50
Lousisia sĩana
Asafa lɛ.
Dii Lua Gbãapiide lɛ́ yã'o,
àlɛ lɛzu dṹnia gbɛ̃́ↄzi
za ĩatɛ̃bilɛkĩi e a gɛ̃kpɛukĩi.
Lua gawi bìlɛ Siↄna,
wɛ̃́lɛ pↄ́ a kɛfɛnkɛ bↄlɛi.
Wá Luapi lɛ́ mↄ́, aↄ ku kílikilio.
Tɛ́ pↄ́ ì kṹmá kú aà aɛ,
zàa pãsĩ liaaaàzi.
Àlɛ lɛzu musudeↄ ń zĩ́lɛdeↄzi,
kɛ́ à e yã́kpalɛkɛ ń a gbɛ̃́ↄ.
À mɛ̀: À ma yãmanaↄ kãaamɛɛ,
gbɛ̃́ pↄ́ ma bàa kúńnↄ sa'oaa yã́iↄ.
Lua mɛ́ yã́kpalɛkɛna ũ,
musudeↄ ì aà yãkɛa a zɛ́wa kpàwakɛ.
 
À ma ma gbɛ̃́ↄ, má yãvĩ mà oɛ́,
Isailiↄ, má bↄbↄánↄ,
mámɛmaa Lua á Lua.
Málɛ zↄadↄwá á sa'oa yã́io,
asa i sa pↄ́ wì a pↄ́ kátɛu à tɛ́kũ oa kↄ̃sↄ̃kↄ̃sↄ̃.
Má zuswana pↄ́ kú á kpàsau ni vĩo,
ge ble pↄ́ kú á kaau,
10 asa sɛ̃̀anↄbↄↄá ma pↄ́ↄnɛ
ń pↄtuo wai pↄ́ kú sĩ̀sĩ píi musuↄ.
11 Má gbɛ̀ musu bãↄ dↄ̃ píi,
mɛ́ sɛ̃sao pↄkelenaↄ ku ma pↄ́ ũɛ.
12 Tó nↄa lɛ́ ma dɛ, má oɛ́o,
asa mámɛ má dṹnia vĩ ń a pↄ́ↄ píi.
13 Mi zuswana nↄ̀ↄ so yã̀?
Mi blesana au mi yã̀?
14 À sa'oa ma sáaukpaa ũ,
à lɛ́ pↄ́ á kɛ̀ ma Musudewa fĩabo.
15 À lɛzumazi taasikɛgↄↄ,
mí á bↄu, í ma kpɛla.
 
16 Ɔ̃ Lua ò vãikɛnaↄnɛ:
Àkɛa álɛ ma yãdilɛaↄ dↄdↄi,
mɛ́ ma bàakuańnↄ yã́ dↄ á lɛ́ui?
17 Á ye ma yãdanɛio,
a ma yã́ↄ kpà kpɛ.
18 Tó a kpã́i è, i aà kɛ á gbɛ̃́ ũɛ,
mɛ́ á bàa ìↄ kú ń gbãsĩkɛnaↄ.
19 Á lɛgbɛ'i vãi,
mɛ́ i lɛnakasanɛ́.
20 I zↄ̃lɛ ń á gbɛ̃do tↄ́o,
mɛ́ i á da nɛ́ bɛ̃̀ɛbo.
21 A yã́ beeↄ kɛ̀ ↄ̃ má nílɛ.
Álɛ e má dɛáwaɛ,
ãma má zↄadↄwá, mí bↄbↄánↄ.
 
22 Á gbɛ̃́ pↄ́ ma yã́ sã̀águↄ
à yã́pi ma.
Tó màan sↄ̃o, má á taitai,
gbɛ̃e a e á siao.
23 Gbɛ̃́ pↄ́ sa'òa ma sáaukpaa ũ
ade ma kpɛlàɛ,
àlɛ ma gba zɛ́ mà ↄlↄɛ
lá mi gbɛ̃́ↄ suabaɛ.