao Kurireu jire eroino turo pegareu jamedu boe tabo. Mare ia boe ero pegare jiboe ure tuginai. Du pijire Pao Kurireu biagodumodukare rugadu.
18 Parduware Pao Kurireu ore ero pega raimodukare rugadu. Pao Kurireu Onaregedu jetu pemegare ei. Bope doge eimijera umodukare tugera to ei.
19 Parduware Pao Kurireu utugarege nure pagi duji. Mare Bope Doge Eimijera unure tumeardae maku meartorukare Jesus jiwuge eiamedu boe etai emeartoruwo tu nou tumeardae pegareuji rugadu.
20 Parduware Pao Kurireu Onaregedu aregodure rugadu. Emare ure parduwado. Dukodi čare parduware Pao Kurireuji. Boe Remawu nure ema. Pamugu pemegare Pao Kurireu apo. Pamugu pemegare Onaregedu Jesus Cristo apo jamedu. Pao Kurireu Remawu nure ema. Umode pamugudo baru tada pudabo. Du akedumodukare.
21 Imeardu kurire tai nono imeardu kurire itorei dumogadure. Dukodire imagore aino tai. Tameartorukaba bope doge ewadaruji. Tameartorukaba boe ewai tadawu santo dogei. Tagaba Pao Kurireudo emage.
Urugadureu.