17
Sↄ̃ mↄafili vĩ dɛ pↄ́piia
1 Wà Yudaↄ duuna yã́ kɛ̃̀nɛ́ ń sↄ̃wa ń pɛ̃nkɛ̃bↄo.
Wa kɛ̃̀ ń sa'okĩiↄ kↄ́baↄwa ń gbɛkãoo.
2 An sa'okĩiↄ ń ń Asetaati lipɛlɛↄ yã́ ìↄ dↄ ń nɛ́ↄgu se.
Aa ku lí yɛ̀lɛlɛↄ gbáu sĩ̀sĩ lɛsĩↄ musu.
3 Má a gbɛ̀sĩsĩ na á ibɛɛↄnɛ ń ↄzĩ
ń á àizɛɛↄ ń á pↄ́ ↄdeↄ
ń gulɛsĩ pↄ́ á bòↄɛ
duuna pↄ́ á kɛ̀ á bùsuu yã́i.
4 Á ↄkpa bùsu pↄ́ má kpàwázi,
mí tó à zↄble á ibɛɛↄnɛ bùsu pↄ́ á dↄ̃o guu,
asa á tò ma pↄ fɛ̀lɛ lán tɛ́waɛ,
mɛ́ tɛ́pi aↄ kũ gↄↄpiiɛ.
5 Ma Dii ma mɛ̀, gbɛ̃́ pↄ́ bↄ̀ ma kpɛ
à gbɛ̃nazĩnaↄ náaikɛ̀,
a daa ń gã̀u gↄ̃̀ láaipↄ ũɛ.
6 A dɛ lán lí pↄ́ kú gugiiuwaɛ.
Tó nama mↄ̀, a e bleo.
Aↄ ku guwaiwaiuɛ
ge bùsu wiside pↄ́ gbɛ̃e kuuo.
7 Báaaden gbɛ̃́ pↄ́ lɛ́ ma náaikɛ,
àlɛ sↄ̃kpalɛmazi ũ.
8 A dɛ lán lí pↄ́ wa bà swa saɛ,
a zĩ́napɛlɛa íuwaɛ.
Aà bàa kú ń guwãaoo,
a lá ìↄ siaɛ.
Ìli imina yãdao,
nɛ'i ĩaaànↄo.
9 Sↄ̃ mↄafili vĩ dɛ pↄ́piia,
a kɛkɛa vĩo,
démɛ a fↄ̃ à a yã́ↄ dↄ̃i?
10 Ma Dii, mámɛ mi sↄ̃ yↄɛ,
mi nↄ̀sɛ yã́ tàasika,
mí fĩabo baadeɛ a yãkɛawa,
mí kɛɛ̀ lá a kɛ̀wa.
11 Gbɛ̃́ pↄ́ ↄda è zɛ́ vãi guu dɛ
lán dↄ̃na pↄ́ gbe kↄ̃mpa pìpiwaɛ.
Gↄↄ pↄ́ a ku a gↄↄ soplawa,
ↄ̃api a láawàɛ, i gↄ̃ sↄũ ũ gbɛzã.
12 Wá Lua kpɛ́ mɛ́ aà kpalabaa gawide ũ,
kpɛ́pi mɛ́ fuańla za asĩnizĩ.
13 Dii, ḿmɛ Isailiↄ wɛ́ dↄnzi,
wí a gbɛ̃́ pↄ́ pãkpànziↄ kṹ.
Gbɛ̃́ pↄ́ bↄ̀ ma kpɛↄ dɛ lán tↄ́ pↄ́ wa kɛ̃̀ tↄↄlɛwawaɛ,
asa aa pãkpà n gbɛ̃́ pↄ́ ń dɛ nibↄna í wɛ̃nide ũziɛ.
14 Ma gbã́gbã Dii, mí gbã́gbã,
ma bↄ Dii, mí bↄ,
asa n táasi miↄ lɛ gↄↄpii.
15 Wì mɛ yã́ pↄ́ Dii ò ku máɛ?
Aà kɛ wà e mɛ!
