Bibeli Luayãtaalá Yáasiↄ 26

26

1 Lá lougbɛkwɛa saɛ

ge loumaa pↄkɛkɛgↄↄ lí zɛkɛo,

màa gawi lí kↄ̃si ń sↄũoo.

2 Lá gòlegolena ń luakitɛlɛnao

ìↄ vuavua, ìↄ gɛ́ la, ìↄ ta le,

màa ↄlɛlɛa gbɛ̃́ɛ pã a pↄe zↄ̃wào.

3 Flãá sↄ̃́ pↄ́ɛ, kpíá zàa'ĩna pↄ́ɛ,

sↄũ pↄ́ mɛ́ go ũ a kpɛsɛa.

4 Ńsu yã́zãsi sↄũwa a faasaikɛwao,

kɛ́ ńsu gↄ̃aàwao yã́i.

5 Yã́zãsi sↄũwa a faasaikɛwa,

kɛ́ asu azĩa gwa ↄ̃nↄna ũo yã́i.

6 Tó n lɛdì sↄũɛ,

n nzĩa ↄ̃̀ↄkpàɛ, n yã'ì nzĩaɛɛ.

7 Yáasi pↄ́ dↄ sↄũ lɛ́u

dɛ lán ɛɛ gbá pↄ́ lɛ́ gbãɛwaɛ.

8 Sↄũ kpɛlaa

dɛ lán gbɛdaa gbɛmauwaɛ.

9 Yáasi pↄ́ dↄ sↄũ lɛ́u

dɛ lán lɛ naa wɛ̃dɛna ↄzĩwaɛ.

10 Sↄũ ge gbɛ̃pãpã daazĩu

dɛ lán toekana pↄ́pii gbã́awaɛ.

11 Sↄũ ɛaa a yãfaasaikɛawa lↄ

dɛ lán gbɛ̃ pↄ́ ɛ̀a a pisi blèwaɛ.*

12 N gbɛ̃́ pↄ́ azĩa dìlɛ ↄ̃nↄna ũ èa?

Sↄũ sã̀ↄwà.

13 Màade ì mɛ: Nↄ̀ↄmusu ku zɛ́uɛ,

wài pãsĩ bɛ zɛau.

14 Lá gba ìↄ lili a lilibↄu,

màa màade ìↄ lilɛlilɛ a wúlɛkĩi.

15 Màade ì ↄsi tau,

aà blɛli gɛò a lɛ́ kĩ́i ì kɛwà ĩa.

16 Màade ìↄ e a ↄ̃nↄ

dɛ yãwendↄ̃na gbɛ̃ↄn soplaↄla.

17 Vĩ pɛ́lɛa dãↄ lɛkpaau

dɛ bàasi gbɛ̃ kũa a vlã́wa ũɛ.

18-19 Gbɛ̃́ pↄ́ a gbɛ̃́dee sã̀sã ↄ̃ à gbàsa oɛ̀: Málɛ faaiboɛ

dɛ lán wɛkɛyiode pↄ́ lɛ́ kà tɛde ń kagbao fã́ńguwaɛ.

20 Tó yàa kuo, tɛ́ ì gaɛ,

tó gbɛ̃pena kuo, sòle ì láaɛ.

21 Lá sĩsĩ ì kɛ tɛyↄ̃ɛ, lá yàa ì kɛ tɛ́ɛ,

màa lɛkpaade ì sòle da.

22 Gbɛ̃pena yã́ ì kɛnɛ́ lán zↄ́wa,

ì gɛ̃ lɛ́u dↄ̃̀ↄ e nↄ̀sɛkpɛau.

23 Nↄ̀sɛpãsĩde pↄ́ ì yã́ nana onɛ́

dɛ lán lo pↄ́ wà ã́nusu'i lɛ̀wàwaɛ.

24 Gbɛ̃́ pↄ́ ìↄ zańgu ì azĩa kɛkɛ ń lɛ́oɛ,

gbɛ̃́sãsãa làasoo mɛ́ kú aà sↄ̃u.

25 Tó yã́ nana bↄ̀ aà lɛ́u, ńsu sio,

asa yãvãi mɛ̀n sopla mɛ́ kú aà sↄ̃u.

26 Tó à a zaa gbɛ̃́ↄu ùlɛ mↄafili guu,

aà vãi ì bↄ gupuau bíla wáa.

27 Gbɛ̃́ pↄ́ ɛyↄ̃̀nɛ́ a zu a guuɛ,

gbɛ̃́ pↄ́ gbɛ gbeembò, gbɛpi a si adewa.

28 Ɛɛde za gbɛ̃́ pↄ́ ì ń ↄ̃̀ↄkpaↄgu,

kↄ̃nide ì gbɛ̃́ kpá lɛ́lɛai.

* 26:11 2Piɛ 2.22