Bibeli Luayãtaalá Yáasiↄ 23

23

1 Tó n mↄ pↄblei ń gbãadeo,

ǹyↄ̃ dↄ̃ gbɛ̃́ pↄ́ kú n aɛ.

2 Tó asiaden n ũ,

fɛ̃na da n kòlowa.

3 Ńsu to aà pↄ́ níside n wɛ́ bleo,

asa blɛpiá kokoazuanɛɛ.

4 Ńsu ĩada nzĩawa ↄ zↄ̃ↄ ea yã́io,

ǹ nzĩa ↄ̃nↄ tó.

5 Wì wɛ́lɛ ↄ̃awaɛ ↄ̃ ì gɛ̃zɛa,

ì gã̀sĩa bↄ ì vua lán yãamusuwa.

6 Ńsu bĩide blɛ bleo,

ńsu to aà pↄ́ níside n wɛ́ bleo,

7 asa ìↄ a ↄ̃a nao a nↄ̀sɛuɛ.

Ì onɛ ǹ pↄble ǹ imi, ãma aà pↄ dↄmao.

8 Ńyↄ̃ a miↄna pↄ́ ń blè pisiɛ,

aà sáau pↄ́ ń kpà i kɛ pã.

9 Ńsu yã'o sↄũ swã́uo,

asa a sakanɛ n ↄ̃nↄyãuɛ.

10 Ńsu kↄↄ baa vĩo,

ńsu nɛtonɛↄ bú lɛ ǹ ka n pↄ́uo.

11 Asa an Zɛnnↄde gbãa,

a bↄ n kpɛɛ, i yã́sińnↄ.

12 Lɛdama da n sↄ̃u,

swã́sɛ dↄ̃ayãi.

13 Ńsu gí n nɛ́ totoio.

Tó ń gbɛ̃̀ ń flão, a gao.

14 Ǹ aà gbɛ̃ ń flão,

ǹ aà bↄ ga lɛ́zĩ.

15 Ma nɛ́, tó n nↄ̀sɛ paaa,

ma pↄna a kɛ zài.

16 Tó yã́zɛde lɛ́ bↄ n lɛ́u,

ma nↄ̀sɛ a yáalↄ.

17 Ńsu duunkɛnaↄ gwea nidɛo,

ǹyↄ̃ Dii vĩa vĩ gↄↄpii.

18 Asa ńyↄ̃ↄ zia vĩɛ,

mɛ́ tãmaa a n nɛo.

19 Ma nɛ́, ma yãma, ní ↄ̃nↄkũ,

to n laai àↄ ku yã́zɛdekɛawa.

20 Ńsu yãalɛ ń wɛ̃dɛnaↄo,

ńsu ǹyↄ̃ ku lɛ́'udeↄ guuo.

21 Asa wɛ̃dɛna ń lɛ́'udeo ì gↄ̃ puaɛ,

an mɛkɛmuuna ì ń da zwã̀nkasa yeauɛ.

22 Ǹ n de'ia yãma,

tó n da zikũ̀, ńsu sakaaàguo.

23 Ǹyↄ̃ sĩana yá, ńsu zɛɛ̀o,

ↄ̃nↄ ń yãdanɛo ń wɛzɛ̃o wɛɛlɛ.

24 Gbɛ̃maa mae pↄ ìↄ na maamaaɛ,

ↄ̃nↄna de'ia mikpɛ ìↄ tɛ́vuɛ.

25 To n de ń n dao pↄ àↄ nama,

to n da'ia yáalↄma.

26 Ma nɛ́, ǹ n nↄ̀sɛ wɛ̃mɛɛ,

wɛ́tɛ ma yãkɛai.

27 Asa káaluaá ɛ̀ zòoloɛ,

nↄɛ dↄ́ɛ'ĩideá tↄ̃ↄ kpaolonaɛ.

28 Ì gbɛ̃́ kpákpa lán kpã́iwɛliwɛwa,

ì to gↄ̃ɛ daside gↄ̃ náaisaiɛ.

29 Dé wì waiyookɛɛ̀i?

Dé wì ó'o kɛɛ̀i?

Démɛ lɛkpaa vĩi?

Démɛ zↄa vĩi?

Démɛ ì kɛ'ĩa pãi?

Dé wɛ́ mɛ́ tɛ̃ai?

30 Gbɛ̃́ pↄ́ aaì sɛ̀ɛ dɛ wɛ̃ tùui,

aaì gɛ́ kpálɛkɛi vɛ̃ɛ yãalɛaiↄnɛ.

31 Ńsu wɛbii vɛ̃ɛwa a tɛ̃akɛ n wɛ́ bleo,

asa ìↄ pipi kɛɛona guuɛ, mɛ́ a gɛ̃a lɛ́u ìↄ na.

32 Gbɛzã a swaa kĩma lán mlɛ̃waɛ,

i n gbã à n kũ lán píligonawa.

33 Ńyↄ̃ wɛsi pↄ́ pↄ́ ni e yãaolɛ,

ńyↄ̃ làasoo kpaanlakɛ n sↄ̃u.

34 Ńyↄ̃ↄ dɛ lán gbɛ̃́ pↄ́ wúlɛa gó guu ísiaawa,

lán gbɛ̃́ pↄ́ kú gó zwã̀a misonaawa.

35 Ńyↄ̃ mɛ: Wà ma gbɛ̃, i ↄ̃ao,

wà ma kɛ búubuu, mi a wãwãmao.

Bↄɛ ma wɛ́ a wee mà í wɛɛlɛ mi lↄi?