10
Lua yã́gↄ̃gↄ̃a ń gbɛ̃́ↄ wabikɛa
Dii, bↄ́yãi ń zɛa zã̀zãi?
Àkɛa ni ulɛnɛ́ taasikɛgↄↄzĩi?
Gbɛ̃vãi ì gbãasaide wɛ wala guu,
ì kↄ̃nikɛɛ̀, ì aà kṹ.
Gbɛ̃vãi ì a pↄnidɛaↄ ĩ́anadã,
ì bĩide sáaukpa, ì Dii tↄbɛ̃ɛsi.
Gbɛ̃vãi wala mɛ́ tò ìli Dii aɛyao,
a Lua làasoo vĩo.
Yã́ pↄ́ ì kɛ píi ì bↄɛ̀ maaɛ,
ì azĩa kã́fĩ, ìli n ikoyã dao,
ì lɛsuikɛ a ibɛɛↄwa.
Ì mɛ á kpaguao,
áↄ ku pↄnau taasikɛsai gↄↄpiiɛ.
 
Ɛɛ ìↄ dↄ aà lɛ́u
ń gbɛ̃́kaao ń yãpãsĩo,
yãdↄnwɛia ń yãvãio mɛ́ aà lɛ́ pà.*
Ì naalɛ yãesaideɛ wɛ̃́nkpɛ,
kɛ́ à e aà dɛ asii guu,
ì mi'ĩide kpákpa gusaɛna.
Ì naalɛ gbɛ̃́ↄnɛ asii guu lán nↄ̀ↄmusuwa,
ì naalɛ lákpɛu à e yɛ̃̀ɛɛsaide kṹ.
Tó à aà kũ̀, ì aà gálɛ ń a bao.
10 Gbɛ̃́ pↄ́ a le a kũ̀ gↄ̃̀ wúlɛa yɛ̃̀mɛɛ,
gbãa mɛ́ aà nɛ̀.
11 Gbɛ̃vãipi ì mɛ Lua a yã́ fãn vĩo,
ì ↄku a wɛ́waɛ, ìli gu'eo.
 
12 Dii, fɛlɛ mↄ́ ń n gbãao,
Lua, ǹyↄ̃ yɛ̃̀ɛɛsaideↄ fãnkɛ.
13 Lua, bↄ́yãi gbɛ̃vãi ì dↄ́ɛnnↄi?
Ì o a sↄ̃ guu ńyↄ̃ ĩadawao.
 
14 Ń beeo ni e sã́asã,
ni gbɛ̃́ↄ yã'ↄ̃ma ń ń pↄsiao yãda,
kɛ́ ǹ e ↄdaumá.
Yɛ̃̀ɛɛsaide ì azĩa kpama,
tonɛ pↄ́ gwana vĩo dↄnlɛden n ũ.
15 Gbɛ̃vãi ń gbɛ̃́ pãsĩo gã̀sĩ ɛ́nɛ́,
an vãi pↄ́ aalɛ e wa dↄ̃o wí ń musu.
16 Dii ìↄ kible gↄↄpii,
aà yãdansaiↄ midɛ aà bùsuu.
 
17 Dii ì yɛ̃̀ɛɛsaideↄ wabikɛa ma,
ì ń gba sↄ̃, ì swãdↄ ń yã́i.
18 Ì zɛ ń tonɛ pↄ́ gwana vĩoↄ
ń gbɛ̃́ pↄ́ wàlɛ ĩadamáↄ,
kɛ́ gbɛ̃nazĩna pↄ́ dɛ bùsuti ũ su to sↄ̃ kɛ̃́ńgu lↄo yã́i.
* 10:7 Lom 3.14