105
Lua a gbɛ̃́ↄ suabaa
(1Lad 16.8-22)
1 À Dii sáaukpa, í lɛ́mawà,
à to bui píi aà yãkɛaↄ dↄ̃.
2 À lɛsi, í aà táasilɛ,
à aà yãbↄnsaɛkɛaↄ galikɛ píi.
3 À ĩ́anadã ń Dii tↄ́ pↄ́ kú adoao.
Á Dii kĩ́i wɛ̀ɛlɛnaↄ à pↄnakɛ,
4 à gɛ Dii le à gbãa gbɛawà,
íↄ aà aɛya gↄↄpii.
5 À to yãbↄnsaɛ pↄ́ a kɛ̀ↄ dↄágu,
aà dabudabukɛaↄ ń ikoyã pↄ́ a òↄ,
6 á Dii zↄ̀blena Ablahaũ buiↄ,
á Yakↄbu bui pↄ́ à á sɛ́ↄ.
7 Dii mɛ́ wá Lua ũ,
ↄ̃mɛ ì yãdilɛ gbɛ̃́piiɛ.
8 Aà bàakuawanↄ yã́ lí sãaaguo,
yã́ pↄ́ a òpi aↄ kuɛ e wá buiwa.
9 Aà bàa kú ń Ablahaũo,
à ɛ̀a à a lɛgbɛ̃̀ Izaakiɛ lↄ.
10 Aà bàa ɛ̀a kú ń Yakↄbuo iko ũ,
ↄ̃ a kú ń Isailiↄ e gↄↄpii.
11 À mɛ̀ á Kanaa bùsu kpámá,
aↄ dɛ pↄ́ pↄ́ aa sɛ kpaalɛ guu ũ.
12 Gↄↄ bee aa dasio, wìli ń yãdao,
aa ku Kanaa bùsuu bↄ̀mↄↄ ũɛ.
13 Aaìↄ liaaliaa bui ń buioↄ guu,
aaìↄ bɛbɛ bùsu ń bùsuo.
14 I we wà ń wɛtã̀o,
à kíaↄ lèle an yã́ musu à mɛ̀
15 aasu ↄkã gbɛ̃́ pↄ́ a ń sɛ́piↄwao,
aasu ĩada a ãnabipiↄwao.
16 Ɔ̃ a tò nↄana kà bùsupiu,
a tò an kũ̀sũa làa píi.
17 Ɔ̃ à Yosɛfu gbàɛ à dↄ̀aanɛ́,
wà aà yìa zↄ ũ.
18 Wà mↄkà aà gbáwa,
wà mↄ dↄ̀ aà nↄɛ
19 e yã́ pↄ́ à dↄ̀aa ò gɛ̀ kɛ̀ò,
ↄ̃ yã́ pↄ́ Dii dàɛ̀ tò yã́ bↄ̀aànↄ na.
20 Kɛ́ kía gbɛ̃́ zĩ̀, ↄ̃ wà aà gbàɛ,
bùsu gbɛ̃zↄ̃ↄpi aà kɛ̃̀.
21 À aà dìlɛ a bùsu dↄaana ũ,
a tò aàↄ iko vĩ a àizɛɛↄwa píi.
22 Yosɛfu aà kíaↄ tòto a pↄeãwa,
à ↄ̃nↄ dà aà ìwaↄnɛ.
23 Ɔ̃ Yakↄbu buiↄ mↄ̀ Egipi,
Isailiↄ ku nibↄↄ ũ Haũ buiↄ bùsuu.
24 Dii tò a gbɛ̃́ↄ kↄ̃̀ we maamaa,
a tò aa dasikũ̀ dɛ ń ibɛɛↄla.
25 Ɔ̃ à ń ibɛɛpiↄ swãfɛ̃̀, ↄ̃ aa zà aà gbɛ̃́piↄu,
aa ↄ̃nↄsↄpɛ̀lɛ aà zↄ̀blenapiↄnɛ.
26 À a zↄ̀blena Mↄizi zĩ̀má
ń Aalona pↄ́ a sɛ̀o.
27 Aa yãkɛ̀ Egipiↄnɛ seela ũ,
aa dabudabukɛ̀ Haũ buipiↄ bùsuu.
28 À gusia gbàɛmá, gu sì ń bùsuu,
kɛ́ aa gì aà yãmai yã́i.
29 À ń swa'i lìlɛ à gↄ̃̀ au ũ,
ↄ̃ a kpↄↄ gàga.
30 Blↄↄ lì ń bùsua
ń ń gbãadeↄ wúlɛkĩiↄ píi.
31 À yã'ò ↄ̃ ũsĩnaↄ kàńgu,
gã́i kàńgu e an bùsu lɛ́ lɛ́u píi.
32 À lougbɛ kàńgu lou ũ,
loupilɛa lì ń bùsua gupiiu.
33 À ń vɛ̃ɛliↄ ɛ̀'ɛ ń ń kaadↄɛnliↄ,
à ń bùsu líↄ kɛ̀ kɛ́lɛkɛlɛ píi.
34 À yã'ò ↄ̃ kwaↄ kàńgu,
kwasutɛ̃ↄ kà, aa lɛ́ vĩo.
35 Aa ń bùsu sɛ̃ ń láo nɛ̀,
aa ń buapↄ́ↄ blè píi.
36 À ń bùsu nɛgↄ̃ɛ sɛ̃́iaↄ dɛ̀dɛ píi,
nɛ́ woode pↄ́ aa ń í ń ɛ̀waasogↄↄpiↄ.
37 À bↄ̀lɛ ń a gbɛ̃́ↄ,
aa ã́nusu ń vuao kũa,
an bui gbɛ̃e i gɛ̃nalɛ zɛ́uo.
38 Kɛ́ aa bↄ̀lɛ, Egipiↄ pↄ kɛ̀na,
kɛ́ vĩa ń kṹ Isailiↄ yã́ musu yã́i.
39 À tɛlu pɛ̀lɛ kpà a gbɛ̃́ↄzi,
à kɛ̀ tɛ́ ũ gwã́, à gupùnɛ́.
40 Aa wabikɛ̀wà, ↄ̃ à mↄ̀nɛ́ ń bùuↄ,
à musu blɛ kpàmá aa kã̀.
41 À gbɛsi pàa, ↄ̃ í bↄ̀u,
ípi bàalɛ̀ guwaiwaiu we lán swawa.
42 Asa lɛ́ pↄ́ a gbɛ̃̀ yã́ dↄaàguɛ,
yã́ pↄ́ a ò a zↄ̀blena Ablahaũɛpi.
43 À bↄ̀ ń a gbɛ̃́ↄ, aalɛ pↄnakɛ,
gbɛ̃́ pↄ́ a sɛ̀piↄ guladↄ.
44 À buipãleↄ bùsu kpàmá,
zĩ pↄ́ gbɛ̃́piↄ kɛ̀ↄ ài gↄ̃̀nɛ́.
45 Bee kɛ̀ píi kɛ́ aa e wàↄ a yãdilɛaↄ kũa,
aai a ikoyãↄ da.
Àleluya!