22
Yobu tàae vĩ
Ɔ̃ Temani gbɛ̃́ Ɛlifaza mɛ̀:
Gbɛ̃nazĩna a fↄ̃ àↄ ài vĩ Luaɛe?
Baa ↄ̃nↄde kã́fĩa vĩɛ̀e?
Baa tó n yã́ na,
ńyↄ̃ fↄ̃ ǹ Gbãapiide pↄ kɛ nae?
Baa tó ń kú tàaesai,
bↄ́ ài a vĩ Luaɛi?
Ńlɛ e àlɛ zↄadↄma àlɛ bↄbↄnnↄ
kɛ́ ń dɛ aà yãmana ũ yã́i nɛe?
N vãikɛa zↄ̃ↄo lé?
N duuna lɛ́ vĩo.
N tↄ̀ↄmasì n gbɛ̃́ↄwa pã,
n gbɛ̃́ↄ pↄkasaↄ wòlomá, aa gↄ̃̀ puizi.
Ni í kpá yɛ̃̀ɛɛsaideↄwa aa mìo,
n nↄandɛnaↄ tɛ̃̀ blɛ.
Ḿmɛ ń gbãade ũ, ń tↄↄlɛ vĩ,
ń dɛ n bùsu bɛɛɛde ũ.
Ɔ̃ n gyaa gbɛ̃andoↄ yà ↄgii,
n tonɛ pↄ́ gwana vĩoↄ gbãa mìdɛ.
10 Bee yã́i músi dasi n le,
ásoo kɛ̀ma kã́ndo.
11 A yã́i gu sìma, ńlɛ gu'eo,
í kũ̀aama à dànla.
 
12 Lua ku musu a bɛo lé?
Saanaↄ pɛ́kĩi gwa, lá à zã̀!
13 Ɔ̃ ńlɛ o: Bↄ́ Lua dↄ̃i?
Kua luabɛpuana kpɛle a fↄ̃ yã́gↄ̃gↄ̃wɛ̃ɛe?
14 Lousisia kpaaɛ̀, àlɛ wá eo,
ìↄ bɛ musumusu weɛ.
15 Zɛ́ pↄ́ gbɛ̃vãiↄ bɛu à gɛ̃̀gɛ̃
ↄ̃ ń ye ǹ sɛ sↄ̃a?
16 Wà gɛ̃̀ńnↄ zɛ́a kpóo,
í dàńla à tà ń ń zĩ́mpɛlɛo.
17 Aa ò Luaɛ: Gowála!
Bↄ́ Gbãapiide a kɛwɛ̃ɛi?
18 Kási ↄ̃mɛ ń ká pↄmaawa ń ua.
Mi gbɛ̃vãiↄ lɛdama bee sio.
19 Tó gbɛ̃maaↄ yã́ pↄ́ ń lé è, an pↄ ì kɛ na,
tàaesaideↄ ì ń láanikɛ aaì mɛ:
20 Wá ibɛɛↄ mìdɛ bɛ!
Tɛ́ kũ̀ pↄ́ pↄ́ dińziↄwa.
 
21 Misiilɛ Luaɛ, níↄ naaànↄ,
ní gbasa nama e.
22 Yã́ pↄ́ àlɛ onɛ ma,
ní da n sↄ̃u.
23 Tó n ɛa n su Gbãapiidewa,
mɛ́ ń tò vãi kɛ̃̀ n uawa zã̀,
a ń zɛdↄ.
24 Tó n n mↄ̀ bɛɛɛdeↄ kↄ̀lɛ bùsuu,
mɛ́ n n vua maaↄ vũ̀aa swa'ɛ gbɛↄ guu,
25 Gbãapiide a gↄ̃ n mↄ̀ bɛɛɛde ũ,
aↄ dɛnɛ n pↄeã ã́nusu ũ.
26 N pↄ i gbasa kɛ na Gbãapiidewa,
n wɛ́ iↄ pɛ Luawa.
27 Ní wabikɛwà, i sinnↄ,
ní lɛ́gbã pↄ́ ń dↄ̀wà fĩabo.
28 Yã́ pↄ́ n zɛò i zɛkɛɛ,
n zɛ́ i pu.
29 Lua ì ĩ́andãnaↄ fu,
ì gbɛ̃́ pↄ́ an mi gↄ̃̀ pɛ́lɛaↄ suaba.
30 Baa tàaede, Lua a aà misi.
A n misi n ↄbↄlɛa vãi guu yã́i.