2
Tɛa ↄ̃nↄi ài
Ma nɛ́, tó n ma yã́ sì,
mɛ́ n ma yãdilɛaↄ kũa n sↄ̃u,
tó ńlɛ swãdↄ ↄ̃nↄyãi,
mɛ́ n sↄ̃ kpà a dadaawa,
tó n lɛzù laaizi,
mɛ́ n wiilɛ̀ yãdadaai,
tó n kpálɛkɛ̀i ã́nusu ũ,
mɛ́ n wɛ̀ɛlɛ àizɛɛ ulɛa ũ,*
ńyↄ̃ vĩakɛa Diiɛ midↄ̃ sa,
ní Lua dↄ̃a e.
Asa Dii mɛ́ ì ń gba ↄ̃nↄ,
dadaa ń dↄ̃ao ì bↄ aà kĩ́iɛ.
A kã́fĩa zɛ́ kũa gbɛ̃maaↄnɛ,
a dɛ sɛ̀ngbao ũ tàaesaideↄnɛ.
Ì ↄlia gbɛ̃maaↄzi ń táa'oau,
ì a yãmanaↄ dↄ̃́a ń yã́ píi kɛa guu.
 
Ńyↄ̃ yã́zɛde dↄ̃ sa ń yã́ dↄ̀ↄdeo
ń yã́ pↄ́ zɛvĩo ń maa píi zɛ́o.
10 Asa ↄ̃nↄ a mↄma,
mɛ́ dↄ̃a a n kã́si.
11 Kua ń laaio a n dↄ̃́a,
yã́zɛdↄ̃a a ↄlianzi.
12 A n bↄ gbɛ̃vãiↄ zɛ́u
ń yãbɛ̃ɛkɛnaↄ ↄzĩo.
13 Gbɛ̃́piↄ pã̀alɛ yãmaa zɛ́ɛ,
aa gusia zɛ́ sɛ̀.
14 Aaì pↄnakɛ ń vãikɛao,
aaì vĩ aaↄ kɛ̃aa ń yãbɛ̃ɛ faasaio.
15 An kɛkɛá faa vĩo,
aaìↄ yãkɛ ń kↄ̃nioɛ.
 
16 Ɔ̃nↄpi a n bↄ káalua ↄzĩ,
a n si nↄɛ pãle yã́ nana oanɛwa.
17 Nↄɛpi pãkpà a nɛnↄn gↄ̃i,
à a Lua bàa kuaanↄ yã́ gbòo.
18 Aà bɛ ì mipɛńnↄ gawaɛ,
aà kpɛ́ zɛ́ ì táńnↄ bɛdau.
19 Gbɛ̃́ pↄ́ gɛ̃̀aàzi lí nↄ̀sɛlilɛo,
ìli wɛ̃ni zɛ́ le lↄo.
 
20 Ɔ̃nↄpi a n da gbɛ̃maaↄ zɛ́wa,
níↄ dↄ̀ↄdeↄ zɛ́ kũa.
21 Asa nↄ̀sɛpuadeↄ mɛ́ aa gↄ̃ bùsu vĩ,
tàaesaideↄ mɛ́ aaↄ ku a guu.
22 Vãikɛnaↄ sↄ̃, wa ń yá ń bↄlɛuɛ,
wa náaisaideↄ kpoɛuɛ.
* 2:4 Mat 13.44