30
Isailiↄ sua ń pá ziu
1 Dii yã'ò Zelemiiɛ à mɛ̀:
2 Ma Dii Isailiↄ Lua ma mɛ̀, yã́ pↄ́ má ònɛ píi kɛ̃́ lá guu.
3 Ma Dii ma mɛ̀, gwa, gↄↄe a mↄ́ kɛ́ má a gbɛ̃́ Isailiↄ ń Yudaↄ bↄ zĩ̀zↄkɛu, mí suńnↄ bùsu pↄ́ má kpà ń deziↄwa aa gↄ̃ vĩ guu. Ma Dii mámɛ má ò.
4 Yã́ pↄ́ Dii ò Isailiↄ ń Yudaↄ musun kɛ, à mɛ̀:
5 Ma Dii ma mɛ̀, à vĩa wii ma dↄ!
Sↄ̃kɛ̃ngu wiiɛ, aafia wii no.
6 À gbɛ̃e la à ma,
gↄ̃ɛ mɛ́ ì kúlɛ nɛ'ia?
Àkɛa ma nɛgↄ̃naↄ è,
an oa fɛ̃́nkpaa píi,
aalɛ ↄ fĩfĩ ń gbɛɛwa
lán nↄɛ pↄ́ lɛ́ nɛ'iwai?
7 Waiyoo, asa gↄↄpi taasi vĩ zↄ̃ↄ,
gↄↄe aↄ muaaòo.
Yakↄbu buiↄ taasigↄↄɛ,
ãma aa bↄu.
8 Ma Dii Zĩgↄ̃de ma mɛ̀,
gↄↄ bee má zuu ɛ́'ɛnɛ́ ń nↄɛ,
mí ń mↄdaonaↄ kɛ̃́kɛ̃nɛ́.
Aa zↄble bui zĩ̀loↄnɛ lↄo,
9 ma Dii ń Lua, mámɛ aa zↄblemɛɛ,
ń ń kí Davidi bui pↄ́ má dilɛnɛ́o.
10 Á Yakↄbu bui ma zↄ̀blenaↄ,
ásu to vĩa á kũo,
á Isailiↄ, ásu bílikɛo.
Ma Dii mámɛ má ò.
Asa mapi má á bↄlɛ za guzãzãuɛ,
mí á buiↄ bↄlɛ ń zↄblebusuu.
Yakↄbu buiↄ ɛa aaↄ ku dↄdↄa nana,
gbɛ̃e a to vĩa ń kṹ lↄo.
11 Ma Dii ma mɛ̀,
má kúánↄ á suabaa yã́iɛ.
Bui pↄ́ málɛ á fãaa ń guuↄ,
baa tó ma ń mìdɛ píi,
má á midɛ míↄmiↄo.
Má á toto a zɛ́waɛ,
má we à bↄ swã́gagasaio.
12 Asa ma Dii ma mɛ̀,
á bↄá bↄ̀kↄↄɛ,
á kɛa'ĩa uusikɛ̀.
13 Gbɛ̃e ku à kulɛkɛmɛɛ á yã́ musuo,
á bↄ a ɛsɛ mao, a láaa vĩo.
14 Á yã́ sã̀ á yenzideↄgu,
aa yeázi lↄo,
asa ma á lɛ́ lán á ibɛɛwaɛ,
ma á toto lán gbɛ̃́ pãsĩwaɛ,
asa á tàaeↄ zↄ̃ↄɛ,
á duuna tìisi.
15 Ásu wiilɛ á bↄ̀kↄↄ wãwã yã́ musuo.
Á tàae zↄ̃ↄ ń á duuna tìisio yã́i
ma yã́ beeↄ kɛ̀iɛ́.
16 Wa á tàitainaↄ taitai píiɛ,
wi tá ń á ibɛɛↄ zĩ̀zↄↄ ũ píi.
Gbɛ̃́ pↄ́ aa á pↄ́ↄ nàaaↄ gↄ̃ pↄ́ naaaaↄ ũ sↄ̃ɛ,
gbɛ̃́ pↄ́ aa á pↄ́ↄ sɛ̀lɛↄ gↄ̃ pↄ́ sɛ́lɛaↄ ũɛ.
17 Má ɛa á gba aafia,
má tó á bↄ láa,
kɛ́ wìↄ oɛ́ pↄ́ vũaaaↄ,
Siↄnade pↄ́ gbɛ̃e yeńzioↄ yã́i.
Ma Dii mámɛ má ò.
18 Má su ń Yakↄbu buiↄ ń pá ziu,
má ń wɛ̃nagwa aa su ń gbɛu.
Aa ń mɛɛwia zia vu,
aai ɛa kibɛ kpá lá a ziwa.
19 Wa sáaukpaa mamá ń pↄna súuo.
Má tó aa dasikũɛ, aa lao lↄo,
má ń kpɛlaɛ, wa ń kpɛbↄ lↄo.
20 Aaↄ dɛ lán káauwa,
aaↄ zɛdↄamɛɛ ḿpiiɛ,
mí ĩada gbɛ̃́ pↄ́ gbãamↄ̀nɛ́ↄwa.
21 An gbɛ̃e mɛ́ aↄ dɛ ń dↄaana ũ,
gbɛ̃́ pↄ́ nɛblè ń guu mɛ́ aↄ dɛ ń kía ũ.
Má tó aà sↄ̃mazi aàↄ kumanↄ kãi.
Tó màa no, démɛ a fↄ̃ gi a wɛ̃nii à sↄ̃mazii?
Ma Dii mámɛ má ò.
22 Aa gↄ̃ ma gbɛ̃́ↄ ũ,
mí gↄ̃ ń Lua ũ.
23 Ma pↄfɛ̃ a fɛlɛ lán zàa'ĩanawaɛ,
i su vãikɛnaↄ miwa lán zàalolowa.
24 Ma pↄkũma pãsĩ a weeo,
sema ma yã́ pↄ́ ma zɛò ma sↄ̃u kɛ̀.
Gↄↄgbɛzãzĩ á yã́pi gbadↄ̃.