Bibeli Luayãtaalá Yobu 37

37

1 Zàa'ĩana ì to sↄ̃ kɛ̃magu,

ìↄ vĩ kpòkpokpo.

2 À swã́kpa à aà lↄↄ ma, àlɛ pũna,

louvĩa lɛ́ bↄ aà lɛ́u.

3 Ì loupilɛa gbaɛ musu gupiiu,

ì pílɛpilɛ e dṹnia lɛ́wa.

4 A gbɛa ì pala gbã́ugbãu,

ì pũna ń a zↄ̃ↄkɛ lↄↄo.

Tó aà lↄↄ dↄ, ìli a pílɛa zùukɛo.

5 Lua pũnaaá yãbↄnsaɛɛ,

ì yãzↄ̃ↄkɛ, wá fↄ̃ a gbadↄ̃o.

6 Ì o lougbɛɛ aà kwɛ dṹniau,

ì o louɛ aà ma ń gbãao.

7 Ì tó gbɛ̃́pii go azĩa gĩa,

kɛ́ baade e dↄ̃ ámɛ álɛ zĩkɛ we.

8 Sɛ̃̀a nↄ̀bↄↄ ì tá ń tòou,

aaↄ ye ń ulɛkĩi.

9 Zàa'ĩana ì bↄ a kpɛ́u,

ì to ĩ́an niɛ bↄlɛ.

10 Lua lɛ́'ĩanapi ì to í i,

í pↄ́ kálɛ nài i gↄ̃ lán lougbɛwa.

11 Ɔ̃mɛ ì í aso di luabɛpuanaɛ,

ↄ̃ ì to lou àↄ pílɛpilɛ a guu.

12 Lousisia ìↄ bilɛbilɛkↄ̃u lá a dìlɛɛ̀wa,

ↄ̃ ì da dṹniaa píi lá a òwa.

13 Ì mↄ́ ń a píio gotↄ̃ama ũ

ge tↄↄlɛ nínia gbɛ̃kɛkɛaɛ ũ.

14 Yã́ɛ bee ma Yobu,

zɛ ǹ Lua dabudabuↄ gwa.

15 Ń dↄ̃ lá Lua ì yãdilɛ pↄ́piↄnɛa?

Ń dↄ̃ lá ì to lou pílɛa?

16 Ń dↄ̃ lá lousisia ìↄ looa musua?

Lua dↄ̃apaɛmade mɛ́ dabudabupi kɛ̀.

17 N gbɛ̃́ pↄ́ niↄ yↄ n pↄkasaↄ guu,

tó guantɛ̃na lɛ́ mɛ'ↄ̃ tↄↄlɛwa,

18 ńyↄ̃ fↄ̃ ↄli musuu laaàwaa?

Luabɛpi gbãaɛ lán mↄ̀ díiwa.

19 Yã́ pↄ́ wá o Luaɛ dawɛ̃ɛ.

Wá yã́zɛkalɛa dↄ̃o wá wɛ́sia yã́i.

20 Wa oɛ̀ má ye mà yã'oɛ̀ yã̀?

Gbɛ̃e a we o wà a dɛ tiaa?

21 Ĩana fɛ̀lɛ luabɛpuana yà,

ĩatɛ̃ bↄ̀ musu sa, wɛ́ lɛ́ dↄwào,

a gbãa kɛ̀ zài.

22 Luabɛtɛ̃ana bↄ̀ gugbãntoo oi,

à gawi zↄ̃ↄ dà Luaɛ.

23 Wá fↄ̃ Gbãapiide leo,

aà iko zↄ̃ↄ, ìↄ yãkɛ a zɛ́wa,

ìli yã́zɛde fuangbao.

24 Ayãmɛto gbɛ̃nazĩna ì vĩakɛɛ̀,

asa ìli ↄ̃nↄnaↄ yãdao.