Bibeli Luayãtaalá Yobu 20

20

Vãikɛna ì yã'ↄ̃ma e

1 Ɔ̃ Naama gbɛ̃́ Zofaa yã́zãsìwà à mɛ̀:

2 Yã́ pↄ́ ń ò ↄ̃̀a,

ma mɛ wã̀ mà wema.

3 N ma lele n ma kpɛbↄ̀,

má wema ma wɛzɛ̃ guu.

4 Ń dↄ̃ lá a dɛ za zio lé?

Za gↄↄ pↄ́ Lua gbɛ̃nazĩna kɛ̀ dṹniau,

5 vãikɛna kúkuakɛa lí gɛ̃gɛ̃o,

luayãdansai pↄnakɛaá gↄↄpla yã́ɛ.

6 Baa tó aà ĩ́andãa zↄ̃̀ luawa,

mɛ́ aà mi kã̀ luabɛpuanawa,

7 a gɛ̃zɛa lá azĩa bĩ́ikpɛwaɛ,

gbɛ̃́ pↄ́ aa aà è yãaↄ mɛ:

A ku má ni?

8 A sãalɛ lán nanawa, wa aà e lↄo,

a gɛ̃lɛ lán wɛ́pungu'eawaɛ.

9 Gbɛ̃́ pↄ́ wɛsìaàlɛ yãaↄ aà e lↄo,

aà bɛdeↄ aà wɛ́pa lↄo.

10 Aà nɛ́ↄ awakpa taasideↄnɛ,

aai aà àizɛɛ sↄaanɛ́.

11 Aà ɛ̀waasogↄↄ gbãa pↄ́ a vĩ yãa

a gɛ̃aànↄ tɛ̃́ɛnau.

12 Baa kɛ́ yãvãi ìↄ na aà lɛ́ɛ,

mɛ́ ìↄ ulɛa aà lɛ́na zíɛ,

13 baa kɛ́ à gì ↄkpaii,

mɛ́ ìↄ dↄ aà lɛ́u,

14 blɛ pↄ́ a blè a li aà nↄ̀sɛu,

i gↄ̃ aà mɛu mlɛ̃̀ sɛwɛ ũ.

15 A blɛ níside pↄ́ a gbɛ̃̀ pisi,

Lua mɛ́ a to à bↄlɛ aà gbɛɛu.

16 Pↄ́ pↄ́ àlɛ mi a gↄ̃ɛ̀ mlɛ̃̀ sɛwɛ ũ,

i aà dɛ lán sↄ̀gbala swaawa.

17 Zↄ́ ń vĩfãaio aↄ diaàzi lán íwa

lá aà wɛ́ dↄiwao.

18 A pↄ́ pↄ́ á sìmáↄ sↄaanɛ́ɛ,

a e pↄnakɛ ń a laata'aioo.

19 Asa à gbãamↄ̀ taasideↄnɛ à ń tó giiɛ,

à ń kpɛ́ↄ sìmá, ↄ̃mɛ dↄ̀ sↄ̃o.

20 Aà yea pↄ́i lí to à ĩ́ampakĩi èo,

pↄ́ pↄ́ aà pↄ dↄwàpiↄ lí aà bↄo.

21 À pↄ́pii è, pↄe kpɛ́ lↄo,

ń beeo aà nama a la ń lao leo.

22 Aà pↄdekɛ guu a gↄ̃ yooyeaɛ,

ń aà ↄniɛkɛo taasi a ↄgbagoɛ̀ɛ.

23 Gↄↄ pↄ́ à kã̀ a làa,

Lua a pↄkũmabↄbↄwà pãsĩpãsĩ,

a wɛ́tɛ̃amↄɛ̀, i dↄ̃ a mɛwa.

24 Baa kɛ́ à bàalɛ̀ mↄsi gↄ̃kɛbↄɛ,

mↄgotɛ̃ ka mɛ́ a aà pá.

25 A kapi wo a kpɛsɛa,

i kà lɛ́ tɛkɛapi wo a pↄawa,

ga vĩa i aà kṹ.

26 Gusia yã́ i aà àizɛɛ le,

tɛ́ pↄ́ gbɛ̃e mɛ́ kào i kũwà,

tɛ́pi i pↄ́ pↄ́ gↄ̃̀ aà kpɛ́uↄ sãsã.

27 Luabɛdeↄ aa aà tàaeↄ bↄ gupuau,

zĩ́lɛdeↄ bↄ aà kpɛ.

28 Aà bɛpↄↄ gusikɛ píi,

aa gɛ̃lɛ luapↄkũmagↄↄ.

29 Fĩa pↄ́ Lua a boɛ̀n we,

baa pↄ́ gbɛ̃vãi ì e Lua kĩ́in we.