140
Wabikɛa gbɛ̃vãiↄ yã́ musu
1 Davidi lɛ.
2 Dii, ma si gbɛ̃vãiↄwa,
ma dↄ̃́a gbɛ̃́ pãsĩpiↄ yã́i.
3 Aaì yãvãi wàaipa ń sↄ̃ guu,
sòle lɛ́ ↄ̃ aaìↄ wɛ́ gↄↄpii.
4 Aaì ń lɛ́ kɛkɛ lán mlɛ̃wa,
an lɛgbɛ'iá sↄ̀gbala sɛwɛɛ.
5 Dii, ńsu to gbɛ̃vãiↄ ↄkãao,
ma si gbɛ̃́ pãsĩpiↄwa,
aaì ↄzↄ̃amazi lɛkpaaĩ.
6 Waladepiↄ ɛyↄ̃̀mɛɛ,
aa filifilimbakpàmɛɛ,
aa baikpàmɛɛ zɛ́u.
7 Má ò Diiɛ: Ma Luan n ũ,
swã́kpa ma wɛ̃na wiii, Dii.
8 Dii Lua, ma Suabana gbãa,
ni ↄkumala zĩ guu.
9 Ńsu to gbɛ̃vãiↄ pↄeã zɛkɛo,
Dii, ńsu to an lɛkpaaĩ kↄ̃sɛo.
10 To gbɛ̃́ pↄ́ liaamaziↄ midɛ,
to vãi pↄ́ aalɛ o wí ń musu.
11 To tɛyↄ̃ wãa ɛ́lɛmá,
to aa si ɛ pↄ́ aa fↄ̃ bↄuo guu.
12 Ńsu to yã́siade zɛkĩi e dṹniauo,
to vãi aↄ gbɛ̃́ pãsĩ wɛ zɛsaiɛ.
13 Má dↄ̃ Dii ì yãnakpa wɛ̃nadeↄwa,
ì yãkɛkɛ taasideↄnɛ a zɛ́wa.
14 Gbɛ̃maaↄ mɛ́ aa n tↄbↄ,
nↄ̀sɛpuadeↄ mɛ́ aaↄ ku n kĩ́i.