18
Ba Kurireu Babilônia Akedure
1 Dukejere iordure ia Pao Kurireu utugare baru tadawu ure turawuje baru piji. Pao Kurireu ure turaga maku ai rugadu tuwo boe erore jiboe udo nono tumeardae mogadure. Urugure dukodire ure moto urugudo.
2 Mako pemegare boe eiamedu boe emearduwo. Akore: – Ba kurireu Babilônia akedure rugadu! Aino bope doge edure nou ba kurireu tada. Kiebarege pegareuge emugumode nono.
3 Moto jamedu boe kejewuge ere tugera ra Pao Kurireu piji tuwo tugeragu nou ba kurireu kejewu boe emeardaeji nono boe emode tugera ra toreduje piji tuwo tugeragu ia aredu pegareudoji dumogadure. Moto jamedu boe kejewuge etaidure nou ba kurireu kejewuge emeardaeji nono boe etaidumogadure piga kuru jitu mogadure. Boe eimijerage ere tugera ra Pao Kurireu piji tiemaruwo nou ba kurireu kejewu boe emeardae bagai nono imedu umode tugera ra toreduje piji tiemaruwo aredu pegareudo bagai dumogadure. Oe kurireuge ere toe kurido pugeje turo pegareu tabo nou ba kurireu kejewugebo.
4 Ča imeardure ia baru tadawu makoji. Akore: – Meartorure iwuge mato itae. Tagera ra nou ba kurireu kejewu boe epiji. Tarokaba nono ero mogadure. Imode boe pegado ei ero pegare kodi.
5 Ero pegare rugadu. Ero pega kurire rugadu. Iwiagodumodukare nou ero pegareu piji.
6-7 Ča imode ikeragu nou ero pegareu jamedu boeji. Imode barigu etae pugeje tuibagi. Boe pegamode ei rugadu ero pegare kodi. Boe pegadodumode ei nono ere boe pegadodu mogadure. Nou ba kurireu kejewuge ere toe kurireu maku puai. Mare aino itugarege emode boe jamedu boe tawuje epiji marenarue doge emode emage pugeje. Nou ba kurireu kejewuge egore pui, “Boe eimijerage nure pagi. Boe pegamodukare pai. Pagare nono okoge bokwareugere.” Ainore nou ba kurireu kejewuge egore pui.
8 Mare ia meri keje boe pegamode ei rugadu. Ekogodumode. Eke bokwamode ei rugadu. Boe pegare ei dukeje etragudumode. Joru butumode ei tuwo ekowu. Pao Kurireu umode ero pegareu morido pugeje. Ema rakare rugadu.
9 Nou Pao Kurireu utugare baru tadawu mako kimore i. Akore joru umoduie nou ba kurireu akedudo dukodire aidure nou ba kurireu kejewuge emeardae jiwuge boe eimijerage etragudumoduie nou ba kurireu joki. Erdumoduie jereduduji. Joru umoduie nou ba kurireu akedudo dukeje jeredudu rutumoduie nou ba kurireu piji. Eie tugeragu nou ba kurireu kejewuge emeardaeji nono imedu moga tugeragu aredu pegareudoji dumogadure. Dukodire etragudumoduie aino nou ba kurireu joki.
10 Mare joru umoduie nou ba kurireu akedudo dukeje nou boe eimijerage edu jaemoduie nou ba kurireu piji. Epagudumoduie nou joru butuwo tuwugeje jamedu. Egomoduie: “Boe pega. Boe pega. Awu ba kurireu Babilônia kurire, moture. Mačare boe pegare ji kuri aino. Akedure kuri je rugadu.” Ainoie egomoduie.
11 Nou Pao Kurireu utugare baru tadawu mako kimore i. Akore: – Moto jamedu kejewu oe kurireuge etragudumode nou ba kurireu joki jamedu. Ekiarigodumode nou ba kurireu bagai. Ia boe bokware ewo akirodo nou oe kurireuge enoeji pugeje.
12 Dukodire oe kurireuge emodukare toe maku diero bagai pugeje. Emodukare tori kuieje maku. Emodukare prata maku. Emodukare tori motureu maku. Emodukare tori tuginaiwu pérola maku. Emodukare areia maku. Emodukare areia pemegareu, kujagureu, mori kurireu maku. Emodukare boe morireu maku, i pemegareu maku, meriri jiboe maku, tori jiboe maku.
