Bibeli Luayãtaalá Yáasiↄ 11

11

1 Dii za pↄ́yↄ̃a ń mↄafiliogu,

kiloolɛa a zɛ́wa ì kaaàgu.

2 Zĩa sɛa lɛsĩ ì mↄ́ ń wío,

zĩabusaa mɛ́ ↄ̃nↄyã ũ.

3 Gbɛ̃maa nↄ̀sɛpua ì aà dazɛwa,

náaisaide nↄ̀sɛ bɛ̃̀ɛ ì aà ↄ̃̀ↄkpa.

4 Àizɛɛ ài vĩ yã́kpalɛkɛgↄↄzĩo,

yãkɛa a zɛ́wa mɛ́ ì ń sí gawa.

5 Tàaesaide maakɛa ì zɛpooɛ̀,

vãikɛna yãvãikɛa ì aà nɛ́.

6 Nↄ̀sɛpuade maakɛa ì aà bↄ,

náaisaide pↄnidɛa ì aà kṹ.

7 Tó gbɛ̃vãi gà, aà tãmaa ì midɛ,

pↄ́ pↄ́ à wɛdↄ̀i a wɛ̃nigↄↄ ì láa.

8 Gbɛ̃maa ì bↄ taasiu,

ↄ̃ gbɛ̃vãi ì gɛ̃u aà gɛ̃ɛ ũ.

9 Luayãdansai lɛ́ ì aà gbɛ̃́dee ↄ̃̀ↄkpa,

ãma dↄ̃a ì gbɛ̃maa bↄu.

10 Tó gbɛ̃maaↄ ku namau, wɛ̃́lɛ ìↄ naɛ,

tó gbɛ̃vãiↄ gàga, wì gulakɛ.

11 Wɛ̃́lɛ ì kã́fĩ nↄ̀sɛpuadeↄ sabai,

gbɛ̃vãiↄ lɛ́ ì wɛ̃́lɛ dɛ.

12 Ɔ̃nↄkɛ̃sãmade ì saka a gbɛ̃́deegu,

laaide ì a lɛ́ fↄ̃́.

13 Gbɛ̃pena ì bↄ ń dãↄ asiio gupuau,

gbɛ̃́ náaide ì pↄ́ kúlɛwà.

14 Dↄaanasaikɛ ì to gbɛ̃́ↄ fu,

yãkɛkɛn dasiↄ ì to wà zĩble.

15 Tó n gbɛ̃pãle fĩa dì ń miwa, taasi n kaɛ,

gbɛ̃́ pↄ́ mibↄ̀lɛu ì gↄ̃ a laaiwa.

16 Gbãamↄnɛde ìↄ àizɛɛ vĩ,

ãma nↄɛ nↄ̀sɛmaade ìↄ gbianɛ́.

17 Sùuude ì maa i azĩaɛ,

gbɛ̃́ pãsĩ ì azĩa kpa ĩai.

18 Gbɛ̃vãi zĩ ài líↄ báaa vĩo,

yãmaatↄ̃na ì ài sĩana e.

19 Kua maa sĩana ì ń ká wɛ̃niwa,

tɛa vãizi ì mↄ́ ń gao.

20 Dii ye nↄ̀sɛvãide gĩyãio,

tàaesaide yã́ ì kaaàgu.

21 Sĩana guu gbɛ̃vãiↄ bↄ pão,

gbɛ̃maaↄ mɛ́ aa bↄ aafia.

22 Lá vua tãana dɛ sàwakusana níu,

màa nↄ kɛfɛn ↄ̃nↄsaide dɛ.

23 Gbɛ̃maaↄ pↄeã ì ń ká namawa,

gbɛ̃vãiↄ tãmaa ì ń nɛ́.

24 Gbɛ̃́ pↄ́ ↄ pòo ì kã́fĩa e dɛ a zia,

gbɛ̃́ pↄ́ gì pↄ́ pↄ́ dɛ à kpa kpái, pↄ́ ì kɛ̃́sãwà.

25 Gbɛ̃nazĩn báaade àↄ ku namau,

gbɛ̃́ pↄ́ ì ń gba niɛ a niɛ e sↄ̃.*

26 Wì gbɛ̃́ pↄ́ ì pↄ́wɛna ↄ̃a na dã kaɛ,

wì sa na o gbɛ̃́ pↄ́ ì yíamáɛ.

27 Gbɛ̃́ pↄ́ ì maa wɛɛlɛ aↄ na ń gbɛ̃́ↄ,

gbɛ̃́ pↄ́ ì vãi wɛɛlɛ, vãi a aà le.

28 Gbɛ̃́ pↄ́ ì a àizɛɛ náaikɛ a lɛ́lɛ,

gbɛ̃maa a bↄlↄbↄ lán lí láwa.

29 Gbɛ̃́ pↄ́ yã'ì a uaɛ a gↄ̃ gii,

sↄũ a gↄ̃ ↄ̃nↄna zↄ ũ.

30 Gbɛ̃maa yãkɛa gbɛá lí wɛ̃nideɛ,

ↄ̃nↄna ì gbɛ̃́ e.

31 Lá Lua ì fĩabo gbɛ̃maaɛ dṹniau,

wa vãikɛna ń duunkɛnao pↄ́ o lↄe?†

* 11:25 Mat 10.42 † 11:31 1Piɛ 4.18