2
Isailiↄ bↄa Dii kpɛ
Dii yã'òmɛɛ à mɛ̀: Gɛ ǹ yã́ɛ bee kpàwakɛ Yelusalɛũdeↄ swã́u.
Ma Dii ma mɛ̀,
á wɛ̃ndiagↄↄ gbɛ̃kɛ pↄ́ á vĩmanↄ dↄmagu
gↄↄ pↄ́ á yemazi ma nↄ dafu ũ.
Gↄↄ bee á tɛmazi guwaiwaiu,
gu pↄ́ wi pↄ́tↄ̃uo.
Aa ku ma mɛ̀ndo yã́iɛ,
aamɛ ma buapↄ́ káauↄ ũ.
Ma gbɛ̃́ pↄ́ ń mↄmↄↄ tàae è,
ↄ̃ músi ń lé.
Ma Dii mámɛ má ò.
À swã́sɛ ma yã́i, á Isailiↄ,
á Yakↄbu buiↄ píi.
Ma Dii ma mɛ̀,
tàae kpele á deziↄ èa,
ↄ̃ aa zã̀kũmanↄi?
Aa tɛ̀ tã́aↄzi, ↄ̃ aa gì ↄi.
Ma ń bↄ́lɛ Egipi ma dↄaanɛ́ guwaiwaiu
ń sɛ̃gbão ń bùsu tↄ̃ↄ'ɛdeo
ń bùsu iminadeo ń gusisi pãsĩo,
gu pↄ́ gbɛ̃e lí a baa vĩo mɛ́ gbɛ̃e líↄ kuuo,
kási aai ma gbɛao.
Ma suńnↄ tↄↄlɛ táaedeu la,
aaliↄ a libɛↄ ble ń a pↄmaaↄ.
Kɛ́ aa kà, aa ma bùsu gbãlɛ̀,
aa tò à gↄ̃̀ pↄ́ pↄ́ má yeio ũ.
An sa'onaↄ i ma dↄ̃o,
ma ikoyãdanɛdeↄ i ma dↄ̃o,
an dↄaanaↄ bↄ̀ ma kpɛ,
an ãnabiↄ ãnabikɛkɛ̀ ń Baali gbãao,
aa tɛ̀ pↄ́ pↄ́ lí kã́fĩakɛnɛ́oↄzi.
A yã́i má mↄ́ ń á yã́o sↄ̃,
mɛ́ má mↄ́ ń á nɛ́ↄ ń á tↄũnaↄ yã́o.
Ma Dii mámɛ má ò.
10 À bua ísiawa e Sipi bùsuu à gwa.
À gbɛ̃́ zĩ Kedaa bùsuu à a yã́ tàasika,
í gwa tó yã́ɛ bee taa kɛ̀ we yãa.
11 Buie a diiↄ lìlɛ yãae?
Kási an tã́apiↄá Lua no.
Ma gbɛ̃́ pↄ́ má dɛ Lua gawide ũ,
ma gbɛ̃́ↄ ma lɛũkpakɛ̀
ń pↄ́ pↄ́ lí kã́fĩakɛnɛ́oↄ.
12 Á musudeↄ, à to yã́pi diwá,
á mɛ i seenata à gↄ̃ sã̀iii.
Ma Dii mámɛ má ò.
13 Asa ma gbɛ̃́ↄ duunakɛ̀ lɛɛ plaɛ.
Mámɛ má nibↄna í wɛ̃nide ũ,
ↄ̃ aa ma to we,
aa gɛ̀ wà biaↄ yↄ̃̀ ńzĩaɛ,
bia tɛfɛɛna pↄ́ aa fↄ̃ í dilɛoↄ.
14 Isailiↄá zↄↄnɛe?
Wà ń í zↄble guu nɛe?
Bↄ́yãi aa gↄ̃̀ pↄvĩaↄ ũ sai?
15 Nↄ̀ↄmusuↄ pàlamá aa pũ̀namá,
ↄ̃ aa ń bùsu yàa,
an wɛ̃́lɛↄ tɛkũ̀, gbɛ̃e ku we lↄo.
16 Mɛfisideↄ ń Tapanɛsideↄ ń mi wànɛ́.
17 Ámɛ a yã́pi ì ázĩaɛo lò?
Ma Dii á Lua, kɛ́ má zɛmikũaɛ́,
ↄ̃ a ma to we.
18 Bↄ́yãi álɛ gɛ́ Egipi Sioo í miii?
Àkɛa álɛ gɛ́ Asili Uflata í miii?
19 Á vãikɛa a wi á musuɛ,
á pↄ̀ↄbↄzãkɛa a wɛ́tɛ̃a iɛ́.
À làasookɛ, í dↄ̃ kɛ́
á bↄa ma Dii á Lua kpɛ vãi,
mɛ́ á kua vĩakɛamɛɛ sai ĩ́i.
Ma Dii Lua Zĩgↄ̃de mámɛ má ò.
