20
Vɛ̃ɛ ì to wà gↄ̃ láanipↄ ũ,
í gbãa ì ń da yãbↄlɛu,
gbɛ̃́ pↄ́ tò à a dɛ ↄ̃nↄ vĩo.
Kía palaaá nↄ̀ↄmusu pũnaaɛ,
gbɛ̃́ pↄ́ aà pↄ fɛ̃̀ɛ̀ azĩa kpà gaiɛ.
Lɛdaa lɛkpaau sai ì to wàↄ bɛɛɛ vĩ,
faasaideↄ ìↄ kãa ḿpiiɛ.
Màade lí sapa a gↄↄo,
tó à gɛ̀ bua pↄkɛkɛgↄↄ, ìli pↄe eo.
Gbɛ̃nazĩna sↄ̃ yã́ dɛ lán ísiwaɛ,
wɛzɛ̃na mɛ́ a tↄa dↄ̃.
Gbɛ̃́ daside ì a gbɛ̃kɛkɛanɛ́ yã'o,
ãma bↄa gbɛ̃́ náaidewa zĩ'ũ.
Gbɛ̃́ pↄ́ ì yãkɛ a zɛ́wa mɛ́ maa,
báaaden nɛ́ pↄ́ à gà à ń tóↄ ũ.
Kía zↄ̃lɛa a yã́kpalɛkɛkĩi
ì vãi píi dↄ̃ a wɛ́ guu à plɛkↄ̃u.
Démɛ a fↄ̃ o a nↄ̀sɛ yãe vĩo
á kú duunasai wásawasaɛi?
10 Kiloolɛa vãi ń gbɛ̃blezaao,
Dii za beeↄu píiɛ.
11 Baa kↄ̃̀ↄ'oa guu wì dↄ̃ nɛ́wa,
tó aà yãkɛa maa mɛ́ a dↄ̀ↄ vĩ.
12 Swã́ pↄ́ wì yãmaò ń wɛ́ pↄ́ wì gu'eoo
Dii mɛ́ ń kɛ́ píi.
13 Tó ń ye ii, ńyↄ̃ gↄ̃ taaside ũɛ,
tó n wɛ́ i vĩo, blɛ a mↄma.
14 Pↄluna ì mɛ: I ka màao! I ka màao!
Tó à kàò aɛ, ì azĩa sáaukpa.
15 Vua saio, òso diɛ,
ãma bↄa yãfaade'onawa àao.
16 Tó gbɛ̃́ nibↄ fĩa dì a miwa,
ǹ aà ula si ǹyↄ̃ kũa tↄ̀ↄma ũ gbɛ̃́pi gɛ̃ɛ ũ.
17 Dìidiina pↄblea ìↄ nanɛ́,
gbɛzã sa ì gↄ̃ lɛ́u lán gbɛ̀kↄsↄwa.
18 Zɛ ń yã́o lɛdama musu,
yã́ gwa maamaa, ní gbasa zĩka.
19 Gbɛ̃pena ìↄ bɛ ń dãↄ asiioɛ,
ńsu yãalɛ ń yãbↄlɛn zↄ̃ↄdeoo.
20 Gbɛ̃́ pↄ́ a de ge a da kà,
aà filia a gawà gusia níiniiuɛ.
21 Túbiblea káau taasidↄ̃sai
líↄ báaa vĩ gbɛzão.
22 Ńsu vãi tↄsia làasookɛo.
Sↄ̃́a Diizi à n suaba.
23 Dii za kiloolɛa vãiuɛ,
gbɛ̃blezaa lí kaaàguo.
24 Dii mɛ́ ì gbɛ̃nazĩna kɛ̀sɛ dↄdↄ.
Kpelewa gbɛ̃́ a yã́ pↄ́ a kɛ zɛ́ dↄ̃i?
25 Wã lɛgbɛ̃a Luaɛ kai vĩ,
gbɛzã ńyↄ̃ làasookɛ lɛ́ pↄ́ ń kɛ̀wàpiwa.
26 Kía ↄ̃nↄna ì gbɛ̃vãiↄ plɛ
à ń ká gbɛu à ń kɛ kɛ́lɛkɛlɛ.
27 Dii filia ì gbɛ̃nazĩna làasoo pu,
ì aà nↄ̀sɛkpɛaↄ tàasika píi.
28 Gbɛ̃kɛ ń náaio mɛ́ kía dↄ̃̀anaↄ ũ,
gbɛ̃kɛkɛa ì aà kpala zɛdↄ.
29 Ɛ̀waasoↄ gbãa mɛ́ ń ĩ́andãbↄ ũ,
maezↄ̃ↄↄ mikã pua mɛ́ ń gawi ũ.
30 Gbɛ̃a pↄ́ ì gɛ̃ńgu ì vãi wolomá,
flã'ↄ̃ama ì gɛ̃ e za nↄ̀sɛkpɛau.