18
Zĩa pↄeã mɛ́ ì dↄaa gbɛ̃́ pↄ́ ì kɛ̃́máɛ,
ì fɛ̃́ńzi lɛdama píi musu.
Sↄũ lí pↄnakɛ wɛzɛ̃ yã́ musuo,
yã́ pↄ́ dɛ̀dɛwà ↄ̃ ì o.
Vãikɛa ì mↄ́ ń sakanguoɛ,
kpɛbↄyã ì láani inɛ́.
Gbɛ̃nazĩna lɛgbɛ dɛ lán ísiwaɛ,
lán swa'i bàalɛa ge ↄ̃nↄ lↄ̀ↄwa.
Kɛa vãikɛnaɛ kɛ̀kɛ
ge yãkɛkɛa yãesaideɛ ↄkpɛai maao.
Sↄũ lɛ́ ì aà da sòleu,
aà yã'oa ì aà kpa gbɛ̃ai.
Sↄũ lɛ́ ì aà ↄ̃̀ↄkpa,
aà yã'oa ì aà kũ lán baiwa.
Gbɛ̃pena yã́ ì kɛnɛ́ lán zↄ́wa,
ì gɛ̃ lɛ́u dↄ̃̀ↄ e nↄ̀sɛ kpɛau.
Gbɛ̃́ pↄ́ ì pãkpa a zĩiá músi dãunaɛ.
10 Dii tↄ́á ulɛkĩi lɛsĩɛ,
gbɛ̃maa ì bàalɛ à azĩa yeu.
11 Ɔde àizɛɛ ìↄ dɛɛ̀ wɛ̃́lɛ kàede ũ,
a dɛɛ̀ bĩ́i pↄ́ wa fↄ̃ dɛdɛwào ũ.
12 Zĩasɛa lɛsĩ ì mↄ́ gbɛ̃́ɛ ń lɛ́lɛaoɛ,
zĩabusaa ì mↄ́ ń bɛɛɛo.
13 Gbɛ̃́ pↄ́ ì yã́zãsi yãmasai,
mìsaikɛ ń kpɛbↄao mɛ́ ì gↄ̃ɛ̀.
14 Sↄ̃dilɛa ì gbɛ̃́ gba gbãa gyãpɛwa,
ãma démɛ a pↄsia fↄ̃i?
15 Wɛzɛ̃na ì yãdada a sↄ̃u,
ↄ̃nↄna swã́ ìↄ dↄ dↄ̃ai.
16 Gba pↄ́ gbɛ̃́ dà ì zɛkɛkɛɛ̀,
ì zɛwɛ̃ɛ̀ gbɛ̃zↄ̃ↄↄ kĩ́i.
17 Gbɛ̃́ pↄ́ dↄ̀aa a yã'ò, wì aà yã́zɛ e,
e aà ibɛɛ àↄ gɛ́ aà pↄ́ oi.
18 Yãkɛkɛa gbɛaa Diiwa ń gbɛo
ì sòle midɛ, ì gↄ̃gbãaↄ yoaa.
19 Daɛ pↄ́ wà tàaekɛ̀ɛ̀ yã́ ìↄ gbãa lán bĩ́iwaɛ,
aà sòle dɛ lán zɛ́kakaa ń lɛowaɛ.
20 Yã'oa ì gbɛ̃́ ká kãawa,
aà lɛgbɛ'i ì to pↄ́ mↄ́wà.
21 Ga ń wɛ̃nio ku lɛ́uɛ,
gbɛ̃́ pↄ́ ye yã'oai a a gbɛ'e.
22 Gbɛ̃́ pↄ́ nↄ è pↄmaa è,
báaa bee bↄ̀ Dii kĩ́iɛ.
23 Taaside ì yã'o wɛ̃nawɛ̃na,
ↄde ì yã́zãsi gbã́ugbãu.
24 Gbɛ̃na yàaa ì yãvãi inɛ́ɛ,
gbɛ̃naeↄ ku aaìↄ nańnↄ dɛ ua gbɛ̃́a.