16 Mi gí dↄaainɛ n gbɛ̃́ↄnɛo,
ń dↄ̃ kɛ́ mámɛ mi wɛ́tɛ̃agↄↄ nidɛo,
yã́ pↄ́ ì bↄ ma lɛ́u ulɛanɛo.
17 Ńsu to sↄ̃ kɛ̃maguo,
ḿmɛ ń ma ulɛkĩi ũ yãpãsĩgↄↄ.
18 To wí ma wɛtãnaↄ kṹ,
mapi sↄ̃, ńsu to wí ma kũo.
To sↄ̃ kɛ̃́ńgu,
mapi sↄ̃, ńsu to sↄ̃ kɛ̃maguo.
Ǹ ń ká yãpãsĩpi gↄↄwa,
ní ń wíwi e lɛɛ pla.
Kã́mabogↄↄ
19 Dii òmɛɛ: Gɛ ǹ zɛ Gbɛ̃́ↄ Bↄlɛu, gu pↄ́ Yuda kíaↄ ìↄ gɛ̃u, aaìↄ bↄu, ní gɛ́ Yelusalɛũ bↄlɛ kĩniↄu lↄ píi.
20 Ní onɛ́ aa swã́kpa aa ma yãma, Yuda kíaↄ ń Yelusalɛũdeↄ píi ń Yuda pↄ́ aalɛ gɛ̃ bↄlɛpiↄuↄ píi.
21 Ma Dii ma mɛ̀: À laaika!
Ásu asosɛ kã́mabogↄↄzĩo,
ásu gɛ̃ò Yelusalɛũ bↄlɛↄuo.
22 Ásu bↄò á ua kã́mabogↄↄzĩo,
ásuli zĩe kɛ gↄↄpi zĩ́o.
Àliↄ dↄ̃ kɛ́ kã́mabogↄↄá ma pↄ́ɛ,
lá má dìlɛ á deziↄnɛwa.
23 Kási aai mao, aai swã́sɛio,
aa ń swã́ kàkaɛ, aai mao,
aa gì totoaiɛ.
24 Ma Dii ma mɛ̀, tó a ma yãmà, álɛ gɛ̃ wɛ̃́lɛpi bↄlɛↄu ń asoo kã́mabogↄↄzĩ lↄo, tó á dↄ̃ kɛ́ gↄↄpiá ma pↄ́ɛ, álɛ zĩe kɛ gↄↄpi zĩ́o,
25 kía pↄ́ aa zↄ̃lɛa Davidi kpalauↄ gɛ̃ wɛ̃́lɛɛ beepi bↄlɛↄu ń ń ìwaↄ kua sↄ̃́goↄ guu ń dia sↄ̃́ↄ kpɛo. Yelusalɛũdeↄ ń Yudaↄ aaↄ kúńnↄ, aaiↄ ku wɛ̃́lɛɛ beepiu gↄↄpii.
26 Wa bↄ wɛ̃́lɛ pↄ́ liaa Yelusalɛũiↄ guu ń Yuda wɛ̃́lɛↄ píi ń Bɛ̃yãmɛɛ bui wɛ̃́lɛↄ ń gusalalao ń gusĩsĩdeo ń Nɛgɛvɛ guwaiwaio, wi mↄ ma kpɛ́u ń sa pↄ́ wì a pↄ́ kátɛu à tɛ́kũ obↄↄ ń sa pãle obↄↄ ń pↄ́wɛntio ń tulaletio ma sáaukpaa yã́i.
27 Tó i ma yãma á dↄ̃̀ kɛ́ kã́mabogↄↄzĩá ma pↄ́ɛo, mɛ́ álɛ gɛ̃ Yelusalɛũ bↄlɛↄu ń asoo kã́mabogↄↄzĩ, má tɛ́ka bↄlɛpiↄuɛ, i kṹ á zɛgikĩiↄwa. Wa fↄ̃ tɛ́pi dɛo.