Bibeli Luayãtaalá Yobu 14

14

Gbɛ̃nazĩna kua wɛ̃naũ

1 Gbɛ̃nazĩna ì bↄ nↄɛ kĩ́iɛ,

aà wɛ̃ni kuluũ, ìliↄ ku yãkelesaio.

2 Ì pia lán lávuwa, ì giigaga,

ì gɛ̃zɛa lán uenawa, ìli gɛ̃gɛ̃o.

3 Gbɛ̃́ bee taa ↄ̃ ńyↄ̃ wɛdↄɛ̀

ǹ yã́kpalɛkɛaànↄa?

4 Gbɛ̃́ gbãlɛa a fↄ̃ nɛ́ gbãlɛsai io,

baa do.

5 N gbɛ̃nazĩna gↄↄ dìlɛɛ̀,

aà mↄ dasilɛ dɛ n yã́ ũɛ,

n aà wɛ̃ lɛ́ dàɛ̀, a fↄ̃ vĩao.

6 Wɛwowà ǹ aà to we,

e aà gↄↄ pa lán gbɛ̀winawa.

7 Baa lí ì saasɛ,

asa tó wa zↄ̃̀, ì ɛa vlãpaɛ,

mɛ́ a vlã̀ dafupi lí golɛo.

8 Baa tó a zĩ́na zikũ̀ tↄↄlɛ guu,

mɛ́ a miↄna gà tɛ̃́ɛnau,

9 tó à í gĩmà, a bↄlɛɛ,

a gↄ̃nakɛ̃ lán lí pↄ́ wa bàwaɛ.

10 Tó gbɛ̃́ gà sↄ̃, ìↄ wúlɛa tèlele,

ì tá, ìliↄ ku lↄo.

11 Lá ísida'i ì lao,

mɛ́ swa'i ì ba à gɛ̃zɛa,

12 màa gbɛ̃nazĩna ì wúlɛ, ìli fɛlɛ lↄo.

E luabɛ gɛ àↄ kuo, a vuo,

a vu ń ipioo.

13 Ńyↄ̃ ma ulɛ bɛdauo lé?

Ńyↄ̃ ↄkumala e n pↄ wèeao lé?

Gↄↄ dilɛmɛɛ we, ma yã́ i gbasa dↄngu.

14 Tó gbɛ̃́ gà, a ɛa àↄ kua?

Tó màaɛ, ma wɛ́ aↄ dↄ ma vuai

ma dɛ̃ɛkaa guu gↄↄpiiɛ.

15 Ńyↄ̃ lɛzumazi, mí wema,

ńyↄ̃ n pↄkɛa ea nidɛ.

16 Tia ńlɛ wɛ́tɛ ma yãkɛaↄi,

gↄↄ bee ńyↄ̃ ma duuna yãda lↄo.

17 Ńyↄ̃ ma tàaeↄ ka bↄ̀ↄu, ní ye ǹ dilɛ,

ńyↄ̃ kã́n'ↄ lɛ́ ma vãikɛapiↄwa.

18 Lá gbɛ̀sĩsĩ ì gboo à yↄ́ↄlɛ,

mɛ́ sĩ̀sĩ musu gbɛ̀ gbɛ̃̀nɛ ì sↄ̃,

19 lá swa'i ì gbɛ yↄↄ,

mɛ́ í ì bùsu sɛ́lɛ taò,

màa ni to tãmaa gbɛ̃nazĩna nɛ́.

20 Ni gbãamↄɛ̀, ↄ̃ ì tá, ìli su lↄo,

ni to aà ã́nuato, aà wɛ́ ì lilɛ.

21 Tó aà nɛ́ↄ gↄ̃̀ gbɛ̃́ gbiaↄ ũ, a mao,

tó gbɛ̃́ yãfũnaↄnɛ sↄ̃, aↄ dↄ̃o.

22 Wãwã ↄ̃ aↄ ma ado,

aàzĩa ↄ́ ↄ̃ aↄ dↄ.