ZÃA LÁ SƐ̃IA
Yã́ pↄ́ kú láɛ bee guuↄ
Láɛ bee guu Zãa lɛ́ tɛ́kpa Yesudeↄgu aaↄ naa Yesu Kilisiwa sĩana, aai yãkɛ a zɛ́wa wàↄ yekↄ̃zi ń Lua gbãao. A ònɛ́ lↄ aa gi yãdanɛ bɛ̃̀ɛ pↄ́ ì kpánɛ́ wà Lua yã́ kũa súsui.
Lápi daalɛkĩi (1.1-4) Zãa nà yã́ pↄ́ álɛ yáwaɛ: Sema Yesudeↄ aaↄ kↄ̃gbɛ̃ↄ ũ ń Mae Luao ń aà Nɛ́ Yesu Kilisio. A gbɛ̀amá aa zɛ ń Lua zĩna pↄ́ aa wɛsì Yesu Kilisilɛ mɛ́ aa swãdↄ̀ aà yãdanɛiↄ seeladekɛo, aaiↄ ku gupua guu, asa Luaá gupuaɛ. Bee yã́i, sema aaↄ yekↄ̃zi (1.5-2.17). Bee gbɛa à lɛkã̀ Kilisi ibɛɛↄ mↄa yã́wa, ɛɛde pↄ́ aaì mɛ Yesuá Kilisi no (2.18-29). Bee gbɛa à yã́ pↄ́ ì to wà Lua nɛ́ sĩandeↄ dↄ̃ ò: Yã́zɛdekɛa, yeakↄ̃i, Yesu Kilisi náaikɛa (3.1-24). À yã́ pↄ́ ì to wà sĩana dↄ̃kↄ̃ɛ ń ɛɛo ò (4.1-6), ↄ̃ à ɛ̀a sù yeakↄ̃zi yã́wa. Dɛa Lua gbɛ̃́ ũá yeakↄ̃i yã́ɛ, asa Lua ìↄ yeńziɛ (4.1-21). Lápi láakĩi à luanaaikɛa pↄ́ ì ń ká zĩbleawa yã'ò (5.1-21).
Lápi ì dɛa Yesude sĩande ũ yã́ bↄↄlɛkɛwɛ̃ɛ. Ì Yesudeↄ gba làasoo maa kɛ́ aa e bↄ yãdanɛ ɛɛde pↄ́ ì ń sↄ̃ bleↄ guu, aai Yesu Kilisi náaikɛ ń yeakↄ̃zio.
1
Yã́ wɛ̃nide
1 Gbɛ̃́ pↄ́ kú za asĩnizĩ wa aà yãmà, wa aà è ń wɛ́o, wa aà gwà, wa ↄkã̀wà, Yã́ wɛ̃nidepi bao wálɛ kpáɛ́.
2 Wɛ̃nidepi bↄ̀ gupuau, wa aà è, aà seeladeↄn wá ũ. Wɛ̃nidepi ku yãa Mae Lua kĩ́iɛ, ↄ̃ à bↄ̀wá. Aà bao wálɛ kpáɛ́.
3 Yã́ pↄ́ wá mà wá è ↄ̃ wálɛ oɛ́, kɛ́ ápiↄ á lɛ́ e àↄ doũwanↄ, asa wá lɛ́ doũ ń Mae Luaoɛ ń aà Nɛ́ Yesu Kilisipio.
4 Wálɛ yã́ɛ beeↄ oɛ́ kɛ́ wá pↄna e pɛɛwáɛ.
Luaá gupuaɛ
5 Bao pↄ́ wá màwà wálɛ kpáɛ́n kɛ: Luaá gupuaɛ, gusia ku aà kĩ́io, baa yↄↄ.
6 Tó wa mɛ̀ wá lɛ́ doũaànↄɛ mɛ́ wá kú gusiau, ɛɛ wálɛ tó, wálɛ zĩkɛ sĩanawao.
7 Tó wá kú gupuau lá Lua ku gupuauwa sↄ̃, ↄ̃ wá lɛ́ aↄ doũ, aà Nɛ́ Yesu au ì wá duuna píi wolowá.
8 Tó wa mɛ̀ wá duuna vĩo, wálɛ wázĩa sãsãɛ, wá sĩana vĩo.
9 Tó wa wá duunaↄ ò Luaɛ, Lua dee náai vĩ, ì yãkɛ a zɛ́wa, a wá duunapiↄ kɛ̃́wá, a yãvãi wolowá píi.
10 Tó wa mɛ̀ wi duunakɛo, wa Lua dìlɛ ɛɛde ũɛ, wá aà yã́ kũao.