9
Ɔ̃nↄ ń sↄũkɛo
Ɔ̃nↄ a kpɛ́ dↄ̀,
à a gbapɛlɛↄ ã̀ mɛ̀n sopla a pɛ̀lɛpɛlɛ.
À nↄ̀ↄ dɛ̀ à vɛ̃ɛ kɛ̀kɛ,
à blɛↄ sↄukɛ̀ a kàlɛ.
À a wɛ̃́ndia zĩkɛnaↄ zĩ̀,
àlɛ lɛzu wɛ̃́lɛ sĩ̀sĩ misonaa à mɛ̀:
Gbɛ̃́ pↄ́ nↄ̀sɛ vĩoↄ à ɛa mↄ kɛ!
Ɔ̃nↄkɛ̃sãmadeↄ málɛ oɛ́,
à mↄ blɛblemanↄ,
í vɛ̃ɛ pↄ́ má kɛ̀kɛ mi.
À sↄũkɛ tó, íↄ aafia,
í táa'o wɛ́kɛ̃a zɛ́u.
 
Gbɛ̃́ pↄ́ lɛ́ lɛda gbɛ̃́laanikɛnawa
ì gↄ̃ sↄ̃́sↄ̃ɛɛ,
gbɛ̃́ pↄ́ lɛ́ vãikɛna dazɛwa
ì gↄ̃ tàaeɛɛ.
Ńsu gbɛ̃́laanikɛna dazɛwao,
asa a ĩ́isɛnnↄɛ.
Ɔ̃nↄna dazɛwa, iↄ yenzi.
Yãda ↄ̃nↄnaɛ, aà ↄ̃nↄ i dɛdɛ,
yã'o gbɛ̃maaɛ, aà dↄ̃a i kã́fĩ.
 
10 Vĩakɛa Diiɛ mɛ́ ↄ̃nↄ daalɛa ũ,
Lua pↄ́ a kua adoa dↄ̃a mɛ́ wɛ́kɛ̃a ũ.
11 Asa ńyↄ̃ gɛ̃gɛ̃ ma sabai,
n wɛ̃ni a gbã̀akũ.
12 Tó ń ↄ̃nↄ, nzĩaɛɛ,
tó gbɛ̃'awiambↄnan n ũ, n mi musu.
 
13 Mìsaikɛ dɛ lán nↄɛ lɛdewaɛ,
a sↄũ mɛ́ a yãe dↄ̃o.
14 Ì zↄ̃lɛ kìlau a kpɛɛlɛ,
aà kpɛ́ kú wɛ̃́lɛ sĩ̀sĩ musu,
15 ì lɛzu gbɛ̃́ pↄ́ lɛ́ gɛ̃ↄzi,
ì o gbɛ̃́ pↄ́ zɛ́ kũa súsuↄnɛ:
16 Làasoosaide, ɛa mↄ kɛ!
Ɔ̃nↄkɛ̃sãmade, málɛ onɛ,
17 í kpã́i mia ìↄ na,
blɛblea asii guuá zↄ́ɛ.
18 Gↄ̃ɛpi dↄ̃ kɛ́ gↄ̃a gyaade ũ zɛ́n weo,
gbɛ̃́ pↄ́ à ń sisiↄ sì bɛda gbã́ou.