13 Emodukare tuge roreu maku. Emodukare roreboe jamedu maku. Emodukare uva kuru maku, boe kaguru maku, pariakudu maku, trigo maku. Emodukare tapira doge emagu, carneiro doge emagu, kuwaru doge emagu. Emodukare imaridoreu maku. Emodukare boe emagu. Emodukare ia boe maku diero bagai rugadu.
14 Emagomode nou ba kurireu kejewugei. Egomode: “Tagaidure jiboe jamedu boe akedure. Mori kurireboe jamedu boe akedure. Tago diero akedure. Tagoroe jamedu boe akedure. Tamodukare tageragu ia tagoroeji pugeje.”
15 – Marigudu boe ere toe maku nou ba kurireu kejewuge etai diero bagai. Kodire eno diero kurire. Kodire boe kurireugere emage. Mačare epagudure tuwo tuburedo nou ba kurireuji pugeje boe pegare nou ba kurireuji kodi. Dukodire ekiarigodure, etragudure.
16 Nou oe kurireuge egomode: “Boe pega. Boe pegare nou ba kurireuji. Marigudu nou ba kurireu moture. Nou ba kurireu kejewuge ekudau areia moture, enoroe kurire.
17 Mare kuri je nou enoroe rugadu boe akedure.”
– Nono nou uture nou oe kurireuge enoroe tabowu ikarereuge etukare nou ba kurireuto pugeje. Nou ikarereuge eimijerage epagudure tuduwo nou ba kurireu ka pugeje.
18 Nono etaiwo jaere nou ba kurireu ka. Erdure jorure nou ba kurireu kowu duji. Dukejere etragudure. Egore: “Ia ba kurireu ukare nono nou ba kurireu mogadure.”
19 Nono ere moto urugudu bu taora keje. Etragudure. Ekiarigodure. Egore: “Boe pegare rugadu. Boe pegare nou ba kurireuji rugadu. Kodure pobo maereu towu ikarereuge ere to diero kurido ere boe morireboe reko nou ba kurireu ka diero bagai kodi. Mare kuri je nou ba kurireu oroe jamedu boe akedure!”
20 – Mare baru tadawuge egarere pudui rugadu nou ba kurireu akedure kodi. Meartorure Pao Kurireu jiwuge egarere pudui rugadu nou ba kurireu akedure kodi. Makore Pao Kurireu bataru jiwuge egarere pudui rugadu nou ba kurireu akedure kodi. Uture Jesus bataru tabowuge egarere pudui rugadu nou ba kurireu akedure kodi. Nou ba kurireu kejewuge ero pegare nou meartorure Pao Kurireu jiwugei dukodire Pao Kurireu umode nou ba kurireu kejewuge ewarigu boe pegareuto.
21 Nono ia Pao Kurireu utugare baru tadawu rakareu ure tugeragu ia tori kurireuji. Dukeje ure nou tori barigu pobo maereuto. Nono akore: – Pao Kurireu umode nou ba kurireu Babilônia kejewuge ewarigu boe pegareuto nono ire awu tori barigu poboto dumogadure. Dukodire boe erdumodukare nou ba kurireu kejewugei pugeje.
22 Boe eramodukare nou ba kurireu tada pugeje. Boe emoka tuwabo arpa akodo pugeje nou ba kurireu tada pugeje. Boe emoka togwa tugu panato, ikato nou ba kurireu tada pugeje. Boe emoka togwa tugu tapira ukigato nou ba kurireu tada pugeje. Boe emaragodumodukare nou ba kurireu tada pugeje.
23 Boe erdumodukare ia joruguji nou ba kurireu tada pugeje. Boe etuwiremodukare nou ba kurireu tada pugeje. Boe emugumodukare nou ba kurireu tada pugeje. Marigudu nou ba kurireu kejewuge oe kurireuge ere toe kurido moto jamedu kejewuge boe ekori. Marigudu nou ba kurireu kejewuge ere boe eiamedu boe ewarigu boeto jorubo kuru pegareu tabo. Dukodire Pao Kurireu roino nou ba kurireu kejewugei.
24 – Nou ba kurireu Babilônia kejewuge ere meartorure Pao Kurireu jiwuge eku redo, ere ewido. Nou Babilônia kejewuge ere makore Pao Kurireu bataru jiwuge eku redo, ere ewido. Nou Babilônia kejewuge emeardae koiare boe eroino aino moto jamedu boe keje. Dukodire Pao Kurireu umode nou ba kurireu kejewuge ewarigu boe pegareuto aino rugadu.