28
Ɔ̃nↄ sáaukpaa
Ãnusuyↄ̃kĩi kú,
vuabaasakĩi kú lↄ.
Wì mↄsi bↄ tↄↄlɛu,
wì mↄgotɛ̃ bↄ gbɛu.
Gbɛ̃nazĩna ì gusia yá,
ì tↄↄlɛ yↄɛ e a lɛ́ lɛ́u,
ì gbɛ pↄ́ kú gusia níiniiu wɛɛlɛ.
Wì ɛyↄ̃ tↄↄlɛ nↄnau wà zɛbↄ we,
gu pↄ́ gbɛ̃e lí bɛbɛ à kauo.
Ba wì loowà wà gɛ̃ò ɛpiu.
Blɛ ì bↄlɛ tↄↄlɛwaɛ,
ↄ̃ gbɛ̃nazĩna ì tↄↄlɛ títiu lilɛ
lá tɛ́ ì pↄ́ lilɛwa.
Safii ku a gbɛↄ guu,
vua ku a bùsuti guu.
Bã nↄ̀ↄsonaↄ a zɛ́ dↄ̃o,
bleaa lí wɛsi zɛ́pilɛo.
Sɛ̃̀a nↄ̀bↄ tↄdeↄ lí zɛ́pi sɛo,
nↄ̀ↄmusuↄ lí bɛbɛuo.
Gbɛ̃nazĩna ì gbɛkão wíwi we,
ì gbɛ̀sĩsĩↄ zĩ́lɛ sↄ.
10 Ì zɛ́ da gbɛu we,
ì wɛsi gupi pↄ́ bɛɛɛdeↄlɛ píi.
11 Ì zɛzↄ̃ swa'iɛ,
ì bↄ ń pↄ́ pↄ́ ulɛaↄ gupuau.
 
12 Ɔ̃nↄ sↄ̃, wì e má ni?
Dↄ̃a kúkĩin mái?
13 Gbɛ̃nazĩna a bɛɛɛ dↄ̃o,
wìli e dṹnia guuo.
14 Ísi ì mɛ á vĩo,
ísia ì mɛ a ku a kĩ́io.
15 Wa fↄ̃ lú ń vua maaoo,
wa fↄ̃ a lɛũkpakɛ ń ã́nusuoo.
16 A bɛɛɛ dɛ Ofii bùsu vuaa
ge safii gbɛ bɛɛɛde ge onisi.
17 Wa fↄ̃ lɛɛũ ń vuao ge bĩsãgbɛo,
wa fↄ̃ a fĩabo ń vua tɛ̃ɛtɛ̃ɛ pↄ́oo.
18 Wa ↄpua ge gbɛdii yã'o lↄe?
Ɔ̃nↄkũa bɛɛɛ dɛ òsowɛɛlɛaa.
19 Wa fↄ̃ lɛɛũ ń Etiopi bùsu topazaoo,
wa fↄ̃ lú ń vua maaoo.
 
20 Ɔ̃nↄ ì bↄ má ni?
Wɛzɛ̃ kúkĩin mái?
21 A ulɛa pↄ́piiɛ,
baa bã pↄ́ ì vua musu lí a wɛ́pao.
22 Kaalɛ ń gao ì mɛ,
wá swã́ a feena màɛ.
23 Lua mɛ́ a zɛ́ dↄ̃,
aàpi mɛ́ a kúkĩi dↄ̃.
24 Asa ì gugwa e dṹnia lɛ́waɛ,
ì pↄ́ pↄ́ kú zĩ́lɛ e píi.
25 Kɛ́ Lua gbãa dìlɛ ĩ́anaɛ,
mɛ́ à ísia í lɛ́ dàɛ̀,
26 kɛ́ à lou ikoyã dìlɛ,
mɛ́ à zɛbↄ̀ loupilɛaɛ,
27 zĩbeezĩ à ↄ̃nↄ laai gwà à a maabò,
a dìlɛ, ↄ̃ à a sáaukpà.
28 Ɔ̃ a ò gbɛ̃nazĩnaↄnɛ:
Vĩakɛa Diiɛ mɛ́ ì mↄ́ ń ↄ̃nↄo,
mikɛ̃a yãvãiwa mɛ́ ì ń wɛ́ kɛ̃́.*
* 28:28 Soũ 111.10, Yaa 1.7, 9.10