Isailiↄ dɛa nↄ náaisai ũ
20 A ma zuu gbòo á nↄɛ à gɛ̃̀gɛ̃,
a ma baↄ kɛ̃̀kɛ̃,
a mɛ̀ á zↄblemɛɛo.
Sĩana guu i gbãsĩkɛ sĩ̀sĩ lɛsĩ píi musu
ń lí yɛ̀lɛlɛↄ píi gbáuo.
21 Ma á bá vɛ̃ɛli maa náaide ũɛ.
Kpelewa a kɛ̃a,
a gↄ̃ vɛ̃ɛli bↄlɛnzĩaɛ ũi?
22 Baa tó a zu'ò ń saoo
ń mↄsↄnao maamaa,
á tàae tèbateba a láamɛɛo.
Ma Dii Lua mámɛ má ò.
23 Kpelewa á fↄ̃ o i gbãlɛo,
i kɛ Baaliↄnɛ kɛ̀kɛo ni?
À yã́ pↄ́ á kɛ̀ swadↄↄiↄ gwa,
à làasookɛ á yãkɛapiↄwa.
I gɛ́ le à su la,
lán yiongo núnu pↄ́ a mɛ fɛ̀lɛwa,
24 lán sɛ̃̀a zàa'ĩn da pↄ́ dↄ́ɛkɛ̀ ń gbáao,
àlɛ gↄ̃ ĩ́ana sɛsɛwa.
Démɛ a fↄ̃ à aà lɛ́ liaa gↄↄ pↄ́ aà mɛ fɛ̀lɛi?
Zàa'ĩn sa pↄ́ lɛ́ aà wɛɛlɛↄ kpasao,
aa aà e a gↄↄwaɛ.
25 Ásu àↄ kpálɛkɛńzi
e á kyale gɛ́ yaa á gbáu,
á kòlo giigagao.
Ń beeo a mɛ̀ a zɛkɛo,
wá ye dii zĩ̀loↄziɛ,
sema wà gɛ́má.
26 Lá wí ì kpã́i kṹ, tó wà bↄ̀wà,
màa wa wida Isailiↄwa,
an kíaↄ ń ń gbãadeↄ
ń ń sa'onaↄ ń ń ãnabiↄ.
27 Aaì o líɛ: Wá maen n ũ,
aaì o gbɛɛ: Ḿmɛ n wá í.
Aa bↄ̀ ma kpɛ, aai zɛmanↄo.
Gↄↄ pↄ́ taasi ń lé,
ↄ̃ aaì mɛ mà fɛlɛ mà ń suaba.
28 Dii pↄ́ á kɛ̀ ázĩaɛↄ ku máɛ?
Aa fɛlɛ á taasikɛgↄↄ,
tó aa fↄ̃ á suaba!
Asa á Yudaↄ,
á diiↄ dasi kà á wɛ̃́lɛↄwa.
29 Bↄ́yãi álɛ zↄakaimazii?
Ápii a bↄ ma kpɛɛ.
Ma Dii mámɛ má ò.
30 Ma ĩadà á deziↄwa pãɛ,
aai totoapi yãdao.
Aa lɛ̀lɛ ń ãnabiↄwa
lán nↄ̀ↄmusu pↄkaalɛnawa.
31 Á gbãgbɛ̃ↄ, à wɛ́tɛ ma yã́i.
Ma gↄ̃ Isailiↄnɛ gbáa
ge gubeebee ũ yã̀?
Bↄ́yãi ma gbɛ̃́piↄ ì mɛ
waↄ ń bɛbɛa kɛɛ,
wa mↄ ma kĩ́i lↄo ni?
32 Nↄamblebↄ yã́ a fↄ̃ sã wɛ̃́ndiague?
Zãkɛzĩ pↄ́ↄ yã́ a fↄ̃ sã nↄ dafugue?
Kási ma yã́ sã̀ ma gbɛ̃́ↄgu
à gↄↄplakɛ̀.
33 Á yenzi ɛsɛ vĩɛ fá!
Baa káalua sà zↄ̃ↄ,
á á yãkɛa dadaɛ̀.
34 Wì taaside yãesaide au e á pↄkasaↄwa,
i kɛ a ń lé á kpɛ́u,
aalɛ á pↄ́ↄ sɛ́lɛn sↄ̃o.
35 Gia ń beeo i mɛ á yãe vĩo,
ma pↄ a paázio.
Lá a mɛ̀ i duunakɛo,
má yã́kpalɛkɛánↄɛ.
36 Bↄ́yãi iↄ liaaliaa à á yãkɛa lilɛi?
Egipiↄ widawá,
lá Asiliↄ kɛ̀ɛ́wa.
37 Á bↄ we à su ń ↄo dia á musuɛ,
asa gbɛ̃́ pↄ́ álɛ ń náaikɛpiↄ,
ma gińziɛ, á dↄnlɛ emáo.