Bibeli Luayãtaalá Nauũ 2

2

Zĩblea Ninivawa

1 Baonakpana gwa bɛ sĩ̀sĩ musu,

àlɛ aafia kpàwakɛ.*

Yudaↄ, àli á dikpɛↄ kɛ,

àli lɛ́ pↄ́ á kɛ̀ Diiwaↄ fĩaboɛ̀.

Gbɛ̃kaalɛnapiↄ ɛa lɛ́lɛwá lↄo,

wà ń mìdɛ ḿpii.

2 Ninivadeↄ, wàlɛ mↄ́ lɛ́lɛiwá.

À á bĩ́i dↄ̃́a, íↄ zɛ́ gwa!

À tepɛ, í zɛ gíũgiũ!

3 Dii a ɛa Yakↄbu buiↄ gawi kpámá,

lá Isailipiↄ vĩ yãawaɛ.

Asa gbɛ̃waanaↄ mↄ̀ ń bùsu wàaɛ,

aa ń vɛ̃ɛbuↄ dɛ̀.

4 An zĩgↄ̃ gbãaↄ sɛ̀ngbaoↄ tã̀,

nɛgↄ̃napiↄ ula tɛ̃a zóizoiↄ daa,

an sↄ̃́go mↄↄ lɛ́ pípi,

aa ku sↄu guu,

aalɛ ń sↄ̃naↄ gbãɛgbãɛ.

5 Aa sì wɛ̃́lɛpi zɛau ń ń sↄ̃́goↄ bàzaao,

aalɛ kɛ gãaɛ kìlikili.

Aalɛ gɛ̃ bìoobioo lán sɛ̃tɛwa,

aa wãa lán loupilɛawa.

6 Wà zĩgↄ̃ sĩanaↄ sìsi,

aalɛ wã, aalɛ kpakpagua,

aa mipɛ̀ bĩ́iwa ń wãao,

aalɛ ń sɛ̀ngbaoↄ pɛ́lɛpɛlɛ.

7 Aa bĩ́ibↄlɛↄ wɛ̃̀wɛ̃,

gu pↄ́ swa pã̀u wɛ̃́lɛpia,

aa kibɛ kwɛ̀.

8 Wà tà ń Niniva kí nao zĩ̀zↄ ũ,

aà zↄnↄɛnaↄ lɛ́ ↄ́ↄlↄ lán felenguuluↄwa,

aalɛ ńzĩa gbɛ̃gbɛ̃.

9 Ninivapi gↄ̃̀ lán íkalɛkĩiwa.

A gbɛ̃́ↄ lɛ́ gɛ̃zɛa lán íwa.

Wàlɛ onɛ́: À zɛ! À zɛ!

Ãma gbɛ̃e i ɛao.

10 À ã́nusu sɛ́lɛ! À vua naaa!

Àizɛɛ diuɛ ń pↄ́ bɛɛɛdeↄ píi.

11 Wà pↄ́ↄ nàaa, wà pↄ́ↄ sɛ̀lɛ,

wɛ̃́lɛ gↄ̃̀ da gii.

Sↄ̃ kɛ̃̀ gbɛ̃́ↄgu,

an gbázĩna lɛ́ lua,

an mɛ zɛa lↄo,

an baade oosìsi.

12 Nↄ̀ↄmusupiↄ tòo gɛ̀ máɛ?

Nↄ̀ↄmusu nɛ́ↄ pↄblekĩipi ku má ni?

Nↄ̀ↄmusu sa ń dao ìↄ bɛbɛ we yãa,

gbɛ̃e yã́ lí ń nɛ́ↄ vĩakũo.

13 Nↄ̀ↄmusu sapi nↄ̀ↄ kũ̀ a nɛ́ↄnɛ yãa,

à nↄ̀ↄ ɛ̀ a naↄnɛ, à mↄ̀má.

Nↄ̀ↄ pↄ́ a tàitaiↄ ka aà tòo pai.

14 Ma Dii Zĩgↄ̃de ma mɛ̀:

Má fɛlɛnnↄ,

má n sↄ̃́goↄ kpasa, a súɛlɛ iↄ dↄ,

wi n nɛ́piↄ dɛdɛ ń fɛ̃ndao.

Má pↄ́ pↄ́ ń sìmáↄ kaalɛ,

wa n zĩnaↄ yã'o ma lↄo.

* 2:1 Isa 